19
Yapali be uyáwana yábana goi
1 Moe dogoiyadi sikavava, e níyana tayamo anove ana taiyakeka nakae neta boda gagaaina niyadi gagaina yábana goi siiduduwo sidigo kadi,
‘Yauwe tayapalīye!
Ida Yaubada ina yava, ana káeyana
be ina togaga ivagitakoedi!
2 Ida yapaliyana unana ina takínona
kivaavasaina be mooitamoidi.
Ina takinonayana ame nakae:
Tomatagogoli gagaina boi ina masisi goyogoyoina goi
da poyapoya ibugoyaidi,
tuwo Yaubada itakino toogoyoina.
Tomatagogoliyana nimana goi
Yaubada ina pakonayao ikaikaidi sikaaiyaka,
tuwo Yaubadayana ikatumapu.
Tauna Tauyana ina takinonayana pasina tayapalīye!’† Atu 32:43; 2To 9:7.
3 Tuwo aiyuwoina niyadi gagaidi goi siduduwo sidigo kadi,
‘Yauwe tayapalīye!
Amo asayana ana kaigabu pasina
aubowoina ituko vata.’† Ais 34:10.
4 Tuwo tomoyamoyayadi tuwenti poa (24) be nakae dogoi maa yawoidi adi taivasi aedi sivatugúyala Yaubada kebana esaaesaina goi itulagalaga sisakululu, sidigo kadi,
‘E nakae!
Yauwe kayapaliyem!’
5 Ikavava, níyana tayamo kébana esaaesaina goi anove idigo kana,
‘Komi liliumi,
Yaubada ina pakonayao be ana totaimaminayao,
nakona youtagau o maa yoimi,
ida Yaubada koyapalīye!’† Sam 115:13.
6 Amo ikavava, níyana tayamo anove ana taiyakeka nakae neta boda gagaaina siiduduwo o nakona bwae badabadaidi sidududu butukaodi nakae†a Isi 1:24; Nuw 1:15, 14:2. o palapala gagaina butukáona nakae go, idigo kadi,
‘Yauwe ida Yaubada Tokalika iilovina!
Tauna tayapalīye!†b Sam 93:1, 97:1, 99:1; Nuw 11:15.
7 Tauyawana dōkana,
tayapalīye
be nakae ina togaga ana káeyana takamoitamōe
unana Lami ina nai ana tuta bogina ima.
Nakae tonai vavina bogina ikatubayasi idi nai manuna!
Tauna ina togaga ana káeyana takamoitamōe!
8 Ina katubayasiyana moe Yaubada bogina itagona
bego vavinayana kwama poowouna
nakae maavadaina ilosi.’
Kwamayana ana yagoina moe Yaubada ina kimasabayao idi sinapu dedevidi nakae.
9 Amo ikavava, aneroseyana ilatuwokoigu idigo kana,
‘Livala ame kugīni kam,
“Avatauwa komi neta Yaubada iduduwemi Lamiyana ina nai aikanina manuna,†a Ais 25:6-8; Mad 22:2-3; Luk 14:15. e ami dedevina bei kobabane.” ’
Tuwaina kana,
‘Ame livalayadi moe Yaubada ina livala mooitamoidi!’†b Nuw 21:5, 22:6.
10 Tuwo aneroseyana aena goi aegu avatugúyala be yaina asakululu go, ilatuwokoigu idigo kana,
‘Moe nakae geya! Yau Yeisu ina pákwana kom be semowo nakae, komi tauyami boi Yeisu ina talavaita koyoisikavate. Tauna Yaubada anetava yaina kusakulūlu. Moitamo. Valayana Yeisu itaalavaite Baloma Kimaasabaina goi ima go, Balomayana nakae tokabivalavala nukotodi isanayatoidi valayana sitalavaite. Tauna kom be yau vala tayamo ana totalavaitayao tavavasa.’
Yaubada ana kaleyayao idi vailai
(Nuwogau 19:11—20:15)
Osi poowouna ana totulaga
ikatubayasi yaviya manuna
ikatubayasi yaviya manuna
11 Amo ikavava, agite yábana ikatupáeva†a Isi 1:1. go, kunōve! Osi poowouna mana totulaga isowóduwo. Totulagayana sivayou Aba Numisa be Moitamo.†b Sam 9:8; Nuw 3:14, 16:7, 19:2. Tauyana mana kivavasa itakínona be nakae ivayaviya.†c Tat 5:3; Sam 96:13; Ais 11:4. 12 E matana adi kaigigita yeu sabeninimina nakae go, dabana goi lovina dabayogigina esaaesaina badabadaidi sikaaiyaka.† Dan 10:6. Yoina sigini go, ana yagoina Tauyana anetava iyagoi. 13 Ana kwama maanawena go, ikaika goi sivakutui, tauna ikaika kaka. Yoina sivayou kadi,
‘Yaubada Ina Livala.’
14 Yábana ana tovayaviyayao madi kwama poowoudi be maavadaidi idi osi poowoudi situlaga go, Tauyana sisabookuliye. 15 Go Tauyana tobuna goi sisi sooinina nakae†a Ibe 4:12. iisowóduwo†b Ais 29:2; Nuw 1:14. bego Totuyoyowo ikaumatedi. Ikavava, ina lovina toogagaina goi bei ilovina yaidi.†c Sam 2:9; Ais 11:4; 2Tk 2:8; Nuw 2:27, 12:5. Bei oine ana kaba vavetaveta goi ivavetevetedi; aba vavetavetayana moe Yaubada Tokalika toina ina egamogamogu gagaina.†d Ais 63:3; Iyl 3:13; Nuw 14:20, 16:19. 16 Go ana kwama maanawena goi be nakae dibuwatuna goi yoina sigini kadi,
‘Tokalibúbuna liliudi adi Tokalibúbuna
be nakae tomoyamoya liliudi adi Tomoya.’† Atu 10:17; 1Ti 6:15; Nuw 17:14.
Woiwoi mana bodao sivailai
17 Amo ikavava, tayamo anerose agite níyala goi iitaoya, mánuwo madabokidi yábana osasaina goi siyovayova iduduwedi idigo kana,
‘Kodēli kōma kogūguna Yaubada ana káika gagaina goi† Isi 39:17-20. 18 bego amo tauyadi wowodi kokanidi: Tolovina wowodi, tovayaviya adi tokalikumatanayao wowodi, koroto toogagaidi wowodi, osi madi totulagayao wowodi be nakae tomota liliudi wowodi, nakona taliigavidi o paakonidi, nakona youtagau o maa yoidi.’
19 Amo ikavava, woiwoiyana boi négwasa goi isinalaga† Nuw 13:1-10, 17:11-14. be nakae poyapoya ana tolovinao madi tovayaviyayao agitedi bogina sitaligógana sima bei Tauyana osi poowouna goi iitulaga mana tovayaviyayao sivayaviyedi. 20 Go Tauyana osi poowouna goi iitulaga itaoya, woiwoiyana be nakae tokabivalavala polapolayana iyoisidi. Tokabivalavalayana boi aba kinana imadagidi, e aba kinanayadi goi tomota ikatubaudi. Amo tauyadi woiwoi ina katukatu nimadi o dabadi goi sikaupakiyedi nakae tokwalu woiwoi maisiyana yaina sisaakululu.†a Nuw 13:1-18. Tuwo adi taiyuwokova iyoisidi ilavedi ma yawoidi sisou sina yeu sabeninimina poiseni mokauna taiyao sinaedi goi.†b Dan 7:11. 21 Kidi go woiwoiyana ina tovayaviyayao nava sikaaiyaka, tuwo osiyana ana totulaga ina livala sisi nakae tobuna goi isowóduwo ikaumatedi. Tuwo manuwoyadi liliudi sima wowodi sikanidi, bogina gamodi.
†19:2 Atu 32:43; 2To 9:7.
†19:3 Ais 34:10.
†19:5 Sam 115:13.
†a19:6 Isi 1:24; Nuw 1:15, 14:2.
†b19:6 Sam 93:1, 97:1, 99:1; Nuw 11:15.
†a19:9 Ais 25:6-8; Mad 22:2-3; Luk 14:15.
†a19:11 Isi 1:1.
†b19:11 Sam 9:8; Nuw 3:14, 16:7, 19:2.
†c19:11 Tat 5:3; Sam 96:13; Ais 11:4.
†19:12 Dan 10:6.
†c19:15 Sam 2:9; Ais 11:4; 2Tk 2:8; Nuw 2:27, 12:5.
†d19:15 Ais 63:3; Iyl 3:13; Nuw 14:20, 16:19.
†19:16 Atu 10:17; 1Ti 6:15; Nuw 17:14.
†19:17 Isi 39:17-20.
†a19:20 Nuw 13:1-18.
†b19:20 Dan 7:11.