14
Yeisu ina Parisi ina vada goi:
Koroto tayamo ikideedevine tetelina
Koroto tayamo ikideedevine tetelina
1 Tayamo Parisi adi tovakumgo Sabati goi Yeisu iduduwe ima ina vada áika manuna. Niga tutayana ina vadayana goi isiu, Parisi be Yaubada ina Katukeda ina tonanamsayao nakae sikaaiyaka Yeisu sigiitedoko neta lovina tayamo ikapipilave. 2 Go tayamo koroto aena nimana situbusapasápala go, Yeisu matana goi ikaaiyaka. 3 Go kina Yeisu Yaubada ina Katukeda ana tolumavivitayao be Parisi ilatuwokoidi idigo kana,
‘Manakae? Mada tagona Sabati goi takidedevina gea geya?’
4 E kidi go tauyadi situgau. Tuwo korotoyana nimana kina Yeisu iyoisi, korotoyana ikidedevine. Ikavava, ietune ina ina kasa. 5 Ietune ikavava, itugavila, tauyadi ilatuwokoidi kana,
‘Neta Sabati go, komi avatauwa neta natumi o imi bulumakau bobosiu goi isouye, manakae? Bei mainao kobulagasi, gea geya? Geya, bei kobulagasi.’† Mad 12:11.
6 Go ina livala pasidi tauyadi sopadi ikaupatudi.
Yeisu ina Parisi ina vada goi:
Ivatulukoidi wowoina basekoina
áika goi manuna
Ivatulukoidi wowoina basekoina
áika goi manuna
7 E tomota áika sinaena goi Yeisu iigitedi wowoina basekoina sikiinavedi be siitusobu, tuwo livalakaibala tayamo ilatuwokoidi idigo kana,
8 ‘Tutayana toni káika iduduwem nai ana káika manuna, kūna go, taabu wowoina basekoina goi kuutusōbu, govila bei tomota tayamo toolagaina toina kina toni káika iduduwe ima.† Abi 25:6-7. 9 Tuwo kom be tolagainayana ami toduduwo bei ima ilatuwokoim kana,
“Kutāoya bei ame tauyana kutagōne im kaba tusobu goi itusobu.”
Tuwo kom mam omayamaya bei kutaoya kuna aba tusobu toluyena goi. 10 Go sem tutayana toni káika iduduwem, kūna go, aba tusobu toluyena goi kutusōbu bego tutayana am toduduwo ima, bei ilatuwokoim idigo kana,
“Siyagu, kūma baseko dedevina toina goi kutusōbu.”
Amo tutayana toyoko liliudi matadi goi kom aba taimámina.
11 Livalakaibala ame ana masi bego avatauwa neta toinidi sikilagalagasidi, e niga Yaubada bei ikisobuyedi. Go avatauwa neta toinidi sikisobusobuyedi, e niga Yaubada bei ikilagasidi.’† Mad 23:12; Luk 18:14; Yem 4:10; 1Pi 5:6.
12 E Yeisu toni vada ilatuwoko idigo kana,
‘Tutayana neta dine o lavilavi goi áika kuguinuwe, semowo o tuwowomowo o osemowo o toesaesa taabu kuduuduwēdi, govila bei kidi nakae áika manuna siduduwem be moe im katumapu bogina kubabane. 13 Go sem tutayana áika gagaina kuguinuwe, tookaidi, tokaituko, topem be tokebo kududuwēdi sima sikáika. 14 Moe tauyadi geya itoboinedita im yabobona sikatumapu, tauna am dedevina bei kubabane. Ame moitamo. Am katumapu tokibóbwata adi taoyamna ana tuta goi bei Yaubada ivinim.’
Yeisu ina Parisi ina vada goi:
Ivatulúkwana áika gagaina
Yaubada ina kalibúbuna goi manuna
Ivatulúkwana áika gagaina
Yaubada ina kalibúbuna goi manuna
(Madiu 22:1-14)
15 E koroto maniyedi taiyao sikakáika go, tayamo yaidi goi Yeisu ina livala amo inovedi, Yeisu ilatuwoko idigo kana,
‘Avatauwa neta Yaubada ina kaba kalibúbuna goi bei sikáika, adi dedevina bei sibabane!’
16 E Yeisu ilivalakaibala kana,
‘Tayamo koroto áika gagaina iguuinuwe. Boda badabadaidi iduduwedi aikayana manuna. 17 Ikatubayasi ikavava, áika ana tuta goi ina pákwana ietune ina tomotayadi bogina iduuduwedi ilatuwokoidi kana,
“Bogina sivaideda, kōma!”
18 Ago madabokidikova sivatowo sivakibala. Tayamo kana,
“Yau tánuwo makaitaga agimone, itoboine ana agite. Akawanoi yaim kutagonēgu aikayana goi geya awoita.”
19 Koroto aiyuwoina kana,
“Bulumakau yawou bogina agimonedi. Ame bei ana aepaisewekonedi. Akawanoi yaim kutagonēgu aikayana goi geya awoita.”
20 Koroto aitonina kana,
“Makaitaga anai. Moe pasina geya itoboineguta ao aikayana goi.”
21 Geya, tuwo pakoninayana ikaluvila ina ina tomoya ilatuwoko tomota idi katae manuna. Tuwo kina tomoyayana mana egamogamogu idigo kana,
“Woilīm kūna asa adi kenao liliudi goi tookaidi, tokaituko, tokebo, topem kwabīdi kumēdi sikáika!”
22 Tuwo pakoninayana ina nakae iguinuwe. Ikavava, ikaluvilamna ima ina tomoyayana ilatuwoko idigo kana,
“Tomoya, kaga liliuna kuudigedi bogina aguinuwedi go, nava im vada geya ikayaodeta.”
23 Tomoyayana idigo kana,
“Asa kukalāve go, kusōu kūna enao gagaina goi kuutāoya, kedavapola liliudi goi tomota kuugitedi kutamyabīdi sima bego guna vada sivakayaodei!” ’
24 Yeisu kana,
‘Ame moitamo. Ame alatuuwokoimi konōve: Geya tayaamo tomota boi mainao agimiiduduwe guna káika manuna bei ikáika.’
Yeisu ana sabokuli ana moumou manuna
(Madiu 10:37-38)
25 E boda gagaina Yeisu siikitau go, itugavila bodayadi yaidi idigo kana,
26 ‘Avatauwa neta sima yau yaigu bego simalatovatotówana go, idi matakoi tamadiyao, sinadiyao, monediyao, natudiyao, sediyao, niudiyao, e nakae toinidi yawoidi yaidi ivakaigaga namliyeta yau yaigu, geya itoboinedita bei simalatovatotówana yau yaigu.
27 Avatauwa neta geya sitagoneta bei toinidi idi kerose sikavale‡ Idi kerose sikavale: Livala ana talígava Luke 9:23 goi kugite. be nakae sisabokuliyegu, geya itoboinedita bei simalatovatotówana yau yaigu.† Mad 16:24; Mak 8:34; Luk 9:23. 28 Itoboine mainao konuwonúwana sabokuli ana moumou manuna, neta itoboinemi kosabokuliyegu o geya. Guna nuwonúwana ataligei. Avatauwa komi yaimi goi neta latuwomi vada maanawena koyowo, mainao imi yógana kokatuyaivi bei koyagoi yoiyami vadayana koyowosave gea geya? Madabokimi ae? 29 Nakae koguinuwe, govila bei dako bogina koláui ikavava go, geya itoboinemita vada kolukavave, e toyoko liliudi sigitemi sivatowo sivaponuponuyemi 30 kadi,
“Ame korotoyana ivatowo vada iyowo go, geya itoboineyeta ilukavave.”
31 O nakona tolovina tayamo mana tovayaviyayao ten tausani (10,000) bego sina ituli ta tolovina mana tovayaviyayao tuwenti tausani (20,000) sivayaviyedi. Manakae? Bei tolovinayana inuwonuwana dókana gea geya? U. Mainao inuwonúwana kana, “Itoboinegu bei guna kaleyayao atogagasavedi o geya?” 32 Neta inuwonúwana geya itoboineyeta itogagasavedi, e ina kaleyayaoyadi nava aduwanau goi go, tolovinayana ana katumapu bei ietune ina ina kaleyayadi yaidi goi tuboina manuna ikawanoi.
33 E tauna komi nakae. Itoboine sabokuli manuna konuwonúwana. Go neta geya kotagoneta bei konami liliudi kokalavedi, geya itoboinemita komalatovatotówana yau yaigu. 34 Tauna avatauwa komi neta latuwomi kosabokuliyegu go, geya latuwomi kokasalemi yau yaigu, e komi soroti neta ina togaga bogina ikavava nakae. Soroti dedevina go, neta ina togaga ikavava, manakaena idedevinamna? Geya ae? 35 Geya basabasainamo bego poyapoya ikitogage o mosamosa taiyao tapopoli poyapoya ana togaga manuna. Tuwo kolaveyāmo moetala goi kokalāve.†a Mad 5:13; Mak 9:50. Avatauwa komi neta ma taaiyami, e guna livala konoovedōko.’†b Mad 11:15, 13:9,43; Mak 4:9,23, 7:16; Luk 8:8; Nuw 2:7,11,17,29, 3:6,13,22.