15
Livalakaibala aito Yaubada tomota sulaaigidi iluusaledi manuna
1 E takisi ana togogoyao be ituli ta toogoyoidi badabadaidi tuta liliuna simamaima Yeisu yaina bei Tauyana sitaaiyakeke.† Luk 5:29-30. 2 Go kidi Parisi be Yaubada ina Katukeda ana tovatulukwanayao nakae sima go, Yeisu siikului sidigo kadi,
‘Ame tauyana toogoyoidi iuyaaonedi be taiyao sikakáika.’
3 E tuwo kina Yeisu livalakaibala ame ilatuwokoidi idigo kana,
4 ‘Neta koroto tayamo yaimi goi mana sipi ana badabada tayamo andedi (100) go, tayamo ivatagauye, manakae? Bei ina sipi naintinain (99) deedevidi udódana goi ikalavedi sikaaiyaka go, ina ina sipiyana taagáuna ilusale ana kadókana ibabane, gea geya? 5 U, nakae. Iilusale, iilusale ana kadókana ibabane. Tutayana ibabane, bei ikabi mana uyáwana ikavale. 6 Ikavale, ikaluvila ima ina vada go, senao be ina kasa tomotaidi iduduwedi kana,
“Guna sipi boi avaatagauye bogina ababane, tauna kōma taiyao tauyāwana!”
7 Ame alatuuwokoimi konōve: Yábana goi bei nakae. Toogoyoina tayamo ina tugavila pasina yábana goi bei siuyáwana gagaina namliyeta naintinain (99) bego tokibóbwata pasidi. Amo tauyadi sinuwonúwana kidi bogina tokibóbwata, tauna idi nuwonúwana bego tugavila tuwo.
8 O nakona vavina tayamo neta mana mani ana badabada yawou go, tayamo ivatagauye, manakae? Bei ina rampa igabu, ina vada ikaidiyoyoi, e maniyana ilusaledoko ana kadókana ibabane? U, nakae. 9 Tutayana ibabane, senao be ina kasa tomotaidi iduduwedi sima idigo kana,
“Guna mani boi avaatagauye bogina ababane, tauna kōma yau taiyao tauyāwana!”
10 Ame alatuuwokoimi konōve: Yaubada ina aneroseyao nakae. Tauyadi siuyáwana toogoyoina tayamo ina tugavila pasina.’
11 E tuwaina idigo kana,
‘Tayamo koroto natunao koroto adi taiyuwo. 12 Kina bogomane ima tamana yaina goi idigopopóita idigo kana,
“Tamagu, yau guna toboda kuvinīgu.”
E tuwo moitamo tamanayana konana liliudi ikaiguyauyedi natunao adi taiyuwo yaidi goi.
13 Go maliyalina maniyedi sikavava, bogomaneyana ina toboda madabokina ikaigimone. Ikaigimone ikavava, ina mani ikabi, itaoya asa ikalave go, ina ituli ta kasa aduwanau goi. Amoko goi ikaaiyaka go, uyawana owáowana goi ina maniyadi madabokiina ikavavaluge. 14 E ina mani madabokina bogina ilukavave mlina loga gagaina amo dadavayana goi isowóduwo go, kina bogina nima kaka ikaaiyaka. 15 Tuwo ina toni kasa tayamo yaina paisewa ikawanoiye. Ikawanoiye, e toni kasayana itagona, paisewa tayamo goyogoyoina ivini; ietune ina ina bao ivaavanidi. 16 Ina ivaavanidi go, loga ikámasa toina, tuwo latuwona toina bao avadi goyogoyoina goi ikáika gamona. Ikaawanoi tomota yaidi go, geya tayaamo kaga sivinivini. 17 E niga nukotona imavada kana,
“Tamagu ina topaisewao madabokidi maa kavadi gagaina go, yau ameko goi loga akamakámasa! 18 Bei ataoya ana tamagu yaina kagu, ‘Tamagu, bogina agoyo Yaubada yaina be nakae kom yaim. 19 Geya itoboineyeta bei tuwaina kuduuduwegu yau natum. Kuvayokōigu yau im topaisewa nakae.’ ”
20 Tuwo moitamo itaoya ina tamana yaina.
E nava aduwanau goi imamaima go, tamanayana ikandobala natuna igite, mana nuwokapisi ilokoina ina nukotona goi ivaayavau be iyowoi. 21 E kina natunayana idigo kana,
“Tamagu, bogina agoyo Yaubada yaina be nakae kom yaim. Geya itoboineguta bei tuwaina kuduuduwegu yau natum.”
22 Go tamanayana ina pakonayao ilatuwokoidi idigo kana,
“Woilīmi kōna kwama maanawena dedevina kokābi kōme natugu kovalōsi! Rini kokābi, nimana goi kovalilīvi be sendoro kokabīdi aena goi kovalilivīdi! 23 Ikavava, kōna bulumakau bonatuna bobíbina koyōisi kokaumāte kovaipōlu. Ikavava, kōme takāika be tauyāwana 24 unana ame natugu boi ikámasa go, ame maa yawoina! Boi itagau go, bogina ababane. Tauna tauyāwana.”
Tuwo moitamo sivatowo siuyáwana.
25 E kina koroto ina botomoyayana tánuwo goi ikaaiyaka go, imamaima bogina ina vada goi ivakakana, vesi be láusa inovedi. 26 Tuwo tamana ina pákwana tayamo iduduwe ima ilumadade idigo kana,
“Amo kaga siguuinuwe?”
27 “Siyam bogina ima go, mana dedevina tamam ikabimnei, tauna ilovina bulumakau bonatuna bobíbina siyoisi sikaumate siyamyana ana káika siguinuwe”, pakoninayana kaena.
28 Go botomoyayana gamona igoyo toina, e geya latuwona vada isiu. E kina go tamanayana isowóduwo ina natuna yaina goi ikawanoi makimaki kana,
“Kusīu.”
29 Go kina botomoyayana kana,
“Iyaa! Tala maanawena manum apaaisewa. Talayadi goi geya tayaamo im lovina akapipilave go, yau goti geya kuuvinigu bego segowo taiyao kakáika be kauyáwana. 30 E moe natumyana tomatagogoli yaidi goi im esaesa isikolakolave go, tutayana ima, im lovina goi bulumakau bonatunayana bobíbina siyoisi sikaumate ana káika manuna!”
31 Go kina tamanayana kana,
“Natugu, kom tuta liliuna yau taiyao. Konagu liliudi moe kom konam. 32 E amo siyam. Boi ikámasa go, ame maa yawoina. Boi itagau go, bogina ababane, tauna itoboineda áika taguinuwe be tauyáwana.” ’