Babiloni ina vailai
17
(Nuwogau 17:1—19:10)
Livalakaibala tomatagogoli
be nakae woiwoi kayakayaina manudi
be nakae woiwoi kayakayaina manudi
1 Amo ikavava, anerose ainima aiyuwo maadi noko yaidi tayamo ima ilatuwokoigu idigo kana,
‘Kūma! Asayana gagaina vavina tomatagogoli‡ Tomatagogoli: Nakona ame livalakaibala asa Babiloni manuna unana asayadi idi sinapu igoyo toina. Aiyuwoina nakona ame vavinayana aba kinana tomota liliudi neta Yaubada siikatae, tauna yaubada polapola yaidi sisakululu. toogagaina nakae ana liuna bei avatulukoim. Tauyana bwae badabadaidi kikidi goi iitusobu iilovina.† Yer 51:13. 2 Ana kaigigita da poyapoya adi tolovinayao taiyao simasisi goyogoyo. Ago vavinayana ina oine sinapu goyo nakae goi itubanibanidi ivaanimdi siiyaluwo, e ina sinapu goyogoyoidi nakae sikamonamonaanaedi bego siguinuwedi.’† Ais 23:17; Yer 51:7.
3 Amo ikavava, Baloma Kimaasabaina iyoisigu, e aneroseyana ima ikabigu ikavalegu kana yoyowo beso goi. Amoko goi vavina tayamo agite woiwoi kayakayaina yatana itulagalaga.† Nuw 13:1. Woiwoiyana bulubuluna ana badabada ainima aiyuwo go, ana dágula ana badabada yawou. Sakavaina madabokina goi you badabadaidi sikaaiyaka go, youyadi you aipopóita. 4 Vavinayana ana kwama kalaakovina be kayakayaina go, ana pasapasa moe goura be gurewa maisadi gagaina be nakae paku maisadi gagaina. Nimana goi tayamo keiga goura iyoyoisi go, kaga aba kalagíwala be báila ikayaoda ina masisi goyogoyoina pasina.† Yer 51:7. 5 Dabana goi you tayamo boi ana yagoina vamoounina sigini kadi,
‘Babiloni Gagaina,
tomatagogoli sinadi be nakae kaga liliuna
aba kalagíwala poyapoya goi unadi.’
6 Amo ikavava, vavinayana agite Yaubada ina kimasabayao kaamasidi ikaikaidi bogina inim ginagina iyaluwo, e nukotona ikabi, to igoyo toina. Tauyadi boi Yeisu sitaalavaite go, idi talavaita pasina vavinayana ikaumatedi. Vavinayana agite, akainaopa gagaina. 7 Tuwo aneroseyana ilatuwokoigu idigo kana,
‘Kaga unana kukaiinaopa? Vavinayana kugite woiwoiyana ma bulubuluna ainima aiyuwo be mana dágula yawou goi iisowoya, e tauyana be nakae woiwoiyana adi yagoina bei ataligei manum. 8 Amo woiwoiyana kugitegite boi mainao maa yawoina ikaaiyaka†a Pil 4:3; Nuw 3:5, 13:8, 20:12,15, 21:27. go, ame geya, nava bei masi gagaina†b Nuw 9:1-2,11, 11:7, 20:1. goi ituko ima go, niga bei ivailai vata. Tauna da poyapoya neta Yaubada ina madágina kunu goi go, ima ame tuta yoidi yawana vata bukina sinaena geya iginidita, bei sikainaopa.†c Sam 69:28. 9 Avatauwa neta madi nanamsa, bei moe ana talígava sibabane. Ana taligavayana ame nakae: Woiwoiyana ma bulubuluna ainima aiyuwo moe koya ainima aiyuwo yatadi goi vavinayana iitusobu. Aiyuwoina bulubulunayadi moe tolovina ainima aiyuwo. 10 Tolovinayadi adi tainima bogina sisou go, tayamo nava ikaaiyaka go, tayamo nava geya isowoduwoita. Ago tutayana isowóduwo, tuta kaakupina tauna bei ilovina. 11 Iya go woiwoiyana boi ma yawoina, ame tuta ikámasa go, nava bei ikaluvilamna ima. Tauyana tolovina ainima aitonina go, tolovina ainima aiyuwo yaidi goi bei ima go, niga bei ivailai vata.
12 Go ana dagulayao yawou kuugitedi moe tolovina yawou.† Dan 7:24; Nuw 12:3. Nava idi kaba lovina geya sibabaneyeta, go sem nava bei idi lovina tolovina nakae sibabane bei itoboinedi tuta kaakupina toina goi silovina woiwoiyana taiyao. 13 Amo tolovinayadi idi nuwonúwana tayamo goi idi togaga be idi lovina madabokina sikaidamanedi woiwoiyana yaina. 14 Amo tauyadi woiwoiyana taiyao bei sispwagógana go, sivayaviya Lami yaina. Iya go Lamiyana tomoyamoya liliudi adi Tomoya be tokalibúbuna liliudi adi Tokalibúbuna† 1Ti 6:15; Nuw 19:16. be nakae senao taiyao sikaaiyaka, senaoyadi bogina iduduwedi, tauyadi ana kinavayao be nakae aba numisa. Moe pasina tauna tolovinayadi woiwoiyana taiyao bei itogagasavedi.’
15 Tuwaina aneroseyana kana,
‘Bwaeyadi bogina kugitedi kikidi goi vavina tomatagogoli iitusobu, e moe boda liliudi, dala liliudi, kantri liliudi be nakae aníyana liliudi.† Nuw 5:9, 7:9, 11:9, 13:7, 14:6. 16 Ago dágula yawou kuugitedi moe tolovina yawou go, woiwoiyana taiyao bei sitaoya, tomatagogoli sikaolilive. Konana be ana kwama liliudi bei sikabidi, e nima kaka ikaaiyaka. Aiyuwoina bei situsaoli nakae neta iwoina sikani go, luluna yeu goi sivakasave. 17 Moitamo nakae bei siguinuwe. Yaubada bogina nuwodi isanayatoidi bego ina nuwonúwana siguinuwe. Ame nakae: Idi nuwonúwana tayamo goi idi lovina woiwoiyana bei sivini. Bei iilovina ana kadókana Yaubada ina nuwonúwana bogina sisowóduwo nakae latuwona. 18 Iya go vavinayana kugitegite moe asa gagaina poyapoya ana tolovina madabokidi iloviinaedi.’
‡17:1 Tomatagogoli: Nakona ame livalakaibala asa Babiloni manuna unana asayadi idi sinapu igoyo toina. Aiyuwoina nakona ame vavinayana aba kinana tomota liliudi neta Yaubada siikatae, tauna yaubada polapola yaidi sisakululu.
†17:1 Yer 51:13.
†17:2 Ais 23:17; Yer 51:7.
†17:4 Yer 51:7.
†a17:8 Pil 4:3; Nuw 3:5, 13:8, 20:12,15, 21:27.
†b17:8 Nuw 9:1-2,11, 11:7, 20:1.
†c17:8 Sam 69:28.
†17:15 Nuw 5:9, 7:9, 11:9, 13:7, 14:6.