1-2 E semao, ida Tomoya Yeisu Guyau ina kaluvilamna be ada lamgógana Tauyana yaina manudi ima kawanoi tayamo.† Mak 13:27; 1Tk 4:15-17. Neta tomota maniyedi siwo valayovayova sivinimi kadi, ‘Tomoya ina takínona ana maliyalina bogina ima’, e kakawanoi yaimi moe valayovayovayana manuna taabu mainao nuwomi siwowōwana be nakae taabu atemi siyovayōva. Nakona silatuwokoimi bego valayana Baloma Kimaasabaina goi ima o bego kai kalatuwokoidi o bego kai leta kaetune ina tauyadi yaidi go, manuna taabu nuwomi siwowōwana be nakae taabu atemi siyovayōva. 3 Geya tayaamo kaga goi tomota kotaagonēdi sikatuubaumi. Mainao tomota liliudi bei sivakaleya Yaubada yaina be nakae koroto kapipiilovaina toina bei isowóduwo, tauyana inonoina ina vailai vata manuna. Ame dogoiyadi bei sisowóduwo namliyeta baige ida Tomoya ina takínona ana maliyalina bei ima. 4 Kaga liliuna tomota sivaayokoidi yaubadao o ava kaba sakululu, e tauyana bei ivakaaleyedi go, toinina ikilagasi dogoiyadi liliudi yaidi. Tauna bei isiu Yaubada ina Vada Kimaasabaina goi itusobu go, toinina italavaite bego kina anetava Yaubada toina.† Dan 11:36; Isi 28:2.

5 Manakae? Bogina konuwoilave boi moeko goi taiyao takaaiyaka amo dogoiyadi bogina alatuwokoimi? 6 Tuwo ame tuta tokapipilovayana ina sowóduwo ana kaba sanaboda bogina kooyagoi. Ina sanabodayana bego ina tuta Yaubada bogina iupeupe goi bei isowóduwo. 7 Ame moitamo. Kina tokapipilovayana ina togaga poyapoya ame goi bogina iepaiseewegau go, tosanabodayana nava ikaaiyaka, tauyana kapipiilovaina isaanabode ana kadókana Yaubada ima tosanabodayana ikabi. 8 Ikabi ikavava, e tuta amo goi kapipilovainayana bei ikaiwoduwe go, ida Tomoya Yeisu bei ibobwaramo,† Ais 11:4; Nuw 2:16, 19:15. e kapipilovainayana ikaumate. Moeko goi ida Tomoya ina sowóduwo pasina kapipilovainayana ina togaga bei ikavava toina. 9 Go tutayana kapipilovainayana bei isowóduwo ima, e Kaleya ina togaga goi aba kinana polapola kainaaopaidi iguinuwedi bego tomota ikatubaudi, e sinuwonúwana Yaubada goi ima.† Mad 24:24; Nuw 13:13. 10 Aiyuwoina ina guinuwa liliudi goyogoyoidi goi tomota bei ikatubaudi. Amo tomotayadi bogina vailai ana kenao goi sinonoina unana Nanamsa Mooitamoina sikatae go, amo Nanamsayana goi adi yava itoboinedi sibabane! 11 Moe pasina Yaubada pola ana kabikáwana tomota nukotodi goi isanayato, ipaisewa bei tomotayadi adi polayoomanaidi, e pola sinuumisedi. 12 Moe iguinuwe bego itoboine madabokidi itakinoidi toogoyoidi liuna manuna unana geya latuwodi Nanamsa Mooitamoina sinumise, go sem sinapu goyogoyoidi siuyaaonedi.

13 E kai go itoboinema tuta liliuna kakaauyagu Yaubada yaina komi manumi, komi semao Tomoya imatakooiyemi. Ima kauyaguyana bego Yaubada boi komi guna keuwokumgo‡ Keuwokumgo: 2 Tesalonáika kopi maniyedi kadi, ‘Ana kaba vatowo.’ Moe ana yagoina nakae Paulo ina paisewa ana kaba vatowo Tesalonáika goi. da Tesalonáika yaidi, e ikabimi toinina umana ami yava manuna ame nakae: Baloma Kimaasabaina ikimasabemi Yaubada umana be nakae Yaubada ana Nanamsa Mooitamoina bogina konumise. 14 Moe pasina Yaubada iduduwemi. Vala Dedevina boi katalavaite yaimi go, ima talavaitayana goi Yaubada iduduwemi ami yava manuna, e bei itoboinemi ida Tomoya Yeisu Guyau ana káeyana tomoeeyalina kosiuko.

15 Semao, tomotayadi sipooikíkina ima vatulúkwana kogiiminove bego sisobale, tauna imi numisa goi koovadōkana be nakae ima vatulukwana dokanayana ima bóbwara goi o ima leta goi koyoisikaavatēdi.

16-17 E ida Tomoya Yeisu Guyau be nakae Yaubada Tamada bei atemi sivapatupatudi be nakae imi guinuwa dedevidi liliudi goi be nakae imi bóbwara liliudi goi sikitogagemi. Tamadayana imatakoiyeda be nakae ateda ivapatupatuvataedi go, ina kanuwóiya goi yawoida vata bei ivinida. Go moe ikaatotule kita talootutae.