1 Nafuhetane, nasaraheta, nagri'ma nagu'afima navenesigena Jiu vaheku'ma Anumzamofontega nunamuma nehuana, zamahokeno zmaza hanigu nentahue. 2 Na'ankure nagra anage hu'na Israeli vahekura huama nehue, Anumzamofona antahimiza avesi avu'avara hanavetiza nevaririzanagi, Anumzamofo antahizana antahi amara hu'za novaririze. 3 Na'ankure Anumzamofo fatgo avu'avazankura nohakrazanki, zamagra'a zmavuzmavateti fatgo zmavuzmavara erifore hugahune nehu'za, Anumzamofo fatgo avu'avazamofo agorga'a nomnize. 4 Na'ankure miko kasegemofona, Kraisi'a emeri knare huvgarene. E'i ana agafare iza'zo Agrite'ma zamentintima hanamo'za Anumzamofo avurera fatgo vahe manigahaze.

5 Fatgo avu'avazankuma Mosese kasegemoma hu'nea kante krente'neana, Ina ne'mo kasegemoma hu'nea kante fatgo avu'avazama hanimo'a, ana fatgo avu'avazanteti asimu erigahie hu'ne. (Lev-Pri 18:5)

6 Hu'neanagi amentintiretima Anumzamofo avure'ma fatgo huno mani'zankura anage hu'ne, iza monafinka vuno Kraisina tazahinogura avrefenkamia tamigahie hunka kagu'afina ontahio. 7 Hifi iza fri vahe kerifina uramino, Kraisina fripintira avreno mrerigahie? 8 Hu'neanagi na'ane huno hu'ne? Kemo'a tvaonka'are me'ne, e'i ana kea kagipine tumo ka'afine me'ne. (Diu-Kas 30:12-14) E'i ana kea amentinti kemofonku tagra huama nehune. 9 Hagi tamagra'ma tamagipinti huama huta Jisasi'a Ramo'e nehutma, Anumzamo fripinti Jisasina azeri oti'ne huta tamagu'areti tamentinti hanageno'a, tmaguvazigahie. 10 Na'ankure tamagu'areti tamentinti hazageno, Anumzamo'a fatgo vahere nehigeta, tamaginuti huama nehazageno, tamahokera nehie. 11 Avontafemo hu'nea kante, Iza'o Agrite amentinti hanimofona agaze huontegahie hu'ne. (Ais 28:16)

12 Na'ankure mago'zamo'a Jiu vahe'ene megi'a vahe'mokigizmi amu'nonpina ruzahura osu'ne. Magoke Ramo ana mikamokizmi Rana mani'neno, Agritegama kezamatiza vahera rama'a asomu hunezmante. 13 Na'ankure iza'zo Ramofo agima ahesaza vahera zmaguvazigahie. (Jol 2:32)

14 Hagi zamentintima hunontesamoza, inankna hu'za zmaza hinogura antahigegahaze. Hagi inankna hu'za Agri agenkema ontehinesu'za zmentintia hugahaze? Hagi agenke ama huamahu vahema omninesigeno'a, inankna huno antahi amara hugahie? 15 Hagi kema erino ome huama hu vahema humaozmante'snage'za inankna hu'za mono kea huamara hugahaze? Knare musenkema eri'zama aza vahe'mokizmi zmagamo'a hentofaza hu'ne huno Avontafepi krente'ne. (Ais 52:7)

16 Hu'neanagi ana maka vahe'mo'za knare musenke e'ori'naze. E'inanku kasnampa nemo' Aisaia huno, Ramoka iza ama ana kemofontera amentintia hugahie hu'ne? (Ais 53:1) 17 E'ina hu'negu vahe'mo'za ke nanenke nentahizageno zamentintia erionetie nehaze. E'i ana kea Kraisi knare musenke me'ne.

18 Hu'neanagi nagra amanage hu'na nehue. Tamage Israeli vahe'mo'za ana nanenkea antahinafi? Izo zamagra antahi'naze. Anumzamofo avontafepi hu'neana, zmagenkemo'a ama mopamofona maka kaziga vuno eno hu'ne. Zamagri kemo'a maka kokankoka vuno eno hu'ne. (Sam-Zga 19:4)

19 Mago'ane nagra tamantahinegoe, Israeli vahe'mo'za antahinira osu'nazafi? Kotazana Mosese'a amanage huno hu'ne, Nagra megi'a vahekuke hanugenka knive regahane. Antahizazmi omnenea vahekuke hanena, krimpa hegahie hu'ne. (Diu-Kas 32:21)

20 Hagi Asaia'a hakavetino anage hu'ne, Nagrikura nohakraza vahe'moza, nagefore hu'naze. Nantahi nogaza vahete Nagra'a eama huge'za nenagaze. (Ais 65:1)

21 Hu'neanagi Israeli vahekura amanage huno Anumzamo'a hu'ne, Nagra hakare zupa zamavrenakura nazana rutaneroanagi, ke'ni'a zamefi hunenamiza namagera nontazage hu'ne. (Ais 65:2)