1 Havigea nosuanki, Kraisimpi tamage hu'na nehue. Ruotage Avamumo ene nagu'a kenegena ama' nagunagesareti ama kea tamage nehue. 2 Tusi'a nasuza enerugeno, tumo niamo'a nata krivava nehie. 3 Na'ankure, nagrima navesiana Anumzamo'a Jekopu nagara zmavresiegu navenesie, Kraisima nagri navesima avaririnigena, nagra nunamuna hanenkeno Agra'a vahepintira nahe natitrena, nenafu'za nagri nona erigahaze. 4 Zamagra Israeli vahera Anumzamo'a zamavrege'za Agri mofavregna hu'naze. Anumzamo zamagripi masazama'a eri ama hu'ne. Agra'a huvempa huno, Agrane zamazeri hagenerefino kasege'a zamine. Agra'a monoma huntesaza kankmuna neramino, knare zama erisuna zanku'ma huvempa hurantenea tamine. 5 Zamagri nezmagehoma zmagima me'nea nagapinti Kraisi'a efore hu'ne. Kraisi'a, Agra Anumza mni'neno makazamofo aseni mni'negu maka knafina, Agrike agi'a hentesga huvava hugahune! Tamage.

6 Anumzamo'ma Israeli vaheku'ma huvempa huzamante'nea kea eri raga orenefi? I'o, na'ankure makama Israeli vahepima fore hu'naza vahe'mo'za Anumzamofo vahekera omani'naze! 7 Abrahamumpinti fore hu'naza vahe mani'nazanagi, e'i ana zamo'a zamazeri tamage Abrahamu mofavrea nose. Na'ankure avontafemo huno, Abrahamu'a mago'a mofavre'zga zamante'neanagi, mofavreka'a Aisakimpinti kagri vahera fore hugahaze huno hu'ne. (Jen-Agf 21:12) 8 E'i vahe'mota kasenentona kna huno Abrahamu ksezmante'nea mofavremo'za, ana miko Anumzamofo mofavregera omni'naze. Hagi Anumzamoma huvempama huzmante'nemo'za, Abrahamu mofavrea mni'naze. 9 Na'ankure Anumzamo'a huvempa huno, Ama ana knare'ma anaga'a kafurema esu'na, Sera'a ne'mofavre kasentegahie hu'ne. (Jen-Agf 18:10) 10 E'i ana mofavrea nerageho Aisakie. Hagi Aisaki'a, Rebeka ara erigeno, kugave'za mofavre kaseznantene. 11 Zanagrira kase ozanantenegeke, havizane knare zanena osu'nakeno, ko Anumzamo'a nezanrerana kea asmine. (E'i ana kemo huama huno, Anumzamo agra'a erizakante vahe'mokizimia ko huhamprizmantene. 12 Hianagi knare avu'avazantera keno kea osu'ne.) Neznarerana Anumzamo asmino Nempu'amo ngana'amofo katoza humigahie huno hu'ne. (Jen-Agf 25:23) 13 Anumzamofo avontafepi krente'nea kante, Jekopuna navesinentuanagi, Isona navesra hunentoe hu'ne. (Mal 1:2-3)

14 Hagi na'ane hugahune? Anumzamo'a fatgozana nosie huta hugahuno? I'o anara osugahie! 15 Na'ankure Anumzamo'a amanage huno' Mosesena asmi'ne, Izano narimpa fru huntenaku humofona, narimpa fru hunentena, izano nasurgintenaku humofona nasurginentoe hu'ne. (Eks-Uti 33:19)

16 E'ina hu'negu Anumzamo'a vahe'mota tavesite'ene erizanterompge, Agra'a avesizante asuragirante'ne. 17 Na'ankure Anumzamofo Avontafepina Anumzamo'a Feronkura anage huno asamine, Nagrama huhamprigantogenka kagrama mani'nanana, agafa'a me'nerere. Na'ankure Nagri hankavemo'a kagripi eama nehanigeno, Nagri nagimofona huama hu'za kokankoka vanageno, ra huno vuno'eno hugahie hu'ne. (Eks-Uti 9:16)

18 E'ina hu'negu Anumzamo'a izano asuraginte'naku himofona asuraginenteno, izano rimpama eriginakuma himofona erinegie.

19 Tamagra anage huta nagrikura hugahaze. Na'a higeno Anumzamo'a tamagrikura keontahi vahere huno nehie? Agra hugahaze huno hiazana tamagra nehazafi? 20 I'o, e'i anahukna kea osiho. Tamagra izagata, vahetafamota Anumzamofona tro huhaviza hurantenane huta nehaze? Tro'ma huntenesia zamo'a, tro'ma huntenesimofona, nahigenka amanahuknara hunka trohunantenane huno huntegahifi? 21 Mopa kvoma tro nehanimo'ma, moparetima kvoma tromahunaku'ma hanuno'a, amane magoke moparetira konariri zama ante kvoa tro nehuno, havizama haniazana ante kavo tro osugahifi? 22 E'i ana kanteke Anumzamo'a, rimpahezana eriama nehuno, hankave'a eriama hugahie. Hianagi Agra ra zampi akoheno mni'neno zmazeri haviza hania vahekura zaza knafina zmaveganente. 23 E'i ana zama hu'neana, Agri'a mrerinea masa'zama eriama huno asunku'ma huzmantenea vahetera eriama hu'ne. E'i anazana ko Agra'a retro huzmante'nemo'za erigahaze. 24 Jiu vahepinti'ene, megi'a vahepintima zmavaretere hunefina, tagranena anampina mani'none. 25 Hoseama kasnampa kema hu'nefina, Ru vahekura Nagri vahere nehuna, navesi'ozmantenesua vahekura navesizmantegahue huno hugahie. (Hos 2:1, 23) 26  E'ina hanugeno, tamagra Nagri vahera omni'naze huno zmasmi'nesia kumatera, ksefa huno mni'nea Anumzamofo mofavre'rmine hu'za hugahaze. (Hos 1:10)

27 Kasnampa ne'mo Aisaia Israeli vaheku huno, Israeli vahe'mo'za rama'a hu'za hagerinkenafi kasepankna hu'nazanagi anampinti osi'amokizmi Anumzamo'a zmaguvazigahie. 28  Na'ankure Ramo'a fatgo avu'avazampi ame huno maka mopafi vahera refko huzmantegahie. (Ais 10:22, 23)

29 Ko'ma Aisaia hu'nea kante, Hihamu'ane Ramo tagehe'mokizmia zmahokeno osia zmatrege'za mni'naze. Anama osuneresina Sodomune Komora kumate vahe'mo'za fanene huvgare'naza kna huta fanene huvgarontesine. (Ais 1:9)

30 Hagi na'ane huta hugahune? Megi'a vahe'mo'za Anumzamofo avufi fatgo vahe mani'zankura nohakazanagi, zamentinti hzageno Anumzamo'a fatgo vahe mani'naze nehie. 31 Hu'neanagi Israeli vahe'mo'za fatgo vahe manisunegu mraguzatiza kasegemofo nevaririzanagi, ana zamofona nena'a eriforera osu'naze. 32 Na'a hige'za anara osu'naze? Na'ankure zmagra zmentintia osu'naze. Hianagi eri'zama erisazazanteti fatgo vahera Anumzamofo avurera manigahune nehu'za, agigozmi havereti tanafa nehaze. 33 Anumzamofo avontafepi krenteneana anage hu'ne, Keho, Saionia vahe'mokizmi zmagigozmi have ante'noankino, vahe'mo'za zmagigo zmite'za tanafa hugahaze. Hagi iza'o Agrite amentinti hanimo'a agzegura osugosie hu'ne. (Ais 8:14, 28:16)