1 Jisasi'ma agonaregati'ma eramige'za, tusi'a vea krerfamo'za amage vu'naze. 2 Mago fugo namure'nea ne'mo, avuga rena emereno amanage hu'ne, Ramoke, Kagrama naza huku'ma nehanunka, Kagra amane nazeri avusese hugahane. 3 Jisasi'a azana antegantuteno ana ne'mofo avufare avako nehuno, anage hu'ne, Nagrima navesiana, fugo namunka'amo'a amane hugahie. Higeno ame huno ana fugo namumo'a afe higeno, avusese hu'ne. 4 Jisasi'a ana nera asami'ne, Kagra kva hunka, ama zankura mago'mofona osamitfa huo. Hagi prisi nete vunka, kvufa ome averinka ofa erinka vunka, Mosesima hu'nea kante antenka zamagrite eri ama huo.

5 Jisasi'ma Kapenium kumate uhanatigeno'a, 100ti'a sondia vahe'mokizmi kva ne'mo (sensurien), Agrite eno aza hinogu antahige'ne. 6 Agra anage hu'ne, Ranimoke, eri'za ne'ni'a, avufamo'a frigeno, tusi'a atazampi nonte maseno mani'ne. 7  Knareki'na vu'na ome eri so'e huntegahue. 8 Hianagi ana sondia kva nemo'a kenona'a anage hu'ne, Ramoka, nagra knarera osu'noankinka, eno hanugenka nagri nompina omegahane, hanki amane ke'age nehugeno, eri'za ne'nia knare hunteno. 9 Na'ankure nagra'nena mago kva vahe'mofo hinkanaga mani'nogeno, sondia vahe'mo'zanena nagri hinkanaga mani'nazage'na, mago'mofonku hu'na vuo hugeno, agra nevie. Mago'mofonku eno hugeno agra ne-e. Hagi nagrani'a kazokzo eri'za neku, amana huo hugeno, agra anazana nehie. 10 Jisasi ana ke nentahino'a, tusi antri nehuno, amage'ma vu'naza nagara anage huno zamasmi'ne, Nagra tamage huna neramasmue, mago nera Israeli vahepina amanahu hanave amentintine nera, Nagra onketfa hu'noe. 11  Amanage hu'na neramasmue, hakare'a vea'mo'za zge nehnatia kazigati'ene zge fre kazigati'ene eri hantge'za Abraha'ene Aisaki'ene Jekopu'ene monafina muse nehu'za, ne'za nene'za manigahze. 12  Hu'neanagi rama'a zamagri kumarema hunoma huzmantenea Israeli vahe'mo'za, tusi'a kumazu hanimpi megi'a zamatresage'za, anantega manine'za zavira nete'za, zamavera ani kreki hugahaze. 13 Anante Jisasi'a 100ti'a sondia vahete kva nera anage huno asami'ne, Kagrama kamentinti hanku kagrira kaza hugahianki amne vuo huno humanentegeno'a, ana kna fatgore eri'za ne'amofona kri'amo'a atrente'ne.

14 Pita nompi Jisasi'ma umrerino omekeana, nenemo ara avufa amuho amaho kri erino mase'negeno omege'ne. 15 Ana a'mofo azante ome avako higeno, avufa amuho zamo'a atrentegeno, otino neza tro huno zami'ne.

16 Kinagama segeno'a, hakare havi avamutami zamagu'a fre'nea vahe zga zamare'za Agrite e'naze. Agra ana havi avamura kereti ahenati netreno, maka krima erinaza vahera zamazeri knamare'ne. 17 Amana zana kasnampa ne'mo, Aisaia korapa hunte'nea kemofo avufa'a efore hu'ne. Agra kumitia e'nerino kritia eri atrerantene hu'ne. (Aisa 53:4)

18 Anante Jisasi'ma kegeno tusi'a vahe'mo'za Agrira azeri kagigeno'a, Agra zamasmino timofo kantu kaziga viho huno amagema nentaza disaipol nagara huzmante'ne. 19 Anante magora kasegere ugagota hu'nea ne'mo Agrite eno, Rempi hurami nere, inantego vnanana, nagra kamage ante'na vugahue. 20 Jisasi'a amanage huno agrira asami'ne, afi kramofona mopafina kerigama'a me'ne, hare'za vanoma nehaza namamofona noma'a me'ne. Hagi Vahe'mofo Mofavre'mofona asenima anteharege huno masesia zana omane'ne. 21 Jisasi amagema nentaza disaipol nagapinti mago zamimo anage hu'ne, Ramoka natrege'na pusazana nenfana ome asenteteno huno hu'ne. 22 Hianagi Jisasi'a anage huno asami'ne, Nagri namage eme nentenka, atrege'za fri kerfamo'za, zamagri'a fri kerfa asenteho. * avamupima frinaza vahemoza, ama avufgarema fri'nea vahera asentehogu hu'ne.

23 Jisasi'ma votifima mrenerige'za, Agri amagema nentaza disaipol nagamo'za avaririza vu'naze. 24 Nevzageno tusi'a zaho komo ana tirupinti erira huteno, ana timo'a eri kranto kranto huno votia refite'za hu'ne. Anama nehiana Jisasi'a mase'ne. 25 Hige'za amagema nentaza disaipol nagamo'za, Agrite eza eme azeri oneti'za anage hu'naze, Taza huo Ramoka, Hago tagra friza nehune. 26 Hianagi zamagriku anage hu'ne, Nahigetma korera nehaze, onensa tamentintine nagara? Nehuno Agra anante otino hanave ke huno ana zaho ene, tinena rurava huo higeno, kranto krantoma nehiretira, arane'ne. 27 Hige'za ana disaipol nagamo'za tusi zamagogogu nehu'za, zahomo'ene, timo'ene ke'a erizafa nehianki, ama inankna vahere? hu'naze.

28 Jisasi'ma timofo kantu kaziga Gadara uhanatigeno'a, hankaro'mo znagu'a fre'negeke matipi nemani'a netremoke, Jisasi'ene tutagiha hu'na'e. Zanagra tusi hamponatikeno vahe'mo'za koro hu'za ana kantera novazane. 29 Zanagra tusi kezatike, Anumzamofo Mofavre'moka, nago'azana huorantenka tataro. Kagrama amafima e'nanana tagri tazeri haviza hunaku e'nano, knama osu'nefina? 30 Mago'a ogantu'agna rama'a afu zgamo'za ne'za nene'za mani'naze. 31 Anante ana hankaromo'za anage hu'za antahige'naze, Tagri'ma tahe natitresunka, hurantegeta antu afu'zgafi uframneno. 32 Hazageno Jisasi'a anage hu'ne, Viho! Hige'za atiramiza afu'zgafi ufrageno, ana afu'zgamo'za zamagage zamagage hu'za zaveniteti tirupi tkaure'za ti nakri'naze. 33 Unefrige'za afu' kva vahe'mo'za zamaga re'za vu'za kumate uhnati'za, anama hu'naza zamofo naneke vea' ome nezmasmi'za ana netremokizni znagu'afinti'ma hankro'mo'za atirami'zama afu'mofo agu'afi ufre'zama fri'naza naneke zamasmi'naze. 34 Anante ana kumapinti vahe krerfamo'za eri hantge'za Jisasinte e'za, eme'ma nege'za, ama kzigatira ko atrenka vuo, hu'za hunte'naze.