1 Jisasi'a anage huno mago'ane zamasmi'ne, rumofona refako huo zamantenkeno, anahu kna huno tmagri e'nena refako huormanteno. 2  Na'ankure rumofoma refako huntesante, ana avamente Anumzamo'a kagrira refako hugantegahie. Kagrama rumofoma refakoma hanana avamente, anazanke huno kagrira refako hugantegahie. 3  Nahigenka osi zama negafu avufima me'neazana negenka, kagri kavufima ra zafa rampama me'neana nonkane? 4  Na'ane hunka negafunkura, natregena osi'zama kavufi me'neana eri traneno nehane, kagri kavufi'ma ra zafa rampama me'neana? 5  Kagra tavre vahere, esera ra zafa ranpama kavufi me'neazana eriatrenka kavua keama hutenka, ete negafu avufi me'nea osi'zana eri atregahane.

6  Tamagra ruotage hu'neniazana kramofona omiho, hiro zantmi'a afumofona omiho, zamagra eri'za zamagianu rehapa atiza eri haviza hugahaze. Arukrehema hanuno'a kaheno traga trogo hugahie.

7  Antahigesankeno anazana kamigahie, hakesunka kefore hugahane, kafante vagre vagre hanankeno, anagi kantegahie. 8  Na'ankure maka vahe'mo'za antahima nege'za e'nerize. Iza'o, hake'noma vanimo'a, keno eri fore hugahie. Kafante vagre vagre nehnimofona, anagi antegahie. 9  Tamagri amu nompinti magomofo ne' mofavremo, breti eri namio hanigetma, havea knare eri amigahzafi? 10  Hifi noza eri namio hanigeno'a, agra knare osifavea eri amigahio? 11  Hianagi tamagra havizama nehaze vahe'mota antahi'naze, mofavre'tmima knare muse'zama ami'zana, monafima nemnia Neramafa'a, knare muse'za, iza'o Agri'ma antahigemofona rama'a zantmi nemie! 12  vahe'mo'zama maka zampima kagrima, hugantesaze hunka nehnana avu'avara, kagra ana avu'ava zamagrira huzmanto. Na'ankure e'i kasegene kasnampa vahe'mokizmi kenena eri knare hugahaze.

13  Tamagra osi kafampinti ufreho, na'ankure fananehu kantema vu'nea kamo'a, ra huno fru hu'ne. Ana kantera rama'a vahe'mo'za amage ante'za nevaze. 14  Ana hianagi asimu eri kumate vu'nea kafamo'a osi higeno, ana kamo'a kakanino amuho hu'nege'no, osi'amoza ana kana nege'za nevaririze.

15  Kva hiho havige kasnampa vahekura, sipisipimofo avufa erihankre'za egahzanagi, zamagu'afinka afi kra egahaze. 16  Kagrama zamagenka, antahinka zamagrima hananana, rgama rentesare kegahane, krepia ave'ave zafafinti noragize, hifi ave'ave trazampinti fikia tagigahazo? A'o, anara osugahaze. 17  Anahu kante hakare Knare zafamo'za, knare rga renetageno, havi zafamo'za havi rga renentaze. 18  Knare zafamo'za havi rga oregahaze, ete havi zafamo'a knare zafa rga oregahie. 19  Miko zafamo'za, knare rga reontesiana, antagiza matevu'za tevefi atregahaze. 20  E'ina hu'negu ana kante, zamavu'zmavama hanare zmageta antahita hugahaze.

21  Mago'a vahe'mo'za Nagriku, Ra Anumzanti, Ra Anumzantie nahaza vahe'mo'za, mona kumapina ovugahaze. Hianagi iza'o monafi nemnia Nfanimofi avesi'ma nevariri'samo'za ufregahaze. 22  Ana knazupa rama'amo'za anage hu'za Nagrikura hugahaze. Ra Anumzane, Ra Anumzane, Kagri kagifina mono nanekea hu'none, Kagri kagifina havi hankrora hunenteta, kaguvaza (mirakol) hu'nonane hanagena, 23  ana knazupa Nagra anage hu'na zamasmigahue, tamagra kasegeni'a amage'onte vahe mani'nazagena tmatahina kena osunoanki, maniganeho hu'na zamasmigahue.

24  E'ina hu'negu, iza'zmo ama keni'a nentahi'za amage nentamo'za, knare antahizane ne'mo hanave nentake havemofo, agofetu nona kiankna nehie. 25  Kora nerigeno, tina hageno ne-egeno, zaho kora atuno ana nona eri tagna vazinaku ana'ana hianagi, ana nona eri tagna ovazi'ne, Na'ankure keri kafino tamino havemofo agofetu nona ome ki'ne. 26  Hagi iza'zmo, ama Nagri naneke nentahiza amage onte'samo'za, negi vahe'mo noma'a ksepampi kia kna hugahie. 27  Kora arigeno, tina hageno egeno, zahomo'ene huno ana nona eri traka hutregeno asaga huramigeno, razampi tagana taganu vazi'atre'ne.

28-29 Jisasi'a ana naneke zamasmi vgarege'za mika vahe anante atru hu'namo'za antahi'nazana, kasegere ugagota hu'naza vahe'mokizmi avamente ozmasmi'ne. Rankva vahe'mo rempi hunezamia kante, hihamu'ane naneke nehige'za nentahi'za muse hunente'za, hakare zamagesa antahi'naze.