1 Votifima mareriteno ti taka heno kantu kaziga Agra'a ran kumate vu'ne. 2 Anama hutege'za vahe zgamo'za agamo fri'nea nera sesenku hu'za erizafa hu'za Agrite e'naze. Jisasi'ma zamagri zamentintima negeno'a, korera osuo mofavre'nimoka, kagri kumira hago eri atroe. 3 Mago'a kasegere ugagota hu'naza vahe'mo'za, zamagra zamagra anage hu'naze, Amana ne'mo'a Anumza'mofo huhaviza hunente. 4 Jisasi'a zamagrama haza zamuzma negeno, anage hu'ne, Nahigetma kefo antahintahia tamagu'afina nentahize? 5  Inanke'mo oza hugahie, Kefo zanka'a eri ataroe hanua kemopi, otinka vuo hanua kemo'e? 6  Vahe tmamo'na mopafi mani'nena nagra hihamure vahe'mokizmi kefoza eri fanane huga vahe mani'noanki'na, tameri ha'nena kegahaze, huno nehuno rukrahe huno, ana agaza sti'nea ne'mofonku, Otinka sesenkuka'a erinka nonka'arega vuo huno higeno, 7 anante otino noma'arega vu'ne. 8 Ana'ma hiaza vahe'mo'za nege'za, zamagra tusi kore nehu'za, Anumzamo'ma e'inahu hanave'ma Jisasima ami'neazankura, Anumzamofo agi'a ahesga hu'naze.

9 Ananteti Jisasi'a nevuno, mago nera agi'a Matiu'e nehaza ne' takisi zago zonegi'za onensa nompi mani'negeno omegeno, Nagri namage eme anto, higeno agra otino amage vu'ne. 10 Jisasi'ma vuno Matiu nompi neza ome nenege'za, rama'a takisi zagoma zonegiza vahe'ene, kumi vahe'mo'zanena e'za Jisasi ene amage'ma nentaza disaipol naga'ane kave eme ne'naze. 11 Ana'zama farisi vahe'mo'za nege'za, amage'ma nentaza disaipol nagara anage hu'za zamantahige'naze, nahigeno tamagri rempi hurami ne'mo'a, takisi zago zogi naga'ene, kumi naga'enena ne'zana nene huza zamantahige'ne? 12 Jisasi'ma nentahino'a amanage hu'ne, Kri'zamima omane'nesia vahe'mo'za tusa netera ovugahaze, hagi krima eri nesaza vahe'mo'zage tusa netera vugahaze. 13 Jisasi'a zmasamino, vutma ome zaganeta antahiho ama kemo'a na'ane hu'nefi, Nagrira rumofo asuragintezanku navenesie, hagi (ofagura) kresramangura nave'nosie. a'ankure Nagrama e'noana, fatgo vahe zamagi huku ome'noe, hagi kumi vahe zamagi hanuge'za, zamagu'a rukrahe hihogu e'noe. (Hos 6:6)

14 Hianagi Jonima amage nentaza disaipol naga'mo'za Jisasinte e'za, nahigeta tagrane, Farisi vahe enena ne'za a'o nehunke'za, Kagri kamage'ma nentaza disaipol nagamo'za, ne'zana a'o osu'a nenaze? hu'za antahige'naze. 15 Jisasi'a zamagriku anage hu'ne, Aravema hute'ma kenaku eme atruma hu'naza vahe'mo'za, aravema husia ne'ma zamagranema maninesige'za zamasunkura osugahaze, tamagefi? Hu'neanagi mago kna ne'eankiza aravema hunaku'ma hania nera, zamagripintira avaretrete'za, anante zamagra nezana a'o hugahaze.

16  Mago'mo'a kahefa tvarave korapa kenarera erinteno ohatigahie. Anama antenoma hatisia kenamo'a ampimpi huno eri tagato hura hugahie. 17  Ana nehuno vahe'mo'a kahefa wainia, meme akruteti tro hu'nea atafa waini tafempina tagi ovazigahie. Na'ankure meme akaruteti trohunea atafa tafemo'a, pro huno wainimo tagisigeno, ana tintafemo'a haviza huzanku, kahefa wainia kahefa meme akruteti tro hunte tafempi tagi vazisigeno, taregamoke knare hugaha'e.

18 Ana kema nehigeno, mago ugoteno keaga nehia ne'mo eno, Agrite eme kepri nehuno, anage hu'ne, Mofanimo'a mensi fri'neanki, enka kza agrite eme antegeno, agra otino asimu erino manino. 19 Higeno Jisasi'ene Agri amage nentaza disaipol naga'mo'za otiza ana ne' avariri'za amage vu'naze. 20 Higeno mago ara korankri erino 12fu'a zgegfu maninea a'mo, Jisasi amefi eno zaza kena'amofo atupa'are eme avako hu'ne. 21 Na'ankure agrama agesama antahiana, nagra magoke'zana Agri zaza kenarafante azeri sugeno'a, kri'nimo'a atrenantegahie huno agu'afina antahi'ne. 22 Hianagi, Jisasi rukrahe huno negeno amanage hu'ne, Mofani'moka korera osuo, kagrika'a kamentintimo kazeri knare hie, nehigeno ana kna fatgo'are ame'ama huno ana ara kri'amo'a, so'e hunte'ne.

23 Jisasi'ma vuno ana ugoteno keaga nehia kva ne'mofo nompima ufreno, uvire tafema neraza vahe'ene, zavisu krasu nehu'za zamasuzampi mani'naza vahe krerfa ome nezmageno, 24 amanage huno zamasmi'ne, Atretma eviho, na'ankure ama mofara ofri'neanki, amane avu mase'ne. Anagema hiazanku Agrira tusiza hu'za kiza zokago ke hunte'naze. 25 Hianagi, ana vahe krerfa'ma huzmantege'za megi'a vzageno'a, ana nomofo agu'afi ufrea zamo akoheno ana mofa'mofo azante azerigeno oti'ne. 26 Higeno anama hiazamofo agenke'mo'a, ana kaziga vuno eno huno hezgani'ne.

27 Ananteti Jisasi'ma nevigeno'a, znavu asu hu'nea netremoke avariri'ne nevuke kezatine, Deviti mofavre'moka kasuragiranto huke hu'na'e. 28 Ana nompima Jisasi ufregeke, ana zanavu asuhu ne'tremokea Agrite e'na'e. Jisasi'a amanage huno zanagriku hu'ne, Amana zana Nagrikura eriamane hugahie hutna, tanamentintia neha'o? Higene zanagra Agriku anage hu'na'e, Ozo Ramoka, 29 anante Jisasi'a zanavuragare avako nehuno, anage hu'ne, tanamentinti'ma haku anazamo'a tanavufare fore hugahie. 30 Higeno zanavurgamo'a hari hu'ne. Jisasi'a hanave zanavumro znanteno, mago vahe'mo'a atrekeno amana nanekea ontahitfa hino. 31 Hianagi zanagra atreke nevuke, ana nanekea ome hugantugma ana kaziga hu'na'e.

32 Hagi vu'za e'zama nehazana, mago nera havi hankaro'mo ke'a eritaganegeno kea nosia ne' avare'za Jisasinte e'naze. 33 Ana kefo hankro'ma ahenatitregeno'a, kema nosia ne'mo'a keaga hu'ne. Mika vea krerfamo'za zamagogogu nehu'za amanage hu'naze, amanahu'zana Israeli vahe'motafina korapara fore higeta onke'nonazane, hu'za hu'naze. 34 Hianagi Farisi vahe'mo'za amanage hu'naze, Jisasi'ma hankaroma ahenenatiana, hankromokizmi ugagota hankromofo (Satan) hankave'afi ana nehie hu'za hu'naze.

35 Ananteti Jisasi'a osi kumate'ene ra kumatera vano nehuno osi mono nompi rempi hunezmino, Anumzamofo mona kumakura mono nanekea nezamasmino, mika kri eri amane hu'ne. 36 Ana vahe krerfama nezmageno, Jisasi'a tusiza huno asunkura huzmante'ne. Na'ankure zamagra tusi negine'za zamaza osu'are, nefa omani sipisipimo hia kna hu'naze. 37 Ananteti Jisasi'a amage nentaza disaipol nagaku amanage hu'ne, Ne'zamo'a hozafina anareneanagi, eri'za vahera osi'a mani'naze. 38  Ana hu'negu anare'nea hozamofo nefa, Ramofo nunamu hutma antahigenkeno, mago'a eri'za vahera huzmantesige'za ome hamareho.