1 Jisasi'ma 12fu'a amage'ma nentaza disaipol naga'a ke hutruma huteno maka havi avamu ene krinema eritresaza hanavene hihamune zami'ne. 2 Hanki Anumzamofo Kumamofo huama nehu'za, kri vahe zmazeri knamarehogu huzmante'ne. 3 Agra anage huno zmasami'ne, mago zantfane hutma erineta oviho. Azompafi kupi bretifi zgofi tare kukena erinetma oviho. 4  Mago kumate'ma vutma mago nompima umrerinutma, ana nonte manineta, atreta vunakuma hanutma, atretma rankumara viho. 5  Inaregama vanagenoma vahe'mo'za ontamaresnageta, ana kumateti atreta vukuma hanuta, tmagiareti kugusopa rupopo hunetretma vinkeno, ana avu'avazama hanaza zamo'a hazenkefi manize hugahie. 6 Hanki anage'ma hutege'za, atre'za kumatamimpi vu'za eza nehu'za, knare musenke huama nehu'za, hakare kaziga kri vahera zmazeri knamare'naze.

7 Ana knafi Heroti'a rankva ne'mo, ana makaza fore hu'neazamofo agenke'a nentahino, antahintahi hakare hu'ne. Na'ankure mago'a vahe'mo'za mono ti frezamante Joni frinefinti oti'ne nehazageno, 8 mago'amo'za Ilaija efore hie nehazageno, mago'amo'za mago korapa kasnampa ne' fri'nefinti oti'ne hu'naze. 9 Heroti'a anage hu'ne, nagra Jonina ko agena akafri'noanagi, iza e'inahuzana nehige'na agenke'a nentahue? Anage nehuno, Herotia Jisasina kenaku hu'ne.

10 Aposolo nagamo'za vu'nazaregati ete ehnatiza, eri'zama eri'naza zamofo kea mika Jisasina eme asmi vgare'naze. Anante zamagrike zmavrege'za anampinti atre'za Betsaide nehaza kumate vu'naze. 11 Hianagi tusi'a vahe krerfamo'za Jisasi'ma vu'ne kema nentahiza avaririza vu'naze. Agra muse huno nezamavreno, Anumzamofo kumamofo ke huama huno nezmasamino, krizmima eri atrenogu'ma zmesi'nea vahe'mokizmi kria zmazeri knamre'ne. 12 Hanki kinagaseno hanima hu'za hiazanku, 12fu'a aposel nagamo'za e'za Jisasina eme asami'naze. Ama vahe krefa huzmantege'za tva'onte kuma tamimpina vu'za e'za hu'za mase nonku'ene, ne'za zimigu'ene ome hakreho. Na'ankure vahe omani kokampi mani'none. 13 Hianagi Jisasi'a anage huno zmasami'ne, tamagra nezana zaminke'za neho. Zamagra kenona hu'za, tagra rama'a nezana e'orinonanki, 5fu'a bretigi tare nozamegi huta eri'none. 14 Anampina 5 tauseni'a venene mni'naze. (Anampina a'nene mofavreramina ohamprine) Anante Jisasi'a amage'ma nentaza disaipol nagaku huzmanteno, zmasaminke'za 50ti'a refko hu'za mago mago kevufina manitere hiho. 15 Anama Jisasi'ma zmasamiaza hu'za amagema nentaza disaipol nagamo'za, ana maka vahera zmazeri atru hutere hige'za mani'naze. 16 Jisasi'a 5fu'a bretine tare noza'ene erino, monafi kesga huno negeno, Anumzamofo susu hunteteno, ana bretiramina eritamanasi zamizmi nehige'za, ana amagema nentaza disaipol nagamo'za eri'zami'naze. 17 Ana mikomo'za nazageno zamuma hutege'za, meama'a eritru hu'za 12fu'a eka eka kupi eriri'naze.

18 Mago zupa agraku Jisasi'a nunamu nehigeno, amagema nentaza disaipol nagamo'za, tva'onte mani'nazageno anage huno zmantahige'ne, Nagrikura veamo'za iza'e hu'za neheze? 19 Zamagra kenona'a anage hu'za hu'naze, Ti frente Joni'e hu'za mago'amo'za nehazageno, mago'amo'za Ilaija'e nehazageno, mago'amo'a korapa kasnampa ne' frinefinti oti'negahie hu'za nehaze. 20 Jisasi'a amanage huno zmantahige'ne. Hianagi tamagra iza'e hutma Nagrikura nehaze? Pita'a ana kenona huno, Kagra Anumzamo hugantegenka (tahoke henka tagu'vazine e'nana) Kraisige.

21 Hianagi Jisasi'a amana kea mago vahere hutma ozmasmitfa hiho huno hunezmante'no, 22 anage hu'ne, Vahe'mofo mofavremo'a ruzahu ruzahu knazampi unefresigeno, mono kva vahe'mozane, ugagota prisi vahe'mo'zane, kasegere ugota hu'naza vahe'moza, zmefi humiza ahesageno friteno, tagufa knare otigahie.

23 Anante Jisasi'a ana maka'mokizmigu anage huno zmasami'ne, iza'o namage'ma antenaku'ma hanimo'a, agra'agura age'neknino maka knafina keka zafa'a erino navaririgahie. 24  Na'ankure iza'o asimu'a eriso'e hu'naku hanimo'a, asimu'a atregahie. Hagi iza'o Nagriku huno asimu'a atresimo'a, asimu'a erigahie. 25  Mago vahe'moma ama mopafi zankuke nehuno, agra'a agu'amema atresiana, nankna so'eza erigahie. 26  Iza'o nagriku'ene keniagu'ene agazema hunante'simofona, Vahe'mofo Mofavremo'ma Agra'a masa'afine, Nefa masa'afine ruotge ankero vahe zgamofo masafinema esuno'a agrira eme agaze huntegahie. 27  Hianagi Nagra tamage hu'na neramasamue, amama otinazafintira, mago'amotma ofrinetma Anumzamofo kumara kegahaze.

28 Anagema Jisasima huteno, 8ti'a kna evutegeno, Pitama, Jonima, Jemisima, huno nezamavreno, agonarega nunamu hunaku vu'naze. 29 Nunamuma ome nehigeno, avugosamo'a ruzahu higeno, kukena amo'a tusi efe'nentake hu'ne. 30 Anantera ame huke tare netre Mose'ene Ilaijakea oti'nene, Jisasi'enena nanekea hu'naze. 31 Mosese'ma Ilaijama Jisasima hu'za tusi'a masafi mani'ne'za, Jerusale Jisasima friteno otino vaniazamofo nenekea hu'naze. 32 Pita enema mani'naza nagamo'za zmavutoko hige'za mase'naze. Hianagi zamagrama oti'za nege'za, Jisasi'a tusi'a masa'afi tare netrene oti'za mani'nageno zmage'naze. 33 Anante tare netremoke atrene nevakeno, Pita'a anage Jisasinku hu'ne. Kva'nimoka, amare'ma manunana knare hie. Tatregeta tagufa tona nona kimneno, magora Kagriki, magora Mosesenki, magora Ilaijane. Anama hu'nea kemofo agafa'a antahini' osu'neno hu'ne. 34 Pitama anagema nehigeno, hampomo tamino refite nezmentegeno, ana hampompi mani'ne'za koro hu'naze. 35 Anante mago agerumo hampopinti eno anage hu'ne. Ama'i Nagri Mofavre, Nagra huhampri ante'nomo'e. Hanki ke'amofona antahimiho. 36 Ana agerumo'ma kea huvgama retegeno, Jisasi'a Agrake mani'nege'za amagema nentaza disaipol nagamo'za ke'naze. Ana hiazanku zamagra kea eri tagane'za mani'ne'za, ana knafina mago vahere hu'za ke'naza'zana ozmasamitfa hu'naze.

37 Nanterana agonaregati eneramizageno, hakare veamo'za eri hantage'za kantega tutagiha hunte'naze. 38 Anante ana vahe amu'nompinti mago nemo ranke huno, Rempi hurami ne'moka, keke hugantoanki, magoke ne'mofavre'niagi ko. Na'ankure agra mago mofavre'ni'e! 39 Havi avamumo azeri haviza higeno krafa nehigeno, azeri traka hunetregeno, kentu kentu nehigeno, agremo zuzu nehigeno, azeri haviza hutere mago'agnafina hu'ne. 40 Nagra kamagema nentaza disaipol nagaku keke huzmante'na, havi avamura humegi atreho huanagi, zamagra humegi atregara osu'naze. 41 Jisasi'a kenona huno, tamentinti osutma fatgo osu vahe ama knafina mani'naze. Nama'a knafi tamagranena mani'nena tmagri knazana erigahue? Avrenka negamofona amare eno. 42 Ana mofavrema avreno ne-egeno'a havi avamumo azeri traka hutregeno, mopafi maseno kentu kentu hu'ne. Hianagi Jisasi'a ana havi avamu ke nesuno, azeri so'e huno nefa ami'ne. 43 Anama hige'za Anumzamofo tusi'a hihamuma nege'za, antri hu'za zmagogogu hu'naze.

Anama hu'za mika'mo'za antrima nehu'za zmagogogu nehazageno, Jisasi'a amage'ma nentaza naga'a zmasamine. 44  Ama tmasamisua nanekea eritma tamaguafi anteho. Vahe'mofo Mofavrea komoru hu'za ha' vahe'mofo zmazampi avre'za antegahaze. 45 Hianagi ana nanekea zamagritera frakino me'nege'za ana kea antahi amara osazageno, zamagra ana nanekemofo agu'agesa'a antahi ama osu'za, azeri akona osu'naze. Ana nehu'za ana kegura koro hu'za antahi onke'naze.

46 Jisasima amage nentaza disaipol nagamo'za, agafa hu'za iza rana manigahie hu'za zamagra zamagra hu'naze. 47 Hianagi Jisasi'a zamagu'afi nezmageno, osi mofavre avazu huno eme azeri o'netino, 48 anage huno zmasami'ne, Iza'o ama mofavrema Nagri Nagifi avreno azeri so'ema huntesimo'a, Nagri navreno nazeri so'e hunantegahie. Iza'o Nagrima naveresimo'a, hunantegena e'nomofo avaregahie. Na'ankure iza'o amuno tamifi anteramino manisimo'a, maka'motma tmagatereno ra vahe manigahie.

49 Joni'a kenona anage hu'ne, Kva nemoka, negonkeno Kagri kagifi, mago ne'mo havi avamura hunetregeta anara osuo huta i'o hunte'none. Na'ankure agra kamagera anteno tagranena vano nosigu hu'none. 50 Hianagi Jisasi'a anage huno zmasami'ne, tamagra i'o huonteho. Na'ankure tamagrima ha'ma reormantesamo'za, tamagri vahe mani'naze.

51 Agrama monafima marerisia knamo tva'oma nehigeno, Jisasi'a Jerusale kumate vunaku hanave agesa antahi'ne. 52 Agra mago'a ke eriza vugotahu vahe huzmante'ne. Zamagra Samaria kumate nevnu'za, mago'azana ko ome retro hu'nenageno vunaku huzmante'ne. 53 Hianagi anampi vahe'mo'za ozamavre'naze. Na'ankure Agra Jerusale vunaku hu'negeze. 54 Ozamavre'nage'ne amagema nentaza disaipol naga'afinti Jemisike Jonike nentahike amanage hu'ne Jisasi antahige'na'e, Ramoka tagra ha'manena monafinti tevemo eramino zamaresniegu nehano? 55 Hianagi Jisasi'a rukrahe huno ke'znasutege'za, 56 ana kumara atre'za ru kumatega vu'naze.

57 Kantega zamagrama nevzageno, mago vahe'mo Jisasinku huno inantegama vnantega nagra kamage' ante'na vugahue. 58 Jisasi'a anage huno asami'ne, afi' kramokizmia nozimia mopagampi me'negeno, monafi namamofona nozamia me'ne. Hianagi Vahe'mofo Mofavre'mofona anu anteharege huno mase'za omane'ne. 59 Jisasi'a magomofonku huno, enka namage emento. Hianagi agra ke'nona huno, Ramoka kotazana, natregena vuna nenfana ome asenteteno. 60 Hianagi Jisasi'a huno, atregeno fri vahe'mo'za, fri vahera asezmanteho. Hianagi kagra vunka Anumzamofo kumaku ome huama huo huno asami'ne. 61 Mago'mo enena anage huno asami'ne, Ramoka nagranena kamage antegahue. Hianagi natrege'na nonirega vuna nagani'a ome huso'e huzmantetena, ena kamage emeantaneno higeno, 62 Jisasi'a anage huno asmi'ne, mago'moma hozama erino nevuno, rukrehe rukrehe huno vanimo'a, Anumzamofo Kumapina vugara osu'ne.