1 Ama anazama huteno, Ramo'a 72'a vahe huhampri zmanteno, Agra'ama vunaku'ma hia rankuma ene maka osi kuma tamimpi, ugote'za vihogu tare tare huzmantetere hu'ne. 2 Jisasi'a anage huno zmasami'ne, hozafina rama'a ne'zamo'a nena huno meanagi, hoza vasage vahe'mo'za osi'a mani'naze. E'ina hu'negu nunamu hutma hozamofo Nefa antahigenkeno, eriza vahera huntenkeno hoza ome vasageno. 3  Tamagra viho! Hianagi antahiho, sipsipi afu anenta naga, afi' kra nagamofo amunompi huzmanteankna hu'na huneramantoe. 4  Tamagra zagoma eriri kura erita ovutma, kura erita ovutma, tmagamofo anona e'ori nevutma, kantegama vahe'ma zmagesuta huso'e sa'e huo zmanteho. 5  Ina nompima ufresuta ese'zana ama nompina, Anumzamofo rimpa fruzamo mesie hutma ome hiho. 6  Ana nomofo nefama rimpa fru ne'ma mni'nesnigeno'a, tamagri tamarimpa fruzamo'a, agrite megahie. Hianagi rimpa frune vahe'ma omni'nenkeno'a, ana asomu kemo rukrehe huno ete tamagrite egahie. 7  Anama vnaza nompi umaninetma nazanoma tamisazana nenetma tina neho. Na'ankure eriza vahe'mo'a mizama'a e'nerie. Ru nontamimpina vutma etma osiho. 8  Rankumate nevnageno vahe'mo'za tamavrente'za, neza retroma huramantesa zana neho. 9  Ana kumate kri erinesaza vahera krizmia zmazeri so'e nehutma, anage hutma zmasamiho. Anumzamofo kumamo'a tmagrite erava'o nehie hiho! 10  Hianagi ina kumatema vnagenoma vahe'mo'za otamavresagetma, atretma ana kuma kampi nevanutma anage hiho. 11  Tamagri kumate kugusopa tagia agusareti rupopo hutrona zamo'enena, Anumzamo'a ha' renermante nehie. Hianagi antahiho, Anumzamofo kumamo'a ko tamagrite e'ne. 12  Antahiho, Nagra anage hu'na neramasamue. Anumzamo'ma refko hania knazupa, Sodomu kumate vahe'mo'zama erisaza knazana, tamagra ageteretma ra knaza erigahaze.

13  Nasunku hurmantoe Korasin vahe'mota! Nasunku hurmantoe Betsaida vahe'mota! Na'ankure kaguvazama tamagripi hu'noazana, Taiane Saidoni kumate huasina, ko zmasunku kukena nehu'za, tanefa fre'za zmasunku hu'za zmagua'a rukrehe hazasine. 14  Hianagi Anumzamoma vahema refkoma hania knazupa, Taia vahe'mo'zane Saidoni vahe'mozanema erisaza knazana, tamagra agatereta ranknaza erigahaze. 15  Tamagra Kapaniamu kumate vahe'mota monafi marerigahazafi? A'o, tamavretresigetma fri vahe kumapi (Hedes) vugahaze. 16 Anante Jisasi'a disaipol nagakura anage huno zmasamine, Iza'o tamagri kema antahi tamamisamo'za, Nagri ke antahi namigahaze. Iza'o tamagrima tmatresamo'za Nagri natregahaze. Hagi Nagrima natresimo'a hunantege'na e'nomofo atregahie.

17 Henka 72'a vahe'mo'za huzmantege'za vute'za ete muse hume ne-eza, anage eme hu'naze. Ramoka havi avamumo'zanena Kagri kagifi hunezmantonke'za ketia amage ante'naze! 18 Jisasi'a ana kezmirera anage hu'ne, Sata'a monafinti kopsinamo hiankna huno takauneregena ke'noe! 19  Antahiho, Nagra osifavene ha' segintavene, rehapati hihamua neramina, ha' vahe'mokizmi mika hanavema azeri ageteresaza hanavea tami'noankino, mago'zamo tmazeri haviza osutfa hugahie. 20  Hianagi havi avamumo tagri ketia antahino amage antene hutma musena osiho. Hanki tamagri tmagima Anumzamo'ma monafi krente'neazanku musena hiho.

21 Ana zupage, Ruotge Avamumo azeri muse Jisasina higeno, anage huno hu'ne. Nafanimoka monane mopamofo Ramoka susu huna muse hugantoe. Na'ankure kagra amazama antahizane vahe'mofontera erifra nekinka, osi mofavre nagakna hu'naza nagate eri ama nehane. Izo, Nafanimoka ama'i kagrima kavesiaza hu'nane. 22 Jisasi'ma nunamu huvgamareteno agafa huno kea zmasami'ne. Nafanimo makazana kegvahu hihamu namine. Mago vahe'mo'a, izane Nagrira ke'za antahiza osu'nazanki, Nefake antahine, Nefa'a iza'e, Nemofoke antahine. Nemofo'ma avesite zmavrea vahe'mokizmia, Nefana zamaveri nehie. 23 Anante Jisasi'a rukrehe huno amage'ma nentaza disaipol nagara zamagrike anage huno zmasami'ne, e'ima negazazama kesaza vahe'mokizmia asomu huzmantegahie. 24  Na'ankure anage hu'na neramasamue, korapara rama'a kasnampa vahe'mo'zane, kini vahe'mo'za e'ima negaza'zana kenaku hunazanagi, anazana oke'naze. Nentahizaza antahinaku hu'nazanagi ontahi'naze.

25 Hagi mago ne'ra kasegere ugota hu'nea ne'mo otino, Jisasi reheno kenaku anage hu'ne. Rempi hurami nemoka, nankna hutena manivava asimura erigahue? 26 Jisasi'a kenona'a anage huno asmine, Na'ane huno kasegefina krentene? Nankna hunka ana kasegemofo agu'agesa hamprinka kenka antahinka hunane? 27 Higeno ana kasegere ugagota hu'nea nemo'a kenona huno, Anumzankamofona maka tumokareti'ene, kagu kamenteti'ene hanave kareti'ene, maka antahintahi kareti'ene avesinentenka, tva'onkare mni'nemofona, kagragu'ma kavemasinentanaza hunka, kavesinto. (Diu-Kas 6:5, Lev-Pri 19:18)

28 Jisasi'a anage huno kenona'a asami'ne, Kagra fatgo hunka kenonana hananki, anama hana kema amage'ma antesunka kasimura erigahane. 29 Hianagi ana ne'mo, agra'a fatgo hu'noe hunaku anage huno Jisasina antahigene, tvaonte'ma nemniza nagakuma hanana inamokizmigu hane? 30 Jisasi' kenona'a fronka ke huno, Mago ne'mo Jerusale kumateti Jeriko vunaku uneramigeno, kumzafa vahe'mo'za eme ahe'za kutuma'a nehanare'za, kukena'a eri vroro hutre'za ahetrageno fri'za huno nemasege'za, atre'za fre'naze. 31  Mago prisi ne'mo ana kante uramino nevuno ana nera ome ke'ne. Hianagi ana nera eme agatereno magokazigati vu'ne. 32  Anahu kna huno Livae ne'mo'a eramino, eme keme agatereno vu'ne. 33  Hianagi magora Sameria ne'mo'a ana ne'ma masenea kantega ne-eno, eme negeno asuragi ante'ne. 34  Ana huteno ana nete eno, ahenaza avufga'are, masavene wainine tagino frenenteno anakintene. Ana huteno donki afu'amofo agumpi avrenteno, avreno miza seza nemasaza nompi ome anteno, ana kenege kegva hunte'ne. 35  Nanterana otino ana nomofo kva nera, tare silva zago nemino anage hu'ne. Nama'a zagoma atrenka mago'ane kegavama krintesanama'a, etenama esu'na atrenesanama'a eme miza segantegahue nehuno vu'ne. 36  Ana 3'a vahepintira ina ne'mo kagrama kagesama antahinana, anama kumazafa vahe'mo'za ahe'naza ne'mofona tva'onte neknara huno manigahie? 37 Kasegere ugota hu'nea ne'mo huno, asunkuma hunte'nea ne'mo'e higeno, vunka anahukna ome huo huno Jisasi'a hunte'ne.

38 Jisasi'ene amage'ma nentaza disipol naga'ane kantega nevu'za, mago kumapi zamagra vazageno, Mata'e nehaza a'mo Jisasina agi hige'za noma'afi ufre'naze. 39 Matana nenunkna agi'a Meri'e hu'za nehaza a'kino, Ramofo agafi mani'neno, kema hiana antahine. 40 Hianagi Mata'a ne'zama retromahu erizanku antahintahi hakare nehuno, Jisasinte eno anage hu'ne. Ramoka kagra nogano, nenanuknama natregena maka nezama nagrake'ma retroma nehuana? Huntegeno eme naza hino. 41 Hianagi Ramo'a, kenona'a anage hu'ne, Mata, Mata, kagra antahintahi hakare maka'zanku nehunka antahigna nehane. 42  Hianagi magoke'zantfa razana me'ne, e'i anazana Meri'a hentofaza huhampriankino, anazana agripintira eri otregahaze.