1 Mago'agna evutegeno Jisasi'a rankuma tamimpine, osi kuma tamimpi vano nehuno, Knare Musenkea rempi hunezamino, Anumzamofo Kumamofo kea huama nehigeno, 12fu'a amagema nentaza disaipol nagamo'za magoka vano hu'naze. 2 Hagi mago'a, havi avamu mni'negeno eri atrezmante'nea a'nene, krizimifinti zamazeri so'e hu'nea a'nene vu'naze. Anampina Makdala kumateti Meri'e nehaza a' 7ni'a havi avamu hufegi atre'nea a'ki, 3 Joana Kusa nenaro'e (Heroti eri'za vahe'mofo kva nere) Susana ene, mago'a rama'a a'nema zamagra'a fenozampinti Jisasima azama nehaza a'nene vu'naze.

4 Tusi'a vahe krefamo'za eritru hu'za mani'nageno, mago'a ranra kumateti veamo'za Jisasinte azageno, amanage huno fronka kea zamasmi'ne. 5  Hozafi avimza rurani ne'mo'a, avimaza ruranino nevigeno, mago'a avimzamo'a kampi evuramigeno rentroko hazageno, namamo eme ne'ne. 6  Mago'a avimzamo'a have mopafi evuramino hage'ne, hianagi tima'a omnenegu huno amagino osapa re'ne. 7  Hanki mago'a avimzamo'a ave'ave trazampi evuramino ave'ave trazane magoka hageno mrerigeno, ave'ave trazamo hageno ki rentrako hu'ne. 8  Hanki mago'a rima'ane mopafi evuramino hageno 100ti'a raga'a agatereno rente'ne. Anage huteno ranke huno, iza'o agesama me'nenigeno'a ama nanekema antahisimo'a antahise hino!

9 Amage'ma nentaza disaipol naga'amo'za, ana fronka kemofo agafa'agu, nankna agu'agesa me'ne hu'za Jisasina antahige'naze. 10 Agra anage huno zmasami'ne, tamagra Anumzamofo kumapi oku'azana nentahize. Hianagi mago'amo'za fronka kege nentahize. Ana nehu'za, kegahazanagi onkegahaze, antahigahazanagi antahise huza agafa'a antahi amara osugahaze. (Aisa 6:9-10)

11  Ana fronka kemofo agafa'a amanahu me'ne. Ana avimazana Anumzamofo ke me'ne. 12  Hanki mago'a avimaza kamofo ankinare evurami'neana, Anumzamofo kema antahinaze. Hianagi aru zamentinti nehu'za so'e hu'za mni'zanku, Sata'a eno zamagu'afinti ana kea emeri atre'ne. 13  Hanki mago'a avimazana havege mopafi evurami'neana, Anumzamofo kema nentahi'za muse huza eri'nazanagi, rafuna ore'naze. Osi'a knafi zmentinti nehu'za, rezmatga'zama ege'za traka hu'za atre'za nevaze. 14  Hagi ave'ave trazampima evurami'nea avimzana, Anumzamofo kea antahi'naze. Hianagi zamavufamofo zavamesi zankuke nehu'za, mopafi zanku antahintahi hakare nehu'za, fenoma eri'za mni'zazmima eri so'e hanaza zankuke antahintahi hakare nehazageno, anazamo kintrako hige'za, rga renontaze. 15  Hianagi tima'ane mopafima rurani'nea avimzana, Anumzamofo kea e'i anamo'za antahite'za azeri antrako hu'za, tamage hu'za fatgo zmarimpareti nena raga'a rente'za kazigazi hu'za nevaze.

16  Mago vahe'mo'e huno tavira rekru huno, kavofi runkni rentege, sipa kampina antege nosaze. Hianagi tavira amate ante'nazageno remsa hu'negeno, nompima efraza vahe'mo'za negaze. 17  Na'ankure mago'zamo'a fraoki'nigeno, oku'ama me'nesiazamo'a magore huno frara kino omne'nenige'za onkegahaze. Hanki eama masare hanige'za maka vahe'mo'za kegahaze. 18  Ana hu'negu kva hu'neta antahi ankereho, iza'o mago'ama eri'nenimofona mago'ane amigahie. Hianagi iza'o e'orinenimofona, eri'noe huno agesama antahisiama'a, anama'a hanare vga regahie.

19 Jisasina nerera'ene agnahe'zane agritega e'naze, hianagi zamagra tvaoma'arera ovu'naze. Na'ankure tusi'a vea mani'nazageno'e. 20 Ana higeno Jisaina asami'za, negarera'ene kaganahe'za kavega ante'za megi'a otine'za kagenaku nehaze hu'za asami'naze. 21 Hianagi kenona zimirera anage huno zmasami'ne, nenrera ene naganahe'za, Anumzamofo ke'ma antahi'za amage'ma nentamo'za mani'naze.

22 Mago zupa Jisasi'a amage'ma nentaza disaipol naga'ane ventifi mrenerino anage huno zmasami'ne, timofo kantu kaziga vanune hige'za vu'naze. 23 Ana hu'za nevazageno, Jisasi'a avu mase'negeno, tusi'a zaho'mo eramino timofona eri kranto kranto nehuno, ventefi mrerino erinakriza nehige'za zmagogofene. 24 Zamagra Jisasina eme azeri oti'za anage hu'naze. Ramoke, Ramoke, tagra tinakrita fri'za nehune hazageno, Jisasi'a otino zahoku'ene kranto kranto nehia timofona kesigeno, timo'a rurava he'ne. 25 Anante Jisasi'a anage huno amage'ma nentaza disaipol nagakura zmasami'ne, tamentintia iga me'ne? Hianagi zamagra zmagogo nefege'za antri nehu'za, zamagra zamagra anage hu'naze. Iza'e ama nera Agra tine zahomofonku enena ke higeno amagera nenta'e?

26 Ana hutege'za zamagra venti eriza Geresa mopafi kantu kaziga Galili timofona vu'naze. 27 Anante uhnati'zageno Jisasi'ma ventefinti takau reno uneramigeno, ana kumateti mago nera havi avamu'mo agu'afi fre'nea ne'mo eme tutagiha hunte'ne. Ana ne'mo'a zaza knafi kukena'a nosuno, nompina omanine. Hianagi vahe asenentaza havegampi nemniane. 28 Ana nemo Jisasima negeno'a, avuga eme traka humaseno, ranke huno anage hu'ne, Jisasiga Mrerisa Anumzamofo mofavremoka nataro! Keke hugantoanki nazeri havizana osuo! 29 Na'ankure Jisasi'a ko ana agru osu havi avamukura ana nemofona atrenka atiramio huno hanave ke hunte'negeno'e. Ana havi avamumo rama'a zupa retufenetregeno, ana kumate vahe'mo'za agiare azante seni nofinu anakinte'za kavagri'za mani'nazane. Hianagi ana ne'mo'a, nofira rukno hunetregeno, havi avamumo'a avreno ka'ma kotamimpi vu'ne. 30 Anante Jisasi'a anage huno antahige'ne, Kagika'a izage? Ana ne'mo anage hu'ne. Nagini'a hakare'mone. Na'ankure rama'a havi avamu agu'afina maninegu hu'ne. 31 Ana agru osu havi avamumo'za hu'za, keke hugantonanki hanave kea hurantegeta ro'a omane kerifina ovamneno hu'za hu'naze. 32 Hagi rama'a afutamimo'a agonamofo asoparega ne'za nene'za mani'nageno, havi avamumo'za zamatresige'za vnagu Jisasina keke hunte'za, tataregeta antu afu tamimofo zmaguafi uframneno hu'za antahigageno, knareki viho huno huzmante'ne. 33 Hanki havi avamumo'za ana ne'mofo agu'afinti atirami'za afu'mokizmi zmagu'afi ufrage'za, agonaregati zmagare'za zavateti tirupi takauramiza ti nakri'za fri'naze.

34 Afu kva vahe'mo'za anazama fore hiaza nege'za, koro fre'za ra kumate'ene osi kumate'ene vu'za, anama fore hiazamofo kea ome zmasami'naze. 35 Anazama hiazanku vahe'mo'za ome kenaku Jisasinte e'naze. Zamagrama eme kazana, havi avamuma atirami'nea nera Jisasi agafi kukena huno knare antahintahi erino maninege'za eme nege'za koro hu'naze. 36 Anazama fore hige'za ke'naza vahe'mo'za, inaknahuno ana havi avamuma agu'ama fre'nea nera azeri so'e hunte'ne. Ana agenkea onke'namokizmi zmasami'naze. 37 Anante maka Gesarin vahe'mo'zane, ana kaziga mani'naza vahe'mo'za hanavetiza, tatrenka vuo hu'naze. Na'ankure zamagra tusi zmano vazige'ze. Ana hazageno Jisasi'a ventefi marerino zmatreno ete vu'ne. 38 Havi avamu'mo'za atirami'nea ne'mo atresigeno avaririno vanigu antahige'ne. Hianagi Jisasi'a ana nera hunenteno anage hu'ne. 39  Kuma ka'arega ete vunka, Anumzamo'ma huganteazana vaheka'a ome zmasamio huno Jisasi hiazanku, rukrehe huno ran kumapi nevuno, maka vahera knare'za huno azeri so'ema hunte'neazana huama huno zmasamino vu'ne.

40 Anantegatima ete Jisasima egeno'a, tusi'a veamo'za muse hu'za avre'naze. Na'ankure zamagra avega ante'za mani'nazaretire. 41 Anante Jairusi'e nehaza ne'mo osi mono nomofo kva nekino, Jisasi agiafi eme rena reno noma'afima esigu tutu huno antahige'ne. 42 Na'ankure 12fu'a kafunaza hu'nea magoke mofa'amo, fri'za nehigeno hu'ne.

Jisasi'ma kantegama nevigeno, hakare vea'mo'za oretufe aretufe hu'za vu'naze. 43 Anampina mago ara 12fu'a kafu zgefi korankria eri'nea a' mani'ne. Hianagi mago vahe'mo'e huno ana ara azeri so'e osu'ne. 44 Ana a'mo Jisasina amefigati zaza kena'amofo atumpare eme avako higeno, ana korankrimo'a ame huno vgarente'ne. 45 Anante Jisasi'a zmantahigeno, iza navako hu'ne? Hige'za zamagra onke'none hu'za hazegeno, Pita'a huno kva nimoka, tusi'a vahekrefamo'za rugagagiza kavate rentrako hu'naze. 46 Hianagi Jisasi'a anage hu'ne, magomo navako hu'ne, na'ankure Nagripintira mago'a hanave'nimo'a natreno vu'negena nehue. 47 Ana a'mo'ma keno antahinoma hiana, frakigama nosuno'a ahirahi neregeno avuga eme traka humaseno, eme avako higeno, kri'amoma ame huno vgarente'nea kea maka vahe zmasami'ne. 48 Anante Jisasi'a anage huno ana ara asami'ne, Mofamoke, kamentintimo kazeri so'e hianki krimpa frune vuo. 49 Jisasi anagema nehigeno, mago ne'mo osi mono nomofo kava ne' Jairus nontegati eno, anage huno eme asami'ne. Mofa kamo'a fri'neanki mago'anena, Rempima hurami nera kna omio. 50 Hianagi Jisasi' ananke nentahino, anage huno kenona hu'ne. Kagra korora osuo, kamentinti hugeno ana mofamo'a knamareno manino. 51 Hanki nonte'ma eteno'a mago'a vahera zmatrege'za uofre'naze. Hanki Pitane, Jonine, Jemisine ana mofamofo nefane nererane ke hige'za zamagrake ufre'naze. 52 Anampina maka zamagra zavi nete'za tusi krafa ana mofaku nehazageno Jisasi'a anage hu'ne, ofri amne mase'neanki zavira oteho. 53 Ana veamo'za agiza re'naze. Na'ankure ana mofamo'a frinege'za ke'nazagure. 54 Hianagi Jisasi'a akoheno azante azeri otino anage hu'ne, Mofavre'moka otio. 55  Ana mofamofo agu amemo ete agu'afi efregeno, ame huno otigeno, neza aminkeno neno huno zmasami'ne. 56 Ana mofa'mofo nerera'ene nefakea antri nehakeno, amama huazana vahera ozmasamitfa hi'o huno znasami'ne.