1 Jisasi ana naneke huvareteno, Agra kesga huno monafi negeno amanage hu'ne, Nenfaga hago kna (aua) eforehie, Negamofona ra agi amigeno, Negamofo anazanke huno, Kagrira rankagi kamino. 2  Maka vahete kvahu hihamu ami'nane, ana hankeno maka ami'nana vahera, Agra zamaza huno manivava mani'za zamigahie. 3  Ama'i manivava mani'zane hu'za, zamagra kage'za antahi'za nehu'za, magoketfa tamage Anumzane nehu'za, Jisas Kraisi huntankeno e'ne hugahaze. 4  Nagra ama mopafi Kagri kagi eri ra hu'na, Nagri'ma eri'za erio hunka nami'nana eri'zana hago eri vgare'noe. 5  Menia Nenfaga, Kagra kaziga navrento, korapa'ma mopa fore osu'nere mani'neta hu'no'a konariri zampi, Kagrane umanisu'e. (Eks-Utr 3:14)

6  Nagra Kagri kagi kagenkeka'a kokankoka vahe'pinti'ma avare nami'nana vahera zamasmi ama hu'noe. Zamagra Kagrika'a vahe, Nagrira nami'nane, hagi zamagra keka'a antahi'za amage' ante'naze. 7  Menia maka nami'nana zankura, Kagra nami'nane hu'za antahigahaze. 8  Na'ankure Kagrama nasmi'nana kea Nagra zamasmi'noe. Zamagra anankea eneri'za Nagrikura tamage Agriteti e'ne nehu'za, Agra huntegeno e'ne hu'za zamentinti nehaze.

9  Nagra, zamagri zamagi' eri'na nunamuna nehue. Nagra kokankoka vahe zamagi' eri'na nosue, hagi Nagri'ma nami'nana vahe zamagi' eri'na nunamuna nehue, na'ankure zamagra Kagri suza mani'naze. 10  Hagi maka Nagri vahe'mo'za, Kagri vahere, maka Kagri vahera, Nagri vahere, ana vahe'mo'za Nagrira ra nagi nenamize. 11  Mago'ene Nagra ama mopafina omanigahue, zamagra'zmi ama mopafina manigahaze, hige'na Nagra Kagritega neoe. Ruotge hunana Nenfaga, Kagrama ante nami'nana nagifi zamavu vazi'sankeza, tagrama mago hu'nonankna hu'za zamagra mago hugahaze. 12  Nagra zamagranema mani'nena, Kagri kagire manisnaze hu'na zamagu'vazina kva huzmante'noe. Kagrama nami'namokizmia mago'mo'a fnane osu'ne, hianagi magoke'mofo fanane hinogura huhamprinte'ne, ana hanigeno Anumzamofo avontafe'mo hu'nea kantera avufa'a fore hugahie. (Sam-Zga 41:9) 13  Hu'neanagi Nagra, Kagrite menina ne-e'na, ama mopafina Nagra amanahu kea nehuankino, Nagri muse zamo'a (joy) zamagripi avitegahie. 14  Nagra, Kagri nanekea ko zamasmi'noe, huge'za mopa kagi'afi vahe'mo'za zamesra huzmante'naze, na'ankure zamagra ama mopafi vahera omni'naze, Nagrama ama mopafi vahe'ma omni'noa kna hu'naze. 15  Nagra ama mopareti zamavre atrogura nosue, hagi havi ne'mofo azampinti zamazeri anovazisanegu nehue. 16  Zamagra ama mopafi vahera omni'naze, Nagra enena anahu hu'na, ama mopafi vahera omni'noe. 17  Tamage kefi zamazeri avusese hunka zamazeri otge huo. Kagri keka'amo'a tamage. 18  Kagrama hunantanke'na ama mopafina e'noankina, Nagra ana zanke hu'na mopa kagi'afi hunezmantoe. 19  Nagra zamagri huzmeri'na avusese hu'na mani otage hu'noe, ana nehuanki'za zamagranena anazanke hu'za Kagrite avusese nehu'za, tamage hu'za mani otage hugahaze.

20  Nagrima namage nentaza disaipol nagakuke hu'na nunamuna nosue, hagi ke'ni'a huama nehzage'za, Nagrite zamentinti hanaza naga'enenku nehue, 21  ana hanuge'za zamagra maka'mo'za magoke hu'za, Nenfaga, Nagrane mago huta mani'no'a kna hu'za, Tagra ene mago hu'za zamagra mani'nesage'za, kokankokati vahe'mo'za nege'za, Kagra huntankeno e'ne hu'za zamentinti hugahaze. 22  Kagrama hanavema Nagri nami'nana hanavea, Nagra zamagri zami'noe, ana hanuge'za zamagra mago hu'za manisaze. Tagrama mago huta mani'no'a kna hu'za manisazegu zami'noe. 23  Nagra zamagripi manugenka, Kagra, Nagripi mani'nane, hanige'za zamagra magoke zamarimpa hu'za manigahaze. Ana hananke'za ama mopafi vahe'mo'za nege'za, Kagra huntankeno ama mopafina e'ne hu'za nentahi sagenka, Nagri'ma kvesi nante'nana kna hunka, zamavesi zamantegahane. 24  Nenfaga, Nagri'ma nami'nana vahe'zga, Nagrama manisufi manisazegu navenesie, ana hu'ne'za Nagri'ma nami'nana hanavea kesaze, na'ankure Kagra korapa mopa omne'nea knafi, Nagrite kagu'a antenka hanavea nami'nane. 25  Fatgo Nenfaga, kokankoka vahe'mo'za kage'za antahi'za osu'gahazanagi, Nagra kage'na kantahi'na hu'noe, hagi amama namage'nentaza naga'moza antahi'za, Kagra huntankeno e'ne hu'za nehaze. 26  Nagra, Kagri kagi'a hu'ama hu'na zamagrira nezmasamue, hagi'na mago'ene hagerfi'na hu'ama hu'na zamasmigahue, kvesima nenantana kvesi zamo'a, zamagri zamagu'afi mesige'na, Nagra anazanke hu'na zamagripi manigahue.