1  Ru tamentintifinti evuramizanku, ama nanekea menina neramasmue. 2  Jiu vahe mono nompinti (sinagog) tmahe anati atregahaze, mago kna ne-eankino, tmahefrisu'za zamagesa antahisazana Anumzamofo eri'za e'nerune hu'za antahigahaze. 3  E'ina hu'za zamagra hurmantegahaze, na'ankure Nenfane Nagri enena ontahi'nagu anara hurmantegahaze. 4  Hianagi ama zanku Nagra nermasmuankino, ana zgegna (aua) efore'ma hina, Nagrama tmasmi'noa kegu tamagra antahigahaze. Ese agafare Nagra ontmasmi'noe, na'ankure Nagra tamagra ne mani'nogu ontmasmi'noe.

5  Hianagi menina Agra hunantege'na e'nomofonte, Nagra vunaku nehugeta mago'moka nantahigenka, iga vunaku nehane hunka nantahi nonkane? 6  Hianagi vugahue hu'na Nagrama tamasmua kemo, tamagri tamagu'a erigna nehie. 7  Hianagi Nagra tamage neramasmue, tamagrima eme tamaza hanigu vugahue, na'ankure Nagrama tmatre'na ovanugeno'a, tmaza hu'zana tmagritera omegahie. Hianagi Nagrama vanuna, huntanena, Agra tamagritega egahie. 8  Hankino Agra esuno'a, mopafi vahe'mokizmi kumi'ene, Anumzamofo fatgo avu'ava zane, henkama refko huno keaga huzmantesiaza zameri nehuno, 9  kumi zamimofonku zamasmigahie. Na'ankure zamagra Nagritera zamentintia osu'naze. 10  Na'ankure fatgo navu'nava hanuana, Nenfantega vanugeta, tamagra Nagrira onagegahaze. 11  Hagi kema refko haniaza eme huramerigahie, na'ankure ama mopa kva hu'nemofona hago keaga hunte'noe.

12  Nagra mago'a rama'a naneke tamasmusine, hianagi menina tamagra antahise osugahaze. 13  Hianagi Tmage Avamu'ma esuno'a, agu'vazi zamanteno tamage nanekemofo eri ama huno tmasmigahie. Na'ankure Agra'a antahintahi'ane, hanave'arera ana nanekea osugahie, hianagi na'ano Agrama antahisia kege nehuno, henkama esia zamofonku tmasmigahie. 14  Avamumo'a, Nagri nagi erisaga hugahie, na'ankure Nagripi me'neazana erino tmagrira tmasmigahie. 15  Maka'zama Nenfa'ma ante'neana Nagri'zane, e'ina hu'negu, Avamumo'a Nagripinti ana nanekea erino tamagrira tmasmigahie.

16  Osi'a knafi omni'nanena tamagra onagegahaze, hagi ete osia knafi tamagra nagegahaze. 17 Mago'a amage' nentaza disaipol naga'mo'za zamagra zamagra ohumi ahumi nehu'za anage hu'naze, ama'i nankna naneke tasmino, osi'a knafi tamagra onagegahaze nehuno, ete osi'a knafi nagegahaze nehie. Na'ankure Nagra Nenfante vugahue nehie? 18 Amage' nentaza disaipol naga'mo'za anage hu'naze, ama'i na'anku Agra anage huno, osi'a knafine nehie? Tagra ontahi'none, na'anku Agra nehifi ontahi'none hu'za hu'naze. 19 Zamagra antahigenaku Jisasina nehazageno nentahino, anage huno zamasmi'ne, Nagra hu'na, osi'a knafi onageta, ete osi'a knafi nagegahaze hua kegu, tamagra antahintahi hakare nehazo? 20  Tamagerfa hu'na neramasmue. Tamagra tamavunu nehina ranke huta zavira ategahaze, hianagi ama mopafi vahe'mo'za muse hugahaze. Tamagra tamarimpa kna hugahazanagi ete tmarimpa knamo'a eri rukrahe hanigeta, muse hugahaze. 21  A'mo mofavrema nenteno'a atagu nehie, na'ankure mofavrema ksente kna egeno'e, hianagi mofavrema ksentete'no'a, ana atagura agesa nontahie. Na'ankure ama mopafi mofavrema ksentea muse nehie. 22  E'i ana hu'negu tamagra menina zavira netaze, hianagi Nagra henka nermagesugeno, tamagu'amo muse nehina, mago'mo ana musezana tamagripintira eri otregahie. 23  Ana knarera Nagrira mago'zankura nantahi onkegahaze. Tamagerafa hu'na tamagrira neramasmue, Nenfama mago zanku'ma Nagri nagifima antahigesageno'a, amne tamigahie. 24  Korapara Nagri nagifina mago'zankura nantahi onke'naze. Nantahigetma tamagra erigahaze, e'ina hanageno muse zantmimo'a avitegahie.

25  Nagra amanage hu'na fronka kefinti neramasmue, mago kna ne-eanki'na, ana kna zupa fronka kefintira ontamasmigahue. Hianagi huama hu'na Nenfankura tmasmigahue. 26  E'i ana knazupa, Nagri nagifi Nenfana antahigegahaze. Nagra tamagri tamagi eri'na, Nenfana asmigahue hu'na nosue. 27  Hagi Nenfa'a tmagrira Agra'a avesinermante, na'ankure tamagra Nagrira tamavesinenteta Nagrikura Anumzamofonteti e'ne huta tamentinti hu'naze. 28  Nagra Nenfantegati e'na, ama mopafina e'noe, hianagi ama mopa ete atre'na Nenfa hirega vugahue.

29 Agri amage' nentaza disaipol naga'mo'za anage hu'naze, ko menina Kagra amate ke huama nehunka, fronka kea osane. 30 Tagra menina antahi'none, Kagra maka'zana antahi'nane, mago zankura vahe'mo'a kagenoka osugahie. E'ina'ma hanazante tagra tamentinti nehuta, Anumzantegati e'nane huta nehune. 31 Jisasi'a kenona huno, Menina tamagra tamentinti nehazo? 32  Keho, knamo'a (aua) hago eno ama e'ne, mago mago'moka nonkarega nevunka, natresanke'na Nagrake manigahue, ana hugahazanagi Nagrakera omnigahue, na'ankure Nenfa'a Nagrane mani'ne. 33  Ama'ina naneke Nagra neramasmuana, Nagripinti tamarimpa fru erigahaze. Ama mopafina hazenke zane, kasuzamo egahianagi, oti hanavetiho, na'ankure Nagra ama mopa hago agtere'noe.