1 Ana nanekema huvareteno, Jisasi'a atreno disaipol naga'ane Kidron agupofi vute'za, ananteti vumare'za mago knagune zafa hoza me'nefi vu'naze. 2 Judasima komoru huntesia ne'mo'a, ana zafa knagune hoza ke'ne, na'ankure Jisasi'a disaipol naga'ane knagune hozafi mago'a knafina zamareno vutere'ma higeno ke'ne. 3 Higeno Judasi'a mago'a Roma sondia kevune, ra mono nonte kva nehaza naga'ene (Gat), vugote'naza prisi vahe'ene, Farisi vahe'enena olivi zafa hozafi tosine, tafentavi'ene, ha'zane eri'nageno zamavreno vu'ne. 4 Mika'zama Agrite fore haniazana, na'ankure Jisasi antahino keno nehuno, Azanku nehakraze? huno zamantahige'ne. 5 Zamagra ana kemofo nona'a Agriku hu'za, Nazareti kumateti Jisasinku nehakrone, hzageno, Nagra ana Nere. Judasima komoru huno ha' vahe zamazampi avrentesia ne'mo zamagrane anante oti'ne. 6 Jisasi'ma anage zamagriku huno, Nagra ana Nere hige'za, zamefiti vu'za mopafi traka truku humse'naze. 7 Ana hzageno, Jisasi'a mago'ene zamantahige'ne, tamagra azanku nehakraze? Hige'za zamagra hu'za, Nazareti kumateti Jisasinku nehakrone. 8 Jisasi'a ke nona'a huno, Ko'ma Nagra ana Nere hu'na tmasmi'noe, Nagriku'ma nehakrehanuta, ama vahera zamatrenke'za viho. 9 Agrama hu'neana, ko'ma Agra'ama hunte'nea kemofo nena'a fore hinogu hu'ne. Kagrama nami'nana vahepintira magore hu'na Nagra zamatroge'za afe osu'naze, hu'nea kegu hu'ne. 10 Pita'a ra kazinkno (bainat) eri'nereti anoma'afinti avazu hia zamo vugote'nea prisi ne'mofo kazokzo eri'za nera tamaga kaziga agesa ahe tavrofe atre'ne. Ana kazokzo eri'za ne'mofo agi'a Malakusi'e. 11 Ana higeno Jisasi'a, Pitanku huno, Kazinka'a anoma'afi vazinto. Nenfa'ma nami'nea tin tafempintira (kapu) Nagra onesuo?

12 Anante mago sondia kevune, sondia vahete vugota huno kvakri zmante'nea ne'ene, Jiu vahe'mokizmi ati vahe'mo'zane, Jisasi azeri'za azante nofi kinte'naze. 13 Anakite'za esera Anasinte avare'za vu'naze, na'ankure agra Kaiafasi nenemo'e, Kaiafasi'a ana kafumofo agu'afina vugota prisi ne' mani'ne. 14 Korapara Kaiafasi Jiu kva vahera antahintahizamino, hakare vahe'mokizmi nona huno magoke ne'mo frigahie huno hu'neane.

15 Saimon Pita ene, magora Jisasima amage' nentea disaipoli ne'ene Jisasima avare'za Anasinte vazage'za anantega zamavririke vu'na'e. E'i anama vu'nea disaipoli nera, prisi ne'mo'a ke'nea disaipoli nere. 16 Hianagi, Saimon Pita'a kasante fegi'a otino mani'ne. Ana higeno Jisasi amage' nentea disaipoli nera vugota pris ne'mo ke'nea ne'mo atiramino, kazokzo eri'za mofa'mo kafante kva hu'nea mofa asamigeno, Pitana avreno agu'afi emareri'ne. 17 Anante kazokzo eri'za mofa'ma kafante kva nehia mofa'mo Pitanku amanage huno antahige'ne, Kagra ama Ne' amage' nentana disaipol nere, tamage ana nepi? Huno antahigegeno, A'o, Nagra ru nere. 18 Anantera kazokzo eri'za vahe'ene, nonte kva nehaza vahe'ene, tanknuzare teve hegre'za oti'za mani kagi'naze. Na'ankure zasi hige'za teve tohiku hugre'naze. Pita'enena ana tevere uoti'neno teve tohi'ne.

19 Ana zama fore nehigeno'a, vugota pris ne'mo, amage nentaza disaipol naga'ene, rempi'ma huzami'nea kegu Jisasina agenoka hu'ne. 20 Jisasi ana kenona'a anage hu'ne, Nagra amate mika kaziga naneke hu'noe. Nagra maka zupa Jiu vahe osi mono nompine (sinagog) ra mono noma (tempol), Jiu vahe maka atru nehaza nomofo megi'a rempihuzami'noe, Nagra magore huna oku'a nanekea huozmi'noe. 21  Na'anku Nagria nantahi negane? Nentahizage'na huzmasmi'noa vahe zamantahigenka ko, Nagrama hu'noa nanekea, zamagra antahi'naze. 22 Jisasi'ma ana nanekema higeno'a, mago ra mono nonte kva nehia ne'mo, Jisasina avugosafi ruhapatino neheno amanage hu'ne, E'inahu hunka vugota pris vahe kerera ke nona hugahano? 23 Jisasi ke nona huno agri asmi'ne, Havigema hu'nesua zanku'ma nehanugenka, havizani'a hufore huo, hianagi tamage kema nehuana nahigenka kagra knonkevea nenamine? 24 Higeno anante Anasi'a nofira ovasneno huntegeno, Kaiafasi vugota pris nete avare'za vu'naze.

25 Saimon Pita'a oti'neno teve tonehige'za, tevere mani'naza vahe'mo'za antahige'za, Kagra'nena e'ina ne' amage' nentana disaipol ne' mani'nampi? Hu'za antahigageno, Pita'a vahane huno, A'o nagra ru nere. 26 Mago vugota pris ne'mofo kazokzo eri'za ne'ma, Pita kazi knonteti (bainat) agesa rutavrofe atre'nea ne'mofona nefu' Pitanku huno, Zafa hozafi Agrane mani'nanke'na kagrira kage'noa nepi, ru nere? 27 Higeno, Pita'a mago'ene vahane nehigeno, ana amage hantaka'a, kokoremo ageru ru'ne.

28 Ananteti zamagra Kaiafasintetira ko'atu avame Jisasina avare'za Roma ugagota kva (gavana) ne'mofo nonte vu'naze. Vunazanagi zamagra ugagota nemofo kumapina uofre'naze. Ana zamo zamazeri pehena resige'za, Hibru vahe kinafinti zamare'nea knagu antahimiza neza nenaza knare ovuzanku ana hzageno, 29 Paeroti ne'mo zamagritega megi'a atiramino eno anage hu'ne, Ama'na nera nankemofo agafare nanekea hu'nentaze? Huno zamantahige'ne. 30 Zamagra kenona hu'za asmi'naze, ama ne'mo'ma hazenke ne'ma omni'nesina, tagra avreta kagritera omosine. 31 Hzageno Paeroti'a zamasmi'ne, tamagratami avaretma tamagri kasegemo hu'nesia kante Agrira keaga hunteho. Jiu vahe'mo'za Paerotinku anage hu'naze. Tagrira vahe'ma zamahe fri'zantera i'o hurante'naze. 32 Ana kema hu'nazana, Jisasi'ma korapa Agrama fritenoma otinia zankuma zamasmi'nea kemo e'ama hu'ne.

33 E'ina higeno, anante Paeroti'a eteno ugagota vahe (gavana) nompi vuno, Jisasina kehuno, Kagra Jiu vahe'mokizmi Kinifi? Huno antahige'ne. 34 Jisasi kenona huno, Kagra kagesafinti ke nehampi, mago'a vahe'mo'za Nagri'kura kasmi nagenka nehano? 35 Paeroti'a ke nona huno, Nagra Jiu ne' mani'nofi? Kagri vahe'mo'zane, ra mono kva vahe'mo'za (hai pris) Kagrira kzerite'za, kvare'za eme nami'naze. Kagra na'a hu'nantere? 36 Jisasi ke nona'a hu'ne, Nagri kumara ama mopafina omne'ne. Ama mopare kva vahe mani'noresina eri'za vahenimo'za, Nagritekura ha' hazage'za, Nagrira navre'za Jiu vahera ozamizasine, hianagi Nagri kumara ama mopafina omne'ne. 37 E'inage higeno Paeroti'a asmi'ne, higenka Kagra kinio? Jisasi ke nona'a hu'ne, Kagra Nagriku'ma kinie nehanana tamage. Ama'na kegafare Nagra ama mopafina efore hu'noe. Nagra ama'na agafare ama mopafina e'noe, tamage naneke huama hunaku e'noe. Maka vahe'mo'za tamage nanekegu zamave'ma nesimo'za, Nagri nagerute zamagesa ante'za nentahiza tamage nehaze. 38 Paeroti'a antahige'ne, tamage nanekea inanknahu ke me'ne? Anagema huteno'a, megi'a atiramino Jiu kva vahete vuno anage hu'ne, Mago havizana nagra, Agripina ke'na erifore osue. 39 Hu'neanagi tamagri avu'avate kinafinti tamavare'nea (Pasova) knare mago ne' kinafinti azeri atretere hugahue hu'negu, tamagra ma antahizana nagra kinafintira, Jiu vahe'motma Kini ne' hunte'sugeno vanio? 40 Hige'za kezati'za amanage hu'naze, Ama'na nera avare otre'gahane, hagi Barabasi avare atro, Barabasi'a kumzafa ne'ku hu'naze.