1 Tagra mago'ane agafa huta tavufga erisaga hunaku nehumpi? Hifi tamagra, tagri tavufa erisagahu avo kreho nehumpi, hifi rumo'za avon kre'za tagri husga hihogu nehune? 2 Tamagra'a tagri avona mani'naze. Ko tagu'afi krentenege'za miko vahe'mo'za nehampriza antahiza ke'za nehaze. 3 Kraisintegati kretregeno e'nea avontafe kna huta eama nehazageta, tagra kegva nehune. Ana avona avo zotaretira onkre'neanki, kasefa huno mani'nea Anumzamofo Avamuteti krente'ne. Hagi ana avona havere kreonte'neanki, vahe'mofo tumopi krentene.

4 Ama ana miko zankura Kraisimpina, Anumzamofonte tamentinti nehuta hankave e'nerune. 5 Ana miko zama nehuna zankura, tagra'a hankavere nehune huta osugahune. Hianagi Anumzamo agra'a hankavereti hunerante. 6 Agra anazanke huno tagrira huranteno hankave tamigeta kasefa hagerafi kea hu'nea zamofo kegva hu'neta erizana e'nerune. Avompima krentenea zankura nosunanki, avamupi zanku nehune. Na'ankure Avompima krente zamo'a zamahe nefrie. Hianagi avamumo'a, zmasimu nezamie.

7 Hagi, havere erivakakino krentenea avompinti frizana avareno neazamofo erizamo masa'ane ne-e. Hu'negu Israeli vahe'moza, zamavuginki hige'za Mosena avugosafina onke'naze, na'ankure masazamo avugosafintira remsa hige'za nonkageno, ana msamo'a akoheno avugosafintira resu hu'ne. (Diu-Kas 35) 8 Hagi Ruotge Avamumofo erizamo'a mago'ane agatereno hanave'ane hihamua omanegosifi? 9 Na'ankure vahe'mofoma knama nemia erizamofo msa'ane hankave'a me'nenigeno'a, fatgo erizamo'a agetereno ra msa'ane hankave'a megahie. 10 Anumzamofo tusi'a msa'ne hanave'amoma me'neana kasefa erizama Anumzamo'ma erinea zamo, koma Anumzamoma eri'nea erizamofo msa'a agaterene. Ana higeno ko erizamofo msa'mo'a ko vgarene. 11 Hanki fanane hunoma nevania zamo'a hankave'a me'nenigeno'a, mago'ane mevava huno vania zamo'a, hankavemo'a agateregahie.

12 E'ina hu'negu tagra fore'ma hanigu amuha nehuta, kea hankavetita nehune. 13 Tagra Mosese knara osu'none, agra avugosafi tavravenu refitenegeno, Israeli vahe'moza avugosafi msazamo'ma fnanema hiama'a onke'naze. (Diu-Kas 34:33-35) 14 Hianagi antahintahiza zmimo'a hanavetino antro higeza maniza neazageno, ama knare ehanatine. Na'ankure korapa huhagerafi kasegema nehamprizageno'a, ana tavravemo'a refiteno ne-egeno, Kraisimpi ana tavravea eritrene. 15 Hianagi meninena Mosese'ma krente'nea avo hamprizana, ana tavravemo antahintahizazmia refite'ne. 16 Hu'neanagi vahe'mozama Ramofontema zmagu'ama rukrehema hzageno, refimatezmantenea tavravea erinetre. 17 Ana hu'negu Ramo'a Avamukino, Ramofo Avamuma me'nesirega, kinarente'zana omanegahie. 18 Hianagi miko tavugosa refi'ote vahe'mota, Ramofo msazama'amo'a tagrite remsa nehigeta, kapomo hiankna huta remsa huta Agri'kna hunkeno, Ramo'a avamukino, agri msazamo'a mago'ane tagripina remsa nehie.