1 E'ina hu'negu Anumzamo'ma asuragi rante'neazamo higeta, tagra ama erizana e'nerune, e'igu tagrira tavesra nosie. 2 Hianagi tagra agazegu huno oku'a huga avu'avara nosune, vahe'mokizmi rezmatga huta zmazeri havizahu avu'avazana nosuta, Anumzamofo kegaga eriruvahe huta vahe'mokizmia rezmatga nosune. Hianagi Anumzamofo avure ene vahe'mokizmi antahizampina, tagripina tamage'zamo eama hanigeza kegahaze. 3 Tagrama knare musenke huama hunazamo'ma ama'ma nosiana, fananema hanaza vahe'mo'za amara nosaze. 4 Ama mopafi havige anumzamo, Sata'a zamentinti nosaza vahera antahintahizamia refinetege'za, knare musenkemofo msa Kraisina Anumzamofo amema'a nonkaze. 5 Na'ankure tagra'a nanekea huama nosunanki, Jisas Kraisi'a Ra mani'negeta, tagra Jisas Kraisinku huta tamagri kazokzo eriza vahe mani'none. 6 E'ina hu'negu korapara Anumzamo huno, hanimpina tavimo'a remsa hino hu'nemofo masamo, tagrite emani'neno tavi'a taguafina remsa nehigeta, tagra Jisasi Kraisi avugosa negeta, tagra tusi'a msane hanavene ke'noe.

7 Hianagi tagra mopa kavogna hunonkeno zgo'amo mareri'nea fenomo agu'afinka me'neakna hu'none. Tamage hankevea tagritegatira nomeanki, Anumzamofontegati ne-e. 8 Hakare kazigati knazamo'a trentarako nehianagi, ana knazamo'a trentarako nosie, antahintahitimo'a savri hianagi tamentintia notrone. 9 Knaza tamizanagi, Anumzamo'a noratre, tahe tatarazanagi, tazeri haviza nosaze. 10 Tagra mika zupa, tavufgafina Jisasi fri'za erita vano nehunke'za, Jisasi nomani'zana, tagri tavufafi anazanke huno eama hige'za negaze. 11 Na'ankure tasimu'ma erita mani'nomota Jisasi fri'zankuma huama hunazanku, hakare zupa fri kantera tavrenenteankino, Jisasi nomani'zana, ama amega tavufgare eama hanige'za kegahaze. 12 Ana higeno fri'zamo'a tagripina eriza e'nerie. Hianagi asimu erino manizamo'a tamagripina eriza e'nerie.

13 E'ina hu'negu anama tamentinti nehunkeno avontafepima krenteana anage hu'ne, Nagra namentinti hute'na, kea huama hu'noehu'ne. (Sam-Zga 116:10) Tagranena tamentinti nehunku kea huama nehune. 14 Na'ankure tagra antahi'none, Ramo, Jisasi'ma fri'nefinti azeri oti'nea Anumzamo, tagrira anazanke huno Jisasi ene magoka tazeriotino, tamagri ene tagri'enena Agri'a avurera tavrentegahie. 15 Tamagri knarezanku, ama ana miko zana nehunankino, Anumzamofo asunkuzamo ra huno rama'a vahete vuno eno hania'zamo'a, Anumzamofo ra agi amino musema hunte'zamo avitegahie.

16 Ana hu'negu tavresra nosie. Tamage tavufgamo'a frino negasrianagi, knane knanena avamutimofona erikasefa nehie. 17 Hanki meni tagritema osi knazama fore nehiazamo'a, tagrira monafima umani vava hanunaza retro huneranteankita, knare huta monafi umani vava nehuta, knarezama omerisunazamo'a, makazana agateregahie. 18 Hagi negonazantera tavua onkesunanki, onke'nonazante tavua kesune. Na'ankure negona zamoa omanegosie, hianagi okenona zamo'a mevava hugahie.