1 Ama avona Poli'na Anumzamo, Kraisi Jisasi aposol eri'za vahe manio huno huhamprinante ne'mo'nane, Timoti nerafu'ene kreneramu'e. Ama ana avona, Korinti mono nagate'ene ana miko Akai (Greece) kaziga Anumzamofo mono naga'ma mni'narega kreneramu'e. 2 Anumzanti nafatimofone, Ranti Kraisi Jisasi asunkuzamo'ene rimpa fruzamo'a tamagra ne mesie.

3 Rantimofo Kraisi Jisasi Nefa, Anumzamo Agrake mika asuragi zamofo agafa'a mani'neno, tazeri fruma nehimofo agi erisaga huta musena huntesune. 4 Mika knazantifina Agra tazeri fru nehie. E'inahu hu'negu Anumzamo'ma tagri'ma hu'neakna huta rumokizmia knafima mni'nesageta zmazeri fru hanune. 5 Na'ankure Jisasi Kraisi'ma, rama'a ataza eri'neankita, tagranena tata anahukna huta enerunanagi, anahukna huno Kraisi rimpa fruzamo'a tagu'afina avinete. 6 Tamagri knare zanku'ene tmahoma kezanku'ene, tagrira tazeri havizana hugahaze. Tamagrama fru huta manisagu, Anumzamo'a tagrira tazeri fru nehie. E'i ana zamo'ma eama nehiana, akoheno manineno, tagrama eneruna kna knazama e'nerimofonte efore nehie. 7 Ana hu'negu hanave antahintahi nehuta amuhama huramunana, tagrama erisuna tatazampintima, tamagra'enenema erisazana, tamagra anazanke huta Anumzamo'ma fruzama tamisifintira erigahaze.

8 Nenfutane nasarehetanena antahigahaze, Esia kaziga kumapina knazampi ufre'nonana, ana kna'zamo'a tazerino arentakro nehuno, tagri hanavea tazeri agateregeta, ana knazana eriga osuta hago nefrumpi huta antahi'none. 9 Tamage, tagrama tagu'afima antahunana, trake'mo refko huranteno frigahaze huno hianakna nehune. Hianagi e'inahuzama fore'ma nehiana, tagra hanavegura ontahigahunanki, Anumzamo'ma fri'nea vahe'ma zmazeri onetia hanavegu antahigahune. 10 Hagi fri kankamupintira tahokeno tavreneankino, ete rune, neravrena tagra amuhara Agriku nehanunkeno Anumzamo'a mago'ane tahokeheno tagu vazigahie. 11 Tamagrama nunamu hutma taza hazazamo'ma eama hiana, rama'a vahe'mo'za hu musena hu'naze. Na'ankure tagrima kegva krirantezanku nunamuna hazageno, Anumzamo'a ana nunamuntia antahizmino taza hu'ne.

12 Tagrama musema hunana, tamagra manuna knafina ama' tagutagesama tagu'afima e'nerita, hakareza hu'nazampi mni fatgo nehuta, ruotge huta nemnita, Anumzamofo so'e avu'avazante nemnita, ama mopafi antahizankura nontahize. 13 Na'ankure avoma kreraminofina, tamagrama nehampritma antahini osuga'zana kreonte'noanki, nagrama antahuana, mikozana amatfa hu'naze. 14 Meninena tagrira antahirami so'e osugahazanagi, Rantimo Jisasi Kraisi esia zupa, tamagra musena tagrikura nehanageta, tagranena anazanke huta tmagrikura musena hugahune.

15 Nagra tamage ko kena antahina huneramina, ese'ma retro hu'noana, tamagritema esu'azamo'a tare asomura erigahaze. 16 Masetoniama enevuna eme tamageme evute'na, ete anantegatima esugeta tamagra naza hanage'na Judia vugahue. 17 Nahigeno enaku'ma retroma hu'neana atreno ome huta nantahigegahaze? Nagrikura antahintahini'a retrora osu'nefi huta hugahaze? Hifi nagra ama mopafi vahe'mo'za i'o hugazanku izo nehu'za, izo hugazanku i'o nehazankna vahere hutma nagrikura nehazo? 18 Hu'neanagi Anumzamo'a Agra'a ke'are oti ne'kina, tagranema neramasamuna nanekemo'a, tamagema huta izo hanuta, izo hugahune. I'oma hanuta, i'o hugahune. 19 Na'ankure, Anumzamofo mofavre Jisasi Kraisi agi agenkema nagragi, Timotiki, Sailasiki hutama neramasmunana, Jisasi Kraisi, Anumzamofo nemofo'a Agra izoma nehuno'a, i'o osu Ne'mofo agenke huama huta neramasamune. 20 Anumzamo'ma mika huvempa kema huntea kemo'a, Jisasimpi avufga'a efore hu'ne. E'i ana hu'negu, Jisasi agima husga huta tmage huta hu'nazamo, Anumzamofona ra agi nemie. 21 Hagi Agrake Anumzamo, tagri'ene tamagri enena tazeri hanavetino, Kraisimpina huhampritante'ne. 22 Avame'za Avamu'areti tagu'afi anteneranteno Nagri vahere huno hu'ne. Henkama hakare'za tamisiazamofo huvempa hu'ne.

23 Hianagi, Anumzamoke nagri nagu'namena keno antahino hu'ne. Nagra tamage nehuankino Anumzamoke ana tamage keni'a refko hunantegahie. Ana agafare Korinti kumatera mago'ane ome'noe, na'ankure nagra hanave kefinti eme tamazeri fatgo osugahue. 24 Hianagi tamagri tamentintimofo kvagrirmante'nakura nosunanki, magoka tamagrane eriza erisunketa tamagra muse hugahaze. Na'ankre tamentintifina, tamagra oti hanavetigahaze.