1 Mago mono neramafu'ma hazenke hurmantesigetma keagare avretma vunaku'ma hanutma, mono kva vahete avretma vuga'zanagi, nahigetma fatgo osu megi'a kva vahetera avretma nevaze? 2 Anumzamofo naga'mo'za ama mopama mago kna refko'ma hnazazana, tamagra ontahi'nazafi? Hagi mopafi vahe'ma tamagrama refkoma hu'nesutma, na'a hanigetma tamagra neonse keagama amu'no tmifima fore'ma hiankea erifatgo osugahaze? 3 Tagrama henkama ankero naga'ma refko'ma huzmante'sunana ontahi'nazo? Nahigetma onensa hazenkea refko osugahaze! 4 Hu'negu amu'nontamifima mago tamarimpa osu'zama fore'ma higeta, tamagra nahigetma mono nompima zmagima omne'nea vahera huzmantage'za, ana kema refko hutera o'netize? 5 Ama kema nehuana tmagaze hinogu nehue! Tamagripina magora keaga refkohu knare antahintahine vahera omni'negeno nehiaza nehaze. 6 E'ina hugaragi, mono ne'mo'ma, mono nefuma keaga huntenakura, avreno fegia vahe'mofo zamufi hunente.

7 Na'a hanigeta ana knazana tamagra 'a e'origahaze? Na'a higeta havizama hurmantazana atrenozmantaze? E'inama hazazamo'a tamagerafa huno tmagrira tmazeri fenkami netre. 8 Hianagi tamagratmi kefozana nehutma, reramatga nehaze. E'inahu'ma nehazana, mono tmafuhe'ine tmasarehe'ina kefozama hazana atrenozmantaze.

9 Anumzamofo Kumara fatgo osu veamo'za erisanti ohregahaze hu'nea kea tamagra ontahi'nazafi? Atrenkeno tmagri'a antahintahimo'a tmazeri havia osino! Monko avu'ava'zamo azeri haviama nehia vahe'ma, amema'a omne zante monoma hunentea vahe'ma, ru vemofo a'nene, aravema hu'nea vemo'o, a'mo'ma atreno ru vene savri nehiane, vene'nemo vene'nene monko'za nehia vahe'mo'zane, 10 kumzafa vahe'ene, vahe'zante kenunu nehia vahe'ene, aka ti neno havia huno neginagi nehia vahe'ene, vahe'mokizmi zmarimpa zmazeri havizahu ke nehaza vahe'ene, krunage nehaza vahe'mo'za, Anumzamofo Kumapina uofregahaze. 11 Mago'amota e'inahu vahe korapara mni'nazanagi, Anumzamo sese hurmanteno, tmazeri ruotge hu'ne. Na'ankure Ramofo Jisas Kraisi Agifine, Anumzantimofo Ruotage Avamupi higetma, tamagra Anumzamofo avufina fatgo vahe mni'naze.

12 Miko'zana knare hu'neanki'na amne hugahue hunka hugahanagi, anampintira ana miko'zamo'a kaza osugahie. Ana hugahianagi, mago'zantere hu'na kazokzo huontesue. 13 Ne'zana narimpamofo suzane, narimpamo'a nezamofo suzanagi, ana taregara Anumzamo'a znazeri haviza hugahie. Kavufga monko avu'ava'za hunka eri haviza hu'zana omne'neanki, Ramofo suza menegeno Ramo'a, tvufgamofo su'ane. 14 Anumzamo'a Ramofona azeri oti'neankino, tagri enena anazanke huno, Agri'a hanavereti tazeri otigahie.

15 Tamagri tamavufgamo'a, Kraisi avufgama me'neana tamagra ontahi'nafi? Amane Kraisi avufa eri'na monko avu'ava zante'ma atresuana knare hugahifi? I'o ana osutfa hugahie! 16 Huge, iza'o savri a'ene monkozama himo'a, ana a'ene mago zanavufga eri'nesa'ana ontahi'nazafi? Na'ankure avontafepina amanahu ke hu'ne, Taremokea erimago znavufa segaha'e hu'ne. (Jen-Agf 2:24)

17 Hianagi mago'moma Ramo'ene hagerafino manisimo'a, avamupina znagra magoke Agranena hu'ke mani'na'e. 18 Savari monko avu'ava zampintira atretma freho! Mika kumi'ma mago'mago vahe'mo'ma nehiana, megi'a avufare nehianagi, iza'o savari monko'za nehimo'a, agra'a avufga azeri kumi nehie. 19 Tmavufamo'a Ruotage Avamumofo mono no me'negeno, Ruotge Avamuma Anumzamo'ma tmagri'ma tmi'nea avamumo'ma anampinkama mni'neana tamagra ontahi'nazo? E'ina hu'negu tamagra 'a su'ana omni'naze. 20 Na'ankure tmagrira Anumzamo'a ko tusi'a mizanteti miza sermante'ne. E'ina hu'negu tamavufgareti Anumzamofo Agi'a erisaga hugahaze.