1 Mago ne'mo'ma a'ma e'orisiana knare hugahio hutma avompima kre'naza zanku, menina kenona nehue. 2 Na'ankure monko avu'ava'za hu'zanku, mago mago vemo'a agra'a, a' antenkeno, mago mago a'nemo'a agra'a ve antegahie. 3 Vemo'a agra'a a'ene masenkeno, a'mo'a anazanke huno ve'ane masegahie. 4 A'mo'a agra'a avufgamofo kva omani'neanagi vemo kva hu'ne. Ana hukna huno vemo'a agra'a avufga kva osu'neanki, a'amo kva hu'ne. 5 Tanavufa eri mago huzankura i'o osi'o. Hianagi mago tanarimpa hutna mago'a kna amne mani'neta, nunamu hanu'e hanuta'a, amne anara hugaha'e. Hianagi anama hutesutna ete ko eme tragoteta mani'o. E'i ana hutna tanavufamofo avesizana kegva nehnakeno, Sata'ma retanaheno ke'niana, evu oramigaha'e. 6 Amagema nehuana nagrama nagesa antahiramua kazigatire, hagi ama kema nehuana ana hihogu tutu hunormantoe. 7 Nagra nagesama antahuana, nagrama a' e'ori manuankna hu'za hakare vahe'mo'za manisazegu nehue. Hianagi mago mago'mo'za rumofo rumofo museza Anumzamofonteti eri'naze. Mago'amo'za ama mani'noaza hazageno, mago'amo'a arave hu'za mani'naze.

8 Arave osu vahe'ene, kento vahe'mota knare'ma hurmantesiana, nagrama mani'noaza hanageno'e hu'na nehue. 9 Hu'neanagi tmavufamofo avesizama kva hu'za omne'nesige'za, zmatrenke'za ve eri, a' eri hiho. Ana hanagu knare'ma haniana ve eri, a' eri hu'za mani'nesageno monkozamofo zmavesi'zana omnegahie.

10 Ko'ma arave hu'naza vahe'motarega kasege huneramantoe, nagri kasegeompage Ra Anumzamofo kasege. A'mo'a ve'a otreno. 11 (Hu'neanagi anama hanuno'a, atrenkeno ve e'ori amne manino, huge znarimpa eri mago huke, ete neve ene, eri hagerafikeno), vemo'a a'amofona otregahie.

12 Ruga'amotagu anage nehue, Ra Anumzamofo keompage nagra nehue, mago neramafu a'mo amentinti nosnianagi, agri ene muse huno neminsigeno'a, agra nenarona otregahie. 13 Anahukna huno mago a'mo eri'nesia vemo, amentinti nosnianagi, agrane muse huno neminsigeno'a, nevena otregahie. 14 Ana hu'negu amentinti osu ve'mo'a, nenaro ene maniazamo azeri avusese nehigeno, amentinti nosia a'mofona neve enema maniazamo, azeri avusese nehie. Ana'ma osnigeno'a mofavre zgazniamo'a agrua osisine. Hu'neanagi menina zamagrira zmazeri ruotge nehie. 15 Hu'neanagi amentinti nosanimo ve atre, a' atre hukuma haniana, zmaze'ori zmatrenke'za ana hiho, amama mani'naza nomani'zanpina nerafuno, neresarono mago'zamo'a kina reozmanteno. Hianagi tarimpa frune manisunegu, Ra Anumzamo tagi hu'ne. 16 Hu'negu inankna hunka a'moka, ve'kamofo avu'ava'zana antahigahane? Hifi inankna hunka vemoka, akamofo avu'ava'zana antahigahane?

17 Ra Anumzamo'a magoke magoke'mofoma inankna avamente mni'nesigeno, Anumzamo'ma agima hu'nesimo'a, ana avamente manino. Ama anahukna tra ke miko mono nopina nezamasamue. 18 Mago'a vene'nemotma oku tmavufa tga hu'nazageno tamagi hu'nenigetma, tamagra oku tamufgama taga hu'neaza eriso'e hu'zankura maragu'za otiho. Mago'amo'za oku zamufga tga osu'nenke'za, zamagi hu'nesimo'za, zamagra oku zamufga tga osiho. 19 Avufgama taga hu'zane, avufgama tga osu'zamo'a amane'za me'ne. Hianagi Anumzamofo kasegema amage ante'za razana me'ne. 20 Zamatrenke'za mago mago vene'nemo'za ina avamente mani'nageno zmagi hu'ne, ana avamente maniho. 21 Kazokzo eri'za vahe mani'nankeno, Anumzamo'a kagi hu'nefi? E'i zankura kagesa ontahio. Ana hu'neanagi kagrama kankamu me'nesigenka kina vahe'ma omninaku hanunka, amne kagra ana hugahane. 22 Hu'negu i'zano, kazokzo eri'za vahe mani'nesigeno, Ramo agi hu'nesimo'a, Ramofompina kina vahera omnigahie. Anankanteke kina vahe'ma omni'nenigeno agi hunesimo'a, Kraisi kazakzo eri'za vahe manigahie. 23 Tamagrira tusi'a mizanteti ko miza sermante'neanki, vahe'mokizmi kazokzo eri'za vahera omaniho. 24 Inankna kante mago'mo'a mani'negeno agi hu'ne, nenfuga nensaroga, atregeno ana kante Anumzamofompina manino.

25 Arave osu vaheku'ma nantahige'naza zankura Anumzantegatira mago kasegea e'ori'noe. Hu'neanagi nagra Ramo'a asunku zama'areti huvempa hunantege'na mani'nomo'na, nagrani'a antahi'za hu'ama nehue. 26 Hu'negu nagrama antahuana, menima fore nehia hazenke'zampina, ana ne'mo mani'nesia kante'ma mani'nigeno'a, so'e hugahie. 27 Ko'ma, a'ma eri'nesunka, a'kamofo atre zankura ontahio. A'ma eritenka atrenesunka, a'ma erizankura ohakro. 28 Hu'neanagi arave hu'nesamoka, kumira osu'nane. Hu'negu vene omase mofa'mo aravema haniana, kumira osugahie. Ana hugahianagi, aravema hanimo'a ana nomanizampina rama'a knazampi ufregahie. Tamaza hanigu ama nanekea nehue. 29 E'igu amanage hu'na nehue, nenfugata nensarogata, knamo'a atupa hu'negu, aza'o a'ma antenesimo'a, a' onte vahekna huno manino. 30 Zmavunu nehanimo'za zavi ote vahe kna hu'za maninkeno, musema nehanaza vahe'mo'za muse osu vahe kna hanageno, mizanesesimo'a, fenoma'a omane vahe kna huno manino. 31 Ama mopafi zama eri'nenimofona atrenkeno anazamo'a razana oseno. Na'ankure ama mopane anampima menima me'neazamo'a, fanene hugahie.

32 Nagrama nentahuana ama mopafi zankura antahintahi hakarea osihogu nehue. Aravema osu'nea ne'mo'a, Ramofonku antahintahi nehuno, Ramofo azeri muse huzankuke hinogu nehue. 33 Hu'neanagi arave hu'nesia ne'mo'a, ama mopafi zanku antahintahi'amo'a nehinkeno, nenaro azeri muse huzanku antahigahie. 34 Ana hu'negenokino ana ne'mofona avesi'zamo'a fako nehie. Arave osu a'mo'o, mofamo'enena Ramofo zanku antahintahi neha'e. Avufgare ene avamupina ruotage hugahie. Hu'neanagi arave hu'nenia a'mo'a, ama mopafi zanku antahintahi nehuno, nevena inankna hu'na azeri muse hugahue nehie. 35 E'i ama ke'ma nehuana, tamagri'ma tamazeri hanavetinigu nehu'na, i'o hunoramante'na tamazeri amuho nosue. Hu'neanagi mopafizamo tamazeri fako hinketa, havizampina uofreta Ramofonte hanavetita manihogu neramasamue.

36 Hianagi, mago ne'mo'ma vene omase mofa a'erinaku nehanigeno, ve erigahie huno huntenesia knamo agateresigeno, a'eri avesizamo ra hanigeno'a, akoheno omniga osaniana, e'i kumira omneneanki atrenkeno arave hino. 37 Hu'neanagi mago ne'mo'ma antahintahi'afi huvempama huno, a' e'origahue huno hu'nesuno'a, agra avesizama kegva nehuno hantka hantako osnigeno'a knare hugahie. 38 Hu'negu agra'a vene omase mofa'ma a'ma erigahie hu'nesimofoma a'ma erisiana knare hugahie. Hu'neanagi aza'o a'ma e'orimo'a knare zantfa hu'ne.

39 Neve'ma ofrino mani'nesigeno'a, nenaro'a neve a' tfa mani'neanangi, neve'ma frisigeno'a amane Ramofonte mani'nesia vea erigahie. 40 Hu'neanagi nagrama antahuana, ana a'moma vema e'o'ri'ma amanema manisiana, rama'a muse hugahie. Nagrama antahuana Anumzamofo Avamumo nasamianke nermasamue hu'na nehue.