1 Amanahu nanake eme hzage'na antahi'noe, mago monko avu'ava zamo'a tamagri amunompi fore hu'ne, megi'a vahe'mo'za amanahu havi avu'avara nosaze. Ama ana avu'avamo'a amanahu hu'ne, mago'mo'a nefa a'ma eri'neazanku nehue. 2 Higetma tamagaze nehuta, tamasunku hugahazanagi, tusi tamavufga ra nehaze. Anazama hu'nemofona amu'nontmifintira avre atregahaze.

3 Tmage huno navufgamo'a tamagra nena anampina omni'noanagi, avamunimo'a tamagra ne mni'nege'na, iza'o anazama hu'nemofona, anampi mani'neno hiaza hu'na hago refko hunte'na ke'noe. 4 Tamagrama Rantimofo Jisasi agifima eritruma hanafina, Rantimofo Jisasi hanavefi, avamupi tamagra ne manigahue. 5 Nagrama nehuana, ana nera sata azampi avre'trenkeno amega avufga azeri haviza nehinkeno, Ramo esnia knarera avamu'a agu'vazigahie.

6 Tamagra tamagi erisaga nehzageno knarera nosie. Sikonima herazafima, osi'a zistima antageno ana mika'zama azeri zonereana tamagra ontahi'nazafi? 7 Korapa zistia erinetretma, tamagra kasefa zo-ore bretigna hutma maniho. E'i ana avamente tamage zo-ore breti mani'naze. Na'ankure Kraisi'ma atama eri'neazamo'a, kinafinti ozmahe zmagetere'nea knare antahimi'za nenaza (Pasova) sipsipi afu fri'neankna hu'ne. 8 Ana hu'negu ana knare'ma muse hanunana, korapa zistima ante'nea bretia, kumi ene havi avu'avateti nosune. Hianagi ana knare musema hanunana, zo'ore bretia, e'i tamage kene, tamage avu'avateti ene musena hugahune.

9 Ko'ma avoma krerami'nofina monko avu'ava zampi mani'nesia vahe ene tragotetma omaniho hu'na hu'noe. 10 Nagra nehuana megi'a vahe'mo'za monko avu'ava nehazampi, vahe'mofozanku ke zmanunu nehaza vahepi, zamagraguke nentahiza vahepi, krunage hu'za musufa nesaza vahepi, havi anumzante mono hunentaza vahe'ene tragotetma omnihogura nosue. Tamagrama amanahu vahe'ma zmatre varegahunema hanutma, ama mopa atrevgareho. 11 Hu'neanagi nagrama avoma krerami'nofina, mago ne'mo'ma Kraisinte namentinti nehue nehuno, monko avu'avaza nehuno, vahe zante kenunu nehuno, havi anumzante mono hunenteno, vahe huhaviza hunenteno, aka ti neno neginagi neneno, havige huno kumzafa zante hania vahe'enena, tragoteta ne'zana onetfa hiho hu'na hu'noe. 12 Megi'a mani'naza vahe'ma refko'ma huzmante eri'zana nagri zana omne'ne. Hianagi mono agu'afima mni'nea vahera, tamagra amne refko huzmantegahaze. 13 Hu'neanagi Anumzamo megi'a mni'naza vahera refko huzmantegahie. Amu'nontamifinti havi avu'ava'ma hania nera, tamagra'a ahenati atreho. (Diu-Kas 17:7)