1 Atregeno vahe'mo'za tagriku'ma antahi ramisazana, Kraisi eriza vahere hu'za nehu'za, Anumzamofo oku'zama eri ama neha'a netre'ne hugahaze. 2 Hanki menima kva hugahane huno antahi ami'nesimo'a, kvahu fatgo nehinkeno, tamage hu'za hugahaze. 3 Nagra nagesa nontahue, Kagrama refko hunante'nano, vahe'mo'za nehaza keagafi (kot) refako'ma hunante'nazana, tamage hu'na nagra'agura refko nosue. 4 Nagragu'ma antahuana nagu nagesamo'a ama hu'ne, hianagi e'izankura nagra'niagura fatgo hu'noe hu'na nosue. E'i Anumzamo Agrake refko nagrira hunantegahie. 5 E'ina hu'negu refko osuta atreta avega ante'nenkeno, huhamprinte'nea knama Ramo'ma esuno'a, Agra hanimpi oku'a frakino vahe'mofo tumopi me'neasizana, emeri ama nehuno, vahe'mofo agu'afi me'nesiazana eriama hugahie. E'i anankna magoke magoke'mofona, Anumzamo huzmasga huzmantegahie.

6 Menina nenfugatane nensarogata nagrare' ene Apolosinte'ene huntena nehuana, tamagri'ma tamaza hanigu nehue. Ana hanigeta ama kema nehu'a kemofo agu'agesa keta antahita hugahaze. Avoma krente'nea kante anteramita nemanita, mago'mofo hufenkami netreta, magomofo husga huontegahaze. 7 Na'amo vahepintira tamagrira tamazeri ruzahura nehie? Naza tamagra ante'naza zana Anumzamo'a, ontami'ne? Hagi koma tamimi'neana, na'a higeta tamufa erira huta e'ori'none huta nehaze?

8 Tamagri'ma tamesiazana ko eri avite'naze! Tamagra ko tusi'a feno ante'naze. Tagra tamaza osu'nonanagi, tamagra ko kini vahe mani'naze! Tamage nagri'ma navenesiana, tamagra ko kini vahe mani'nesage'na, tagranena anahukna huta kini vahe manigahune. 9 Nagrama nagesama antahuana, Anumzamo'a tagri Aposol vahe'motafi huvazino, henkarfana erinte ama nehie. Vahe'mo'zama ahefrisie hu'za nehazankna nehune, na'ankure ama mopafi vahe'mo'za hunte'za kiza razankna nehunkeno, ankeromo'zane vahe'mo'za neragaze. 10 Tagra Kraisi agimo'ma mareriniazanku negi vahe mani'none, hianagi tamagra Kraisimpina antahi'zane vahe mani'naze! Tagrira hanavetia omneanagi, tamagra hanave vahe mani'naze! Tamagri tmagi hesga nehazanagi, tagrira tagi hupri nehaze. 11 Hanki meninena, ne'zankura tga'neteno, tinku tave nesino, kukena timo haviza nehigeno, knona neramizageno, noma mani so'e hu'zana nomne. 12 Tagra'a tazampinti mraguzatita, eri'za erita ne'zana erifore nehune. Tagri'ma kema huhaviza hurantageta, asomu ke hunezmantone, tahageta oti hanavetita anagna e'nerune. 13 Vahe'mo'za havigema hurantageta, anankegura ontahita akoheta eri mago huta nemanune, tagra ama mopamofo kugusopa manineta, vahe'mofo agote'za orogofavegna huta meninena mani'none.

14 Ama nanekea, tamagaze hinogu kre'noramuanki, nagra navesinentoa mofavre ni'agna hu'na tamavumro nentoe. 15 Na'ankure tamagrira 10 tauseni'a vahe'mo'za Kraisimpi kva kriramante'ne'za tamazeri fatgo hugahazanagi, tamagrira rama'a neramafa omnigahie. Na'ankure nagra Krais Jisasimpinti neramafa'za hu'na mani'ne'na, knare musenkea neramasamue. 16 E'ina hu'negu nagra huhanveti'na nermasamuanki, nagri navu'nava eriho. 17 Ama ana agafare Timotina tamagritega huntogeno vie. Ramofompina kentahino amage nentege'na navesinentoa mofavre ni'agino, agra nagrama Kraisimpima mani'na neozana huramagesa nehuno, hakare kaziga maka mono nompi rempima hunermuankna hugahie. 18 Mago'a mota nagrikura, Omegahie huta nentahita, tamagra tmavufga erisaga nehaze. 19 Hianagi nagra Anumzamofo ave'sizama me'nenige'na ame hu'na esu'na, zamufga rahu vahe'mo'zama nehza kegera eme ke'na eri fore osugahuanki, nankna himamu eri'nazafi eme zmagegahue. 20 Na'ankure Anumzamofo Kumara kege hu'za omne'neanki, hihamu'ane hanave'a me'ne. 21 Tamagrira na'anku tmavenesie? Nagra sefu knone e'na eme tamazeri ftasgo hanufi, avesinte'zane rimpa fruzane esue?