1 Nenafugatane nasareheta tamagra ne ko'ma mani'noana, avamupi nena hu'za mani'naza vahe'mo'za nehazaza hu'na nagra noramasamue. Hianagi mopafi avu'avazampi mani'nagu Kraisimpina osi mofavre mani'nazage'na neramasmue. 2 Nagra rempima huramufina amiri tamiaza nehu'na, hanave ne'zana noramue, na'ankure tamagra hanave ne'zana eriga osu'naze. Tamage, tamagra hanave ne'zana eri avamentera omani'naze. 3 Na'ankure mopafi vahe'mo'za nehazankna nehaze. Na'ankure knive nereta, ke fra amu'nontamifina nehaze. Tamagra ama mopafi vahe'tfa omani'nafi? Tamagra mopafi avu'ava zampi vano hiaza nosazafi? 4 Na'ankure mago'mo'a huno, nagra Poli amage nentoe nehigeno, rumo'a nagra Apolos amage nentoe nehiana, tamagra mono ontahi vahe mani'nazo?

5 Apolosi'a inanknahu nere? Poli'na iza'ne? Tagra eri'za vahetfa mani'no'e. Ramo hurantegeta tagra eri'zana e'neru'e. Anumzamo tagripi huvazino tamaza higeta tamentinti'a hu'naza eri'za ne' tre'ne. 6 Nagra avimza asogeno, Apolosi'a ti ami'ne. Hianagi Anumzamoke azeri nena nehie. 7 Anahigu avimza kri'nemo' o tima ami'nemo enena razana omne'neanki, Anumzamo maka zana azerinena nehie. 8 Avimzama ase'nemo'ene tima ami'nemo enena magoke eri'zanke e'neriankino, eri'zama eri'na'a avamente ante'ne miza zani'a erigaha'e. 9 Na'ankure tagra Anumzamofo eri'za vahe manuketa, tamagra Anumzamofo hozane, nonkna hutma mani'naze.

10 Anumzamo'a asunku zama'areti nami'nea avamente, nogi antahi'zane vahekna hu'na nomagi trara eri agafa hunte'noge'za, mago'a vahe'mo'za anante negize. Hianagi magoke magokemo'a, nankna huno kinaku hanuno'a, kva hu'neno ana agofetura nona kino. 11 Hianagi mago'mo'e huno ru tratera nona eri agafa huno onkino, ko'ma ki'nea trateke kino, e'i Jisas Kraisi Agrake ana trara mani'ne. 12 Anante'ma mago'amo'za kisazana koliretiro, silva retiro, zgo'amo mreri'nea haveretiro, zafaretiro, rampa zantetiro, hofareti negizankna nehazankino, 13 magoke magokemofona eri'zama'amo'a eama hugahie. Refkoma hania knarera tevereti kreno eri'zama'amofona nena'a eriama hugahie. Na'ankure magoke magokemo e'neria eri'zamofo hanave'a, tevenu kreno eriama huno kegahie. 14 Hagi iza ana tra'mofo agofetu eri'za eri'nesia eri'zamo tevema oresigeno'a, mizama'a erigahie. 15 Mago'mofo eri'zama tevemo tevga resigeno'a, ana eri'zamo'a haviza huno fanane hugahianagi, ana ne'mofona, tevefinti ahokeno avreankna hugahie.

16 Tamagra Anumzamofo mono no mani'nageno, Anumzamofo Avamu'mo'ma tamagu'afima mani'neana ontahi'nazo? 17 Iza'o Anumzamofo noma erihaviza hanigeno'a, Anumzamo'a anamofona azeri haviza hugahie. Na'ankure Anumzamofo nomo'a ruotge hu'negenka, kagra ana no mani'nane.

18 Mago vahe'mo antahintahi huno, nagra knare antahi'zane vahe ama knafina mani'noe hania vahe'mo'a, agra'a ravatga osino. Hanki atrenkeno neginagi vahe maniteno, henka knare antahi'zane vahera efore hino. 19 Na'ankure ama mopafi knare antahi'zamo'a neginagi avu'ava Anumzamofo avufina me'ne. Hanki anage huno Anumzamofo avontafepina krente'ne, knare antahi'zane vahe'mo'za knare antahi'za zmireti, vahe rezmatga hunaku hazana, Anumzamo'a zmazenerie. (Jop 5:13) 20 Mago'ane avontafepina anage hu'ne, Ramo'a knare antahi'zane vahe'mofo agafa'a keno antahino hiana, amnezankna nehie.

(Sam-Zga 94:11) 21 Ana hu'negu mago'mo ugota hurmante'simofonkura tmavufa ra osiho, na'ankure maka'zana tmagri'zane. 22 Poli'na fi, Apolosi pi, Sefasi pi (Pita), ama mopafi kasefa huno mni'zampi, fri zampi, meni knafi, henkama esiankna maka tamagri'za me'ne. 23 Tamagra Kraisi suza manizageno, Kraisi'a Anumzamofo su'za mani'ne.