1 Wajcaw, ilu' inRyosil, elk k'ajabu' swe'j.

Elk to'kl c'u'lu' swe'j, na cho'n na cu' inwutz teru' tan toque'nu' tan incolche'n.

No'ken tzak' xicy'u'. Chin cole'u' jalen yil tz'icy' e'chk takle'n yi na tzan tan inxuxe'n.

2 Copon inwutz teru' na ilu' inRyosil.

Na na el intxum tetz yi at wi'nin k'eju', nin jun cu'n tz'ocoponu' tan wuch'eye'n.

3 Nin tan tu' banl talma'u' tz'ul ẍch'eybil wetz tzi'n tcya'j.

Nin chinclaxok ẍchik'ab yi e' incontr yi nternin na chitzan tan joyle'n puntil tan inquime'n.

4 Wajcaw, txant tan inlo'one'n cyak'un incontr.

Na ja wi't chincu' wuxtx'otx'.

Atin ẍchixo'l e' incontr yi chin xo'wbil nin e'.

Na ni'cu'n e' tu balum yi na baj wunak cya'n.

Na yi e' cyetz, na chixcye' tan chibiyle'n wunak.

Na yi cye', i cu'n lans tu flech.

Nin yi chitzi', i cu'n chin spar yi juyuch wi'.

5 Ma jalu' ilu' inRyosil, at wi'nin poreru', at wi'nin k'eju'.

Na yi ilu' teru', ilu' na cawunu' tibaj cyakil yi e'chk takle'n yi at bene'n tzi'n wi munt, nin yi at tzi'n tcya'j.

6 Yi e' incontr, ja cho'c tan joyle'n puntil yi ẍe'nk tan inlo'one'n.

Ja cho'c tan inxo'wse'n.

Nin ja cho'c tan banle'n e'chk tramp swe'j, poro e' te'n nchicu' tc'u'l.

7 Ma yi in wetz, list wutane'n tan tak'le'n ink'ajsbil teru' Ta'.

List tane'n walma' tan tak'le'n k'eju'.

8 Jalchan cunin tz'elepon inwatl tan tak'le'n ink'ajsbil teru' Ta'.

Tetz cu'n walma' swak'e' ink'ajsbil teru'.

Xconk e'chk kbetz wa'n tan tak'le'n k'eju'.

Yi ntaxk je'ul k'ej xconk arpa tu salterio wa'n tan tak'le'n k'eju'.

9 Ẍchiwutz cu'n cyakil jilwutz wunak, chimbitzink tan tak'le'n ink'ajsbil teru'.

Qui'c na ban alchok ama'lil.

10 Na chin wutzile'n nin yi banl talma'u' swe'j, na na jepon cu'n jalen tzi'n tcya'j, nin na xcye' tan jople'n cyakil yi tcya'j.

11 Ma jalu' ilu' inRyosil, at wi'nin poreru', at wi'nin k'eju'.

Na yi ilu' teru', ilu' na cawunu' tibaj cyakil yi e'chk takle'n yi at bene'n tzi'n wi munt, nin yi at tzi'n tcya'j.