1 I bin jalu' e'u' pujul xtisya',

¿na pe' chicawunu' sk'ilcunin?

¿Qui pe' na je' chik'abu' twi' jun?

2 Poro yi mero bintzi na je' chik'abu' chiwi' jujun.

Cho'n na xom chiwi'u' te yi e'chk ajtza'kl cachi'.

Nin mas tcu'n na jal oyintzi' skaxo'l tan paj.

3 Yi e' mal nak, e' nin mal nak cyera'tz te yi ntaxk chitz'ij.

E' cu'n la'j jetz yi quitz'le'nix. Nin ya'tz quitane'n cyeru'-tz.

4 Chin xo'wbil nin e'u', na ni'cu'n e'u' chi jun lu'baj yi cy'a'n wenen ta'n.

Na na chilam cunu' chiẍchinu' yi na ko'c tan yol scyeru'.

5 Ni'cu'n e'u' chi lu'baj yi qui'c chiẍchin, yi qui na quibit e'chk son yi na oc ẍchiwutz tan chimoxe'n.

6 Ma jalu' Wajcaw, che' xit cu'nu' yi e' mal naka'tz.

Na ni'cu'n e' tu jun león.

K'uchlenu' yi cye'. Che'lk cu'n tanu' swutz.

7 Cho'nk chiban tanu' chi na ban a' yi jalcu'n na skej tul jun tziwun.

Nka chi na ban xtze' yi na skej tan k'ej.

8 Che'lk cu'n tanu' swutz.

Cho'nk chiban chi na ban jun ẍkop yi na quim yi na baj yi ta'al stzi'.

Nka chi na ban jun ni', yi na cye' cy'en tu' yi ntaxk jepon xa'wlil.

9 Oken chik'a'kl tanu' chi na ban tx'i'x.

Che' buk'e'nu' chi na u'lij e'chk xtze' yi qui'c xac.

10 Ma cyakil yi e' balaj, ẍchitzatzink cyera'tz, yil quil yil che'l cu'n yi e' mal naka'tz swutz.

Nin ẍchixonk tul chiẍch'el, tan ẍchajle'n yi qui'c chixac yi e' mal naka'tz.

11 Kalena'tz tzun cyal:

“Bintzinin, ba'n mban yi nk'uke' kac'u'l te Ryos.

Na i' yi wi'tz ajcaw yi na cawun bene'n tzi'n wi munt.”