1 Wajcaw, elk k'ajabu' swe'j.

Na wi'nin e' yi na chitzan tan joyle'n puntil yi ẍe'nk tan inlo'one'n junawes.

Sk'ejl nin lak'bal na chitzan tan inxuxe'n.

2 Qui'c nin jun tkuj yi qui'k na cho'c tan joyle'n puntil tan inlo'one'n.

Ej nin jun c'oloj cu'n e', yi na chi'ch chic'u'l swe'j.

3 Poro Wajcaw, yi na chinxob, cho'n na k'uke' inc'u'l te'ju'.

4 Cho'n k'uklij wetz inc'u'l te Kataj Ryos, nin na wak' ink'ajsbil tetz, tan cyakil yi e'chk takle'n balaj yi suki'nt ta'n swetz.

Qui tzun chinxob tetz alchok takle'nil yi na chitzan wunak tan xtxumle'n swe'j, na xomij i' swe'j.

5 Cyakil nin k'ej, tx'ixpu'n cunin inyol cya'n, na yi cyajbil i'tz yi ẍe'nk ne'l cu'n swutz.

6 Nternin na chitzan tan joyle'n puntil tan imbiyle'n.

Xomche' cyen tu' tan inq'uicy'le'n, yi na' na na'j nint.

Na yi cyajbil i'tz tan inquime'n cya'n.

7 Wajcaw, ¿iẍkaj ẍchiclaxk tzunk yi e' juchul ila'tz tanu'?

Chi'chok quen bin c'u'lu' scye'j. Che' xitcunu'.

8 Wajcaw, sak swutzu', yi jatna' tir yi nne'l ojk tan incolol wib ẍchiwutz yi e' incontra'tz.

Jat lo' tir yi ja nok' tan paj yi e' incontr.

Poro nachij tanu', na na cu' tanu' swutz yi teru' liwru'.

9 Poro na el intxum tetz, yi kol xomu' swe'j, chelepon ojk yi e' incontr.

Na yi na injak ẍch'eybil wetz teru', na che'l ojk tzinwutz, na jun cu'n xomij wi'u' swe'j.

10 Poro cho'n k'uklij inc'u'l te Wajcaw.

Nin na wak' k'ej yi yol i' yi tz'iba'nt cyen.

11 Cho'n k'uklij wetz inc'u'l te Kataj Ryos.

Nin na wak' ink'ajsbil tetz i', tan cyakil yi e'chk takle'n balaj yi suki'nt ta'n swetz.

Qui tzun chinxob tetz alchok takle'nil yi na chitzan wunak tan xtxumle'n swe'j, na xomij i' tan inq'uicy'le'n.

12 Nelepon cu'n te yi minsuk teru'.

Nin tzatzin cu'n tzimban tane'n.

13 Na ja chinclax tk'ab quimichil tanu'.

Nin qui ntak'u' ama'l tan incwe'n junawes, bantz inxome'n te tajbilu'.

Na ilu' ak'ol wajtza'kl, ilu' intxekbil tane'n.