1 Devitgo te Husai dali po mia silama da, teda aga te bulu du bagede bidali tagalama, tama dwasianu pabo gana yali. Tama Siba, te Mefibosetgo sę bidi, te asu, agaba gesabidi ununani. Sibago te 200 bret me, te augwaligo olali te duani wain wai te 100 me sobadi, te ni fik wai duani te 100 me, te meme tigiwali delide te augwa wain wę tede tabiai elaluali. Tama aga te nai dabe te donki siba munama, tama Devitba selasa asai. * 2 Sml 9:9-10 2 Tama Devitgo agaba hanalu wali, “Magi baso nago te nai dabe sesaliwe?”

Tialima, Sibago te tama po wei ponani, “Te e donki dabe te nago sibi dabego dugulasa bilabo donki dabe dao. Tama te bret, me te nedu du, te nago hanigo tumainu ebo nai da. Tama te wain wę da, augwa te kemi tǫ wa paide bilalu, tama augwa tigi te hagela ebaso tumainu yabo wę dao,” Sibago te po wali.

3 Tama kingo te tama po wai, “Wiegi yai mu dao. Tiali goli, eno koneainu yai, te naga tonalubo bidi, Mefiboset, aga menade bidibawe?”

Tama Sibago te po wai, “Aga te Jerusalemde me bididubao, magi baso meni, aga te homu ebao, megi te Israel dabego aga te king pedalumainu nigilama, tama agai te Israel dabe tonalu, te aga wąį nǫų, te king Solgo, yali tiwai gilama yaibao,” wali. 4 King Devitgo te tama po odolama, tama aga te Sibabolo te tama po wai, “Mu da, agawe? Tialima, megi eno te Mefibosetgo doado bage tigidali te nageba mawaibao,” wali.

Tialima, Sibago Devitba te tama po wali, “Ei, king, ena te nago olo sę ebo bidi tiwai me deli dao. Tama eno homugo te eno ebo sę tigidaligo te nago homu wiegi yai pemene ilaibao,” wali.

5 Devitgo te Siba dali po miani silibo si da, teda Devit te aga hani dabe dali te Bahurim buluba pali. Augwali te pesageba sabalubo sogo, te Solgo hani bidi me deli te buluba dįą aselama, te Devit dali deli gesabidi ununani. Aga nogi te Simei, tama aga te Gerago ogwa da. Simeigo te wado po wabo sę eyu, tama dwai po Devitba weyu, tama asidualio. 6 Te Simei te Devit me aga ofisa dabe augwali pąba asali sogo, agai te masigi meba augwaliba sąwani. Agai te hauwa we bidide me, te Devit tonalubo ami bidi dabede me, te wi me isąyu, augwali te Devit dali peyu, tama Devit te augwali tomode bidai. Te aga wi me ebeo. Menio. 7 Simeigo Devitba te dwai po te tama wai, “Nage gedao! Nage te bidi ela mubo bidi dao! Nage dwai bidi, nage gedao! 8 Nago te Sol sela sąnama, tama aga bidali pesage hasegelama, tama king pedelali. Tama nago te Solgo hani bidide te bidi hauwa ela muani. Tama tibaso, megi God Genuai Bidigo nago te dwai kolesaga yali wei ponobao. Tama Genuai Bidigo nage hasegelama, tama naga ogwa Apsalom te Israel king pedalumainu nigilaibao. Nage te bidi elibo bidi yai baso, tama tiyu, Godigo nage te dolobao,” te bidi Simeigo te po wai.

9 Tama Abisai, te Seruiago ogwago, te Devitba te tama po wali, “King, magi baso te dwai yowigo nageba te dwai po wali gogola tagalaliwe? Te eno aga dogoni togomainu ilao,” wali.

10 Tiali goli, kingo Abisaibolo me, te aga ama Joapba me, te tama po wai, “Te dage sigo sę me menio. Te aga gogola tagalao. Te Genuai Bidigo te bidiba po walobaso, te agai enaba te dwai po waibaso da, teda dego agaba hanalu waibawe, ‘Magi baso nago te tobage po obawe?’ ” 11 Tama Devitgo te Abisaibolo me te gasa ofisa dabeba te tama po wai, “Odao. Te ena ogwago digi ena ela muabo homu eyu da, teda magi baso da te e Benjamin hani bidigo enaba te wado po wabode te da midigi sobawe? Genuai Bidigo digi agaba obaso, te enaba dwai po omainu homu yali bogo, tama tibaso, aga te po omainu gogola tagalao. 12 Genuai Bidigo te eno ebo dwai kolesaga koneama, tama Genuai Bidigo te homu eyu, te agai enaba te dwai po wali dabe hasegelama, tama aga te wiegi yai sę enaba yaibawe? Te dago sueibao,” wali.

13 Devitgo te tama po ola silama da, tama aga dali, te aga hani bidi dabe dali, palio. Augwa te wali pali sunumi, te bulu du pąba pabo sunumi elaluali. Tama Simei te bulu du ugwadu soyu, tama Devitba dwai po wabo sę eyu, tama agaba te masigi me tǫ dulu sąbo sę yai dao. 14 Tiali goli, king dali te ami bidi dabe, me te aga we bidi dabe te pelama, tama augwa te painogo yali buluba sabolalio. Augwali pali te bomo mu yai, tama tibaso, augwa tede toma nanio.

15 Te Apsalom dali, te gasa Israel dabe tigidali me, te Jerusalemba sabolali. Tama Ahitofel te Apsalom dali asai. 16 Tama nosali, Husai, te Devitgo abagi, pali, te Apsalom dali deliba gesabidi si ununama, tama agai Apsalomba i weyu, te tama po wali, “King o, nage te sesabi gana elama, bidagameo!”

17 Apsalomgo te po odama, tama aga Husaiba te tama po wai, “Ei, nage te Devitgo wiegi yai abagi me deli dao. Magi baso nage te aga dali pabewe? Te kolesaga te abagi kolesaga ebo wiegi yai da, agawe?”

18 Tialima, Husaigo Apsalomba te tama po wai, “Menio. Te Genuai Bidigo dali, te e bidalubo we bidi dabe me, te tigidali gasa Israel dabe daligo te king me deli nigilibaso da, teda ena te aga dologoba pelama, tama aga dali bidaibao. 19 Tama ena te nago sę bidi bidisąyu da, teda ena dego sę bidi bidigi pagawe? Polobadu eno te nago ayago sę yali, tama megi da, te aga ogwa, nago sę yaibao,” te po wai.

20 Tialima, Apsalomgo Ahitofelbolo te tama po wai, “Megi da, te dagego enabolo waiąo. Te eno magi yagawe?”

21 Tama Ahitofelgo te po wali, “Nage pelama, te naga ayago si wali we hani dali pigi pao, agai te kingo be tonalumainu taga pai. Te nago tama tiyu da, teda te tigidali Israel we bidi hanigo te tama koneaibao, nago te naga aya dali boi bidi ebo tiwai mu pedelaibao. Tama tiyu, te megi nage wali painu ebo we bidi tigidaligo, augwa te nage wali pabo bomo mu yaibao,” wali. 22 Ahitofelgo te tama po wali, tialima augwa te kingo be ugwadu daiba te bidi meba tagala palama, tama augwa te ugwa be me deli sę yani. Tama tigidali we bidigo gedude Apsalom te ugwa be tomoba pai. Tama augwa te aga ayago si wali we dabe sibi hani odasa aselama, te Apsalomgo augwali deli deli dali pagela pimainu yai dao. * 2 Sml 12:11-12 23 Te bidi dabe augwa te Ahitofelgo po odali sogo, augwa te homu eyu, te po te Godigo digi pusai po wali te homu elama, tama augwa wali mu palio. Hasia bolo Devitgo te Ahitofelgo po tigidali wali pali, tama megi me Apsalomgo wali pabo homu yalio.