1 Tiali goli nosali, Apsalomgo te wiegi yai karis me deli me, te hos meba me selama, tama te aga meba me painogo ebo sogo, aga te karisde dualasa peyu, te polasa pabo bidi te bidi sese si olama, nogo si, te 50 bidi me salio. 2 Tigidali side aga te kigamu digi mu hogodama, tama pelama, te hanu tomoba soabo sunumi pąba dolalugi piduali. Tama bidi me deligo te aga abagi dali wado po olama, tama te kingo dodolomainu asobo sogo da, teda te Apsalomgo aga i olama asobo si, tama agaba te tama po hanalu wali, “Nage mena bulu bidi dawe?” Tama te bidigo te aga te mena hani Israeldu asali po te agabolo weyu yai dao. 3 Tialima, Apsalomgo te sęgęgo page koneama tama da, te Apsalomgo agaba te tama po weyu yai, “Odao, te nago po dolo mu da,” weyu yali. “Tiali goli, hobede ya, kingo te nago po dagalumainu ebo bidi me nigilibeo,” tama po wali. 4 Tama Apsalomgo te bidiba te tama po weyu yai, “Eno homugo ena digi ena te po odobo jas bidi bidabo homu godolo ebao. Te ena tama te bidigi sogo da, teda eno te sęgę elalubo bidi dabego po dagaligi baso, tama te augwaligo po te eno bugagia dodoligi dao,” wali.

5 Tama me, te bidi me deligo te Apsalom sulama, tama agaba kidu sugunagasu, te agaba genuai nogi magasubaso da, teda Apsalomgo te bidigo te tama temainu eyu gogoliyu, me sula tagalobeo. Menio. Te Apsalomgo aga pagea siyu, nono nani. 6 Tama Apsalomgo te bidi dabe augwa sęgę te kingba dodolainu asobo side, te tama naga tialio. Tama te kolesagago, Apsalomgo te Israel bidi dabego homu kekelama, tama augwaligo aga godolo homu yai. 7 Te kibu be me si me si te bidama da, tama Apsalomgo te king Devitba te tama po wagi pali, “King o, te eno bomai po me deli te Genuai Bidide dąų walali po usu nigi peyu, tama nago ena te Hebronba pomainu yao homu yaibawe? 8 Magi baso meni, te ena te Gesur te Siria tǫ pedaide bidali sogo, eno te tama bomai po Genuai Bidiba dąų walali, te Genuai Bidigo ena te Jerusalemba ma odasa pabo sogo da, teda eno te agaba lotu waibao po wai,” Apsalomgo te po wali.

9 Tialima, kingo agaba te po wai, “Nage te nagame yai homu dali pao,” wali.

Tama tialima, Apsalomgo te Jerusalem tagalama, tama te Hebronba pai dao. 10 Tiali goli, agai te tigidali Israel hani mebabolo te po sela pabo bidi meba tagala palali. Tama augwaliba te tama po wai, “Te dagego te biugel bu wabo odobo si da, teda dagego te tama i waiąo, ‘Apsalom te Hebronde king pedelama, bidiba,’ po wao,” wali. 11 Te aga Hebronba pabo sogo, Apsalomgo te Jerusalem bidi dabe te bidi sese nogo si, 200 bidi dabeba hanalu, te aga dali pinao po wai. Tiali goli, te bidi dabego te Apsalomgo elalubo homu kolesaga page te mu konesiąwai. Augwa te aga wali odolali tama palio. 12 Augwa pelama, te Hebronba sabolama, tama Apsalomgo te ofa me yai. Tama aga te ofa yali sogo, agai te taun hanu Giloba te bidi meba tagala palama, te Ahitofel sela asomainu yai. Ahitofel aga te king Devitba wiegi yai homu kolesaga mabo bidi dabede te bidi aga me deli dao. Tama aga te Gilo, te aga hanu tagasu, tama Apsalomba asai. Megi da, te Apsalom wali pabo bidigo namba te genuai pedaliyu, tama augwali te bomai hani mu pedelalio.

13 Bidi me deli asu, tama king Devitba te tama po wali, “Megi da, te Israel hani bidi tigidali te Apsalomba wali painu sisi elalubao,” wali. 14 Devitgo te odolama, tama agai te aga dali Jerusalemde bidibo ofisa dabe te sisinama, tama augwaliba te tama po wai, “Dago te Jerusalem polo tagalama, tama polo wi pinao. Tiyu, Apsalomgo da tigidali elabuo. Da polo asesa pinao. Te tama tisąyu da, teda te Apsalomgo hani polo asiyu, te hanu dolama, tama te hanude we bidi tigidali elaibao,” Devitgo te po wali.

15 Tialima, te kingo ofisa dabego te tama po wei ponani, “King o, te nago mena sę yainogo ebo, dago te nage wali pabo naga te sisi elalubao,” wali.

16 Tama tialima, te king dali, te aga we wai dabe me, te aga ofisa dabe me, augwa te Jerusalem hanu tagalama, palio. Tiali goli, aga te namba tu wali te nogo si wali we hani te bidimainu yali, te kingo be tonalumainu tiai dao. 17 Te king aga hani dali peyu, tama te Jerusalem taga painu yali sogo, augwali te hanu sesege dage badu mu elalubo be pąba doligi pali. 18 Tama king dolaludubadi, tama te ofisa dabe nogo sągą sąyu, tama polasa peyu, te king tonalubo ami bidi hani dabe dali pela wali, te augwali te hani Keret me Pelet hani dabe tama. Tama te Get hanu ami bidi tigidali te 600 bidi me te augwa nogo sągą sąsą pelayu, palio. Polobadu te 600 ami bidi dabe te Get hanude Devit dali bidai, tama augwa te aga wali asali.

19 Tama kingo te tama po Itaibolo wai, te Get hanu ami bidi augwa polalubo bidibolo, te tama po wai, “Magi baso nage te da dali painogowe? Nage te ma geasa pelama, tama te king Apsalom dali bidigi pao,” wai. “Magi baso meni, nage te gasa badu bidi dao, tama nage eba bidagasali, te naga bulu tǫ pedai digibulu taga soyu, bidagasai dao. 20 Nage ede te pęwadage sogo naga bidali, tama tiyu, eno homugo nago te bidibo bulu tagalumainu ilama, tama da dali bilimainu me iligobeo. Da te bulu wau subigila bilalubo bidi tiwai bilaluaibao. Te nago naga hani selama, tama dage ma geasa peyu da, te wiegi yai dao. Tama eno homugo te Genuai Bidigo nage bugagia wiegi yai ilama, tama nage sesemane sogo tonalumainu homu ebao,” Devitgo te po wali.

21 Tiali goli, Itaigo Devitba te tama po wai, “Te Sesemane Sogo Bidibo Genuai Bidigo nogide, eno mu po tama obao, te ena sesemane sogo nage dali bidada paibao,” wali. “Tama nage mena buluba pobaso, te ena nage dali paibao. Tama augwaligo te nage ela mubaso da, teda augwa ena me ela mumainu yaibao,” Itaigo te po wali.

22 Megi da, Devitgo agaba te po wai, “Te usu da, dage ena dali pogǫǫ.” Tama tibaso, Itai me, aga ami bidi dabe me, te augwa we wai puluba dali, augwa te gasa hani wali palio.

23 Te Devit aga hani dali augwa te Jerusalem taga pabo sogo, te tigidali we bidi gela umabo sę elama, mu dwai homu dene ebo gela wai. Tama king te aga hani dali te wę Kidron nogelama, tama te bulu kemi tǫ wa pai bulu pedaiba poloba pelawali. 24 Te Devit doligi pelama, tama te we bidi dabe paboba tonani sogo, te pris Sadok me, Abiatar me, tama te Livai dabe me bidalubo suali. Te Livai dabego te Dąų Wali Bomai Po Munalubo Halobage te tolasa aselama, tama te tǫba aiya mubo suai. Tama te pris Abiatargo te ofa ebo sę ela pidubadi, te we bidi augwa te Jerusalem hanu taga pabo sogoba usu nanio.

25 Tama kingo Sadokbolo te tama po wai, “Te Dąų Wali Bomai Po Muani Halobage te hanuba ma sela pao,” wai. “Te Genuai Bidigo enaba wiegi yai homu pemene eyu da, teda agai ena te ma odasa aselama, tama eno te Dąų Wali Bomai Po Munalubo Halobage me, te aga bidibo ugwa be me, te eno sueibao. 26 Tiali goli, agai enade wiegi yai homu pemene isiąbaso da, teda tagalao. Te agai mena sę enade yainogo homu yali da, aga te sę emainu yaibao,” Devitgo Sadokbolo te po wali.

27 Tama Devitgo te po ma naga te Sadokba weyu, te tama po wai, “Nage te nosali pedalubo sę koneani bidi dawe, ma meniwe? Eno e tama po obao. Nago te naga ogwa, Ahimas, me Jonatan, te Abiatargo ogwa sobadi elama, tama dage te taunba te duga wiegi yai nagame yai homu pemene dali ma geasa piąo,” wali. 28 “Ena te kemi tǫ wa pai buluba pelama, ena te wę nogebo pesageba sabalubo sogo da, teda te Jerusalemde pedelali sę po te dagego ola tolobo po odainu, te dage tonalu te sogoba usu naibao,” wali. 29 Tialima, Sadok de Abiatar dali sigo te Dąų Wali Bomai Po Muani Halobage te ma sela pelama, tama augwa te Jerusalemde bidali.

30 Tama king Devit te homu sęgę mu ebaso, tama aga sągą nadoba su dia sanama, tama ugwa namego aga tobolu mesegaluali. Tama aga gela umabo sę elama mu weyu, tama peyu, te sunumidu wali palio. Te ugwaba holobo sunumi te Oliv bulu du bolama pabo sunumi elaluali. Tama aga dali pali we bidi tigidali, augwali me te augwa tobolu mesega selama, tama augwa gela wabo sę ela peyu, tama palio. 31 Tama augwali pelabadi, te sogo Devitgo te tama po odali, “Ahitofel pelama, te Apsalom aga hani dali tau sigi pai da,” po walio. Tialima, Devitgo te tama gedu haluasa po wali, “Genuai Bidio, nago te Ahitofelgo wabo po te tedali gasagi yai omainu ilama, te mu geda mumainu ilao,” wali.

32 Augwali te bulu duba holama, tama augwa te Genuai Bidiba lotu wabo pesageba sabaligi palio. Augwa teba sabalubo si da, teda te Devitgo abagi me deligo te aga dali deliba gesabi ununama, tama aga dali painu yali. Te bidi aga nogi Husai, tama aga te Arka bulu bidi dao. Agai te aga ugwa pisilama, tama aga tobolude tǫ piali, te aga Devitde genuai homu dene ebo ola mayu, te tiwai yai dao. 33 Devitgo aga sulama, tama agabolo te tama po wai, “Te nage ena dali asainogo da, teda nago dabolo te nage dago tonalubo sę dene mawainu ebao. 34 Tiali goli, te nago ena tau sabo homu ebaso da, teda te wiegi yai da, te nage te Jerusalem moni hanu tomoba ma pelama, tama nago te Apsalom subaso da, teda nago agabolo te tama po wao, ‘King, polobadu eno te wiegi yai homu ilibo kolesaga te nago ayabolo mabo sę yai. Tama megi da, ena te nago sę bidi me deli tiwai bidaio,’ te tama wao. Te nago te tiwai ebaso da, teda nago te Apsalomba mawainu ebo homu kolesagago te Ahitofelgo agaba mani homu kolesaga te aiyaba elalueibao. 35 Odao, te pris si, Sadok me, Abiatar si me, te Jerusalemde bidiba,” po wai. “Tama nago te kingo bede tigidali odali po te augwali siba waibao. 36 Tama Ahimas, te Sadokgo ogwa, te Jonatan dali, te Abiatargo ogwa, augwali si me te augwa si aya dali bidibao. Te mena po nago odali, teda nago augwali siba wagi pobaso, tama augwali sigo te enaba te po wagasomainu yaibao,” Devitgo Husaibolo te po wai. 37 Tialima, Husai, te Devitgo abagigo te Devitgo po wali pelama, tama te Jerusalemba ma geasa palio. Te aga pelama, te Jerusalemba sabaligi pabo sogo, te Apsalom me te hanuba sabolagasalio.