1 Devitgo te tama po te bidi dabebolo hanalu wali, “Te Solgo hani sibi bage meba elalubawe, ma meniwe? Te elalubaso da, teda eno augwali wiegi yai bugagia ilainu homu yali, te Jonatango wiegi yai kolesaga enaba yali te wei ponainu tiaibao,” wali. * 1 Sml 20:15-17 2 Te sogo te Solgo hani sibide te sę ebo bidi me deli bidali, aga nogi te Siba. Tialima, augwaligo aga i olama, aga te king sugi somainu yali. Aga te kingba sabalubo si, tama te kingo agaba te tama po hanalu wali, “Nage te Siba da, agawe?” Tama aga te tama po wai, “Awe, ena tama dao.” 3 Tama te kingo agaba ma hanalu wali, “Te Solgo hani sibi bage meba elalubawe, ma meniwe? Te elalubaso da, teda eno augwali wiegi yai bugagia ilaibao, te eno Godiba bomai po dąų wali gilama tiainu obao,” wali.

Tialima, Sibago Devitba po walali, “Te Jonatango ogwa me deli bidibadi goli, te aga sągą penelama, dwai bidibao,” po wali. * 2 Sml 4:4 4 Tama kingo te po wali, “Aga menade bidibowe?” Tama Sibago agabolo te po wai, “Aga te taun hanu Lodebarde bidibao, te Amielgo ogwa, Makirgo bede bidibao,” po wali.

5 Kingo te tama po odama, tama agai te bidi meba tagala palama, te Jonatango ogwa odasa asomainu yai. 6 Te bidi aga nogi te Mefiboset dao. Aga te Jonatango ogwa, tama te king Solgo ogwago wai, te aga nǫų wąį dao. Te aga sabalubo sogode, teda aga kidu sugunugulama, tama aga gesabidi tǫba pogulama, te Devitgo nogi ugwaba siyu tama tiali. Tama Devitgo agabolo te tama po wali, “Mefiboset, siade dao.” Tama Mefibosetgo te tama po wali, “King o, ena naga sę bidi naga dao.”

7 Tama Devitgo te tama po wali, “Nage wi munu me elamuo. Eno nago aya Jonatan te homu kone me elalubadi geani, tama tiyu, eno te wiegi yai kolesaga nageba yabo homu ebao. Te eno nageba te nago nǫų wąį Solgo tǫ tigidali te nageba mawaibao. Tama tigidali sogo nage te enaba naga aselama, nai tuagasu yagameo,” wali.

8 Tama Mefibosetgo gesabidi te tǫba ma pogulama, te po wai, “King, magi baso nago te tiwai wiegi yai kolesaga enabolo yainogo obawe? Ena te olo nai tobage naga, te isali yowi me deli te tiwai dao,” wali.

9 Mefiboset pai madigi, tialima te kingo Siba i olama, asobo side tama agabolo te tama po wali, “Te naga genuai bidi Solgo tigidali tǫ dali doado bage me, tama agai hani sibi bage me, megi eno te Mefibosetgo nogoba manio, te Solgo nǫų wąį dao. 10 Tama tibaso, nage dali, te naga ogwa dabe me, te naga sę ebo bidi dabe me, te tǫde gi buluiąo. Tama dagego te gide inayu tau yai nai selama, tama selasa asiąo. Tama tiyu da, te Solgo hani sibi te augwa nai elalueibao. Tiali goli, Mefiboset aga da te ena dali sesemane sogo nai tuagasu daibao,” Devitgo te po wali.

Te bidi Sibago ogwa te 15 elaluyu, me te sę bidi dabe te bidi sese tama elaluali. 11 Tialima, Sibago te tiwai po Devitba wali, “King o, te nago wali po tiwai gilama te tigidali sę eno yaibao,” wali. Te sę dabe elama, nosali Mefiboset te king Devit dali nai tugi peyu yali, te king aga ogwa me deli tiwai mu gagawai dao. 12 Mefibosetgo ogwa me deli te ogwa bidi bidali, aga nogi te Mika. Te sogo te Sibago hani sibi bage bidi me we, te Mefibosetgo tǫde sę iduali. 13 Tiali goli, Mefiboset te Jerusalemde bidali, magi baso meni, tigidali sogo bidibo dononama, te aga king Devitgo bede nai tudali. Te Mefibosetgo sągą si te penelama, dwai elaluai dao.