19
Yisasia ve alave apase yafe hu-maine.
1 Yisasia mukia mani kema hu hanoma nehunoa Kalili kotega ataleno Yotani limoa ame kaiyaga Yutia kotega uvayi hu-maine. 2 Mukia veamoya Yisasi akave vageno kaliamia alino kanale hu-ma-tene.
3 Nagoa Falasia vayamoya Yisasite eya kanale ohunea kema hisiafene huya nagola aye-vataga hisaya kea mage huya havigae “Nago kanomoa aamoma nehia kavafe atalesia agesama hisigenoa kanalelagino atalesio? Kahegi kemoa ani yafena naane nehie?” huya havigae. 4-5 Hageno Yisasia kenonaamia mage huno hie Tamakaya Anumaya Koti avona hapalitama ohavinao? Mage huya kae-malenayane
Anumaya Kotia ehe yupa aepa heno vene aene talo hu-maleteno mage hie “Vene aene talo humalenoafe nago kanomoma itaafoamoma ataleno aamoene ai-lokaeno maisiana ani tolemogania nagoke anaugafa kaligae.” huno kae-maleneane.
6 Naa hu-maineafe nagoene tolea omainaagi menia nagoke anagufa kaliana mainesaageno Anumaya Kotia anakaila alino hagelafi-na-teneanageno nago mopale kanomoa ani alavelamogani mai yaania alino apase oana-tesie.” huno hie. 7 Higeya Falasia vayamoya Yisasife mage huya havigae “Naa higeno Mosesea nagola kahegi kefina ma kea huno taha-pai-maineane ‘Vemoa aamona avo kaeno neamino hu-tesigeno hano huno ugahie.’ huno hu-maineane?” huya hae. 8 Hayanagi Yisasia mage huno hama-paiye “Nayona ehela ani yafena Anumaya Kotia malegeno omalenea kavala haneanagi tamakaya ke ohavitama veganokano haya yafe Mosesea ama atalesaya kaana tama-ve-li-maineane. 9 Nagaya tamaha-nepauve nago kanomona aamoma kumaima ohenesigenoma anauamoa neataleno nago ama alisiana ani kanomoa kumai kano maine.” huno hie.
10 Higeya agaiaenema tokaeya nemaiya anagamoya Yisasina mage huya hapaiye “Alavemoya tokaeya maisaya auava yamofe tusia tokiya kema hanesigetahena afaa neyave maineta anea oalisune.” huya hae. 11 Hageno Yisasia mage huno hama-paiye “Haya kea tamage nehagi mukia neyavemoya anema oalisaya amukoamia omaleneanagino Anumaya Kotia tokiya amaminea vayamoyage anea oaligahae. 12 Nagoa neyavemoya anema oalisaya tokiyaamia hane. Ani vayapitila nagoa neyavemoya itaamimo ama-tenea yupa amakayamoma fayi-talenesaya vayama mainesayana anea oaligahae. Nagoa neyavema alu vayamoyama amakayamoma fayi-talenesaya vayamoya anea oaligahae. Nagoa vayamoya ‘Anumaya Kotia kava yagai-la-tesie.’ huya amakesa havi-mainesaya vayamoya Yisasi kema hama-paisaya yafenagiya ‘Anea oaligahune.’ huya hugahae. Ani kema havilinesia kanomoa ani kava hisie.”
Yisasia mage hu-maine “Nafaneyaga amatalegeya nagaitega eho.” huno hu-maine.
13 Veamoya osi osi nafaneyaga Yisasife “Aya maleno amakaife Anumayamotega havigesie.” huya amavaleya neageya agaiaene tokaeya nemaiya anagamoya ageteya “Naa kavala ohiho.” huya ke-amaki-mainae. 14 Ke-amakiyanagi Yisasia mage huno hie “Amatalegeya nagaitega eho. Nafaneyaga nagaite esaya yafena kahegi oama-teho. Naa huya nafanemogami avamete maisaya veamoya mage hugahae ‘Tagaya tokiyatia omalenegi Anumaya Kotiga kava yagai-lato.’ huya hugahae.” huno hu-maine. 15 Anumaya Kotia hamamaesia yafe ayana amaugafale maleteno neamataleno alu kotega umaine.
Afenoyamaa kasago hu-mainea kanomoa Yisasite eno kea kea hu-maine.
16 Nago kanomoa Yisasiteka eno mage huno havige “Hu-mave-nelina kanomogae nagaya hana augafa kanale kava hutena agola maige maige hisua nahaimula alisue?” huno havige. 17 Havigegeno Yisasia kenonaa mage huno hie “Naa higeka kanale auavafena nahavi-negane? Nagoke kanoa Anumaya Kotia agaiage kanale kano maine. Agola maige maige hisana kahaimuma alinukahena Anumaya Koti kahegi kea akave malo.” huno hie. 18 Higeno Yisasifena mage huno havige “Hanaa kahegi kehe nehane?” huno higeno Yisasia mage huno hie “Vayala haegeno ofalino. Kumai he yana ohuo. Musufayana ohuo. ‘Ma kanoa havi kava nehie.’ huka havigea hu-oato. 19 Itakafokamo kea oatagaeka anakia alisaga huo. Kagaika kaugafahena kahaiya avamete huka ania huka negafu augafahena kahaino.” huno hie. 20 Higeno ani kanomoa mage huno hie “Nagaya mukia ani kea akave nemaloe. Na yamo nagoa kosa he-ona-tene? Na yaene hisue?” huno hie. 21 Higeno Yisasia mage huno hie “Nago kavaene hisanana kosa he-ga-tesigeka fatago kano maigane. Mukia malenana mone afenoyayagaka alika fako faka huka moneamima omalenesia veane amamisanageno Anumaya Kotia ikapinaga hanea afenoyana kamigahie. Afenoyayagaka amamite amamite huteka nakave eno.” huno hu-maine. 22 Higeno ani kanomoa ani kea haviteno mone afenomaamoma kasagoma hu-mainea yafe oatalesia agesa haviteno aipamoa tusi kanaage higeno umaine.
23 Vigeno Yisasia agaiaenema tokaeya nemaiya anagafe mage huno hie “Tamage huna tamaha-nepauve mukia mone afenoyaamima hanesia veamoya tusia kasageke huya Anumaya Kotife ‘Kava yagai-lato.’ huya hugahae. 24 Nagoene tamaha-nepauve nagola pulumaka kana afumo agia kemolomoa nekayamo kapima hai-falesiana afaa yoyo huno hai-falegahianagi mukia mone afenoyaamima hanesia veamoya Anumaya Kotife ‘Kava yagai-lato.’ huya kasageke-voke hugahae.” huno hu-maine. 25 Higeya agaiaenema tokaeya nemaiya anagamoya amamayo neaiya mage huya hae “Naama hu-mainesiana Anumaya Kotia hana veamogami amaku amame ali-gatigahie?” huya hae. 26 Hageno Yisasia neamakeno mage hie “Veamogamina amukoamia omaleneanagiya ohugahayanagi Anumaya Kotia mukia kavala hisia amukoa haneanagino afaa huno ali-gatigahie.” huno hie.
27 Nage higeno Pitaa mage huno hie “Havio tagaya mukia yatia ataleteta kakave neonagi tagaya na ya aligahune?” huno hie. 28 Higeno Yisasia mage huno hama-paiye “Tamage huna tamaha-nepauve haegafa kanamoa mukia yana yaufa ya falote hisigena nagaya ikapinagati emainoa kanoa vayamo natenea nafanemona kava yagaisuafe tusia tokiya hale yamaa hanea siale mainesugetama tamakaya nakave nehaya vayamogatama tuelufua (12) siale mainetama tuelufua (12) Isaleli nofi veamogamina kava yagai-ma-tegahae. 29 Mukia veamoya nagaifema haviya veamogamina nagai kema hama-paigahena noamiene nepuamiene amasaamiene itaafoamiene nafaneamiene hoyaamiene amataleya visagenoa Anumaya Kotia anonaamia atalenesaya yaene vani hataletia (100) mani yayaga amamiteno maige maige hisaya hamaimuene amamigahie. 30 Meni kanafina hagoteya mainesaya veamoya ani kanafina haenagalafa maigahagi meni kanafima haenagalafa mainesaya veamoya ani kanafina hagoteya maigahae.” huno hu-maine.