1 Ani yupa Yisasiene tokaeya nemaiya anagamoya Yisasite mage huya me havigae “Hana kanomo muki vayala amakaseno Anumaya Koti kava yagai-mainea kumatela uhakote-mainea kanoa maigahie.” huya havigae. 2 Havigageno Yisasia nago osi nafanea ke higeno egeno mukia vayamogami amunopi avaleno he-ti-tene. 3 He-ti-teneno mage huno hie “Nagaya tamage-lafa huna tamaha-nepauve tamakayama tamakua ai-yahae hutama nafanemoyama amaugafa aliya nohaiya kava hutama osi nafanemogami avamete ohisayana Anumaya Kotima kava yagai-mainea kumatela hai ofalegahae.” 4 Nago kanomoa agaia augafama alino ohaino osi nafanemo avamete maisiana ani kanomoa nagoa veala amakaseno Anumaya Koti kava yagai-mainea kumatela hagote kano maigahie. 5 Nagoa veamoya nagaifema huya ma ma osi nafanema avaleya falu fala hu-tesayana nagaienena navaleya falu fala hu-nenatae.

6 Nagoa veamoya nagoma nagaife haviya amakupi malenaya anagapiti nago osi kanohema “Kefo yama huo.” huya hisayana tusia kefo kava nehayanagina tusia kana ya amamigahue. Ala yafakefaleti ani kanomo ageyafi maleya nofi ki-teteya hage lipi hagayu hu-talageno ti nakaino falisiana ani kana yamoa afa ya kana ya haneanagi nagaya tusia kana ya amamigahue. 7 Avonio ma mopale veamogatama tusi nahau hu-nelama-toe. Mopafi mainaya kanafina “Kefo yama hiho.” huya aye-mavataga hisaya yana falote hugahianagi nagoa veamoya “Kefo yama hiho.” huya aye-mavataga hisaya veafena “Avonio kefo kava nehananagika kana yana aligane.” huna tusi nahau hu-nelama-toe.

8 Kayaene kaiyamoene “Kefo yama huo.” huana kavaleana havi kapima katesaagekahena ani kaiya kayana ai-fakalika hagayu hutalo. Hagayu hu-talesanana kanalele. Kaugafa haviya hu-mainesia kano maisanana kanalelagika hano ohu kahaimuka hanesia kano maiyo. Havigu tole kayano tole kaiyao kefo ya hisana kagesa kaminegeka kefo yama hu-mainesana yafe kavaleno hani yapi agola tegelege nehia atafi hagayu hu-gatalegahie. 9 Kaulagamoa agesia yamoma kefo ya hisana kagesama kaminageka ani kaulaga ali fayika hagayu hutalo. Ali fayi-talesanana kanalele. Nagoke kaulaga hanesigeno kanale hano ohu kahaimula kamisigeka alika maigananagi havigu tole kaulagamoa kefo ya hisana kagesa kaminegeka kefo yama hisanafe hani yapi tegelege nehia atafi kavaleno hagayu hu-ga-talegahie.

10-11 Tamakaya kaye ho. Havigu nagoa osi anaganihe “Afa ya kana veane mainae.” hutama huyafenagi nagaya mage huna tamaha-nepauve ani osi anagala ensole vayaamimoya ani nafaneyagale kava neyagaiya mukia yupa ikapinaga maineya Nenafa aufina neagae.

12 Na tamakesa nehaviye? Nago kanomoa vani hataletia (100) afu mainefiti nagola fanane higeno ani afumona nefaa mukia afua talapinaga amataleno talapinaga viayamo nagokema fanane hu-mainea afuahe ati-yeno yeno ali falote hisio? E, fananema hisigenoa ania huno ati-yegahie. 13 Nagaya tamage-lafa huna tamaha-nepauve agoma fanane hu-mainesia afuma ali falote huno avalesiana tusia muse hugahie. Naiti nainia (99) afuyagaahena muse hianagi nagokema fanane hu-mainesia afuma ali falote hu-tenoa tusiya huno musena hugahie. 14 Naa hu-mainegi ikapinaga mainea Nelamafaa nagola osi anagaa fanane hisia yafena nohaiye.

15 Kafu-kaganama kefo yama hu-ga-tesigeka tanakaya tokaetana mainetana kefo yama hu-mainesia yana avelio. Ave-lisanageno kagai kema haviteno kefo yama hisifitila agua ai-yahae hisigeka avaleka kagaika kametega ategane. 16 Ateganagi kekama ohavisigekahena nagokepi tole kanola anavaleka vinuka tolefi (2) tagufa (3) vayamoya hu-ga-tenea yana ageteya hu-falote huya fako huya ani kanomona aumono maleho. 17 Aumono maletesageno ani kanomoma nagoene amakai kema ohavisigeka kagaya Yisasife haviya melitaluma huya maisaya veapi avaleka ugeya aumonola maleho. Aumonoma malesageno ani vayamogami kema ohavisigeka kagaya mage huka huto “Yisasi kea ohavi vaya kana hana kanomoga tagaienena eomaika kahaote maiyo.” huka huto.

18 Ani kema hu-tesayana tamage-lafa huna tamaha-nepauve tamakaya ma mopale mainayana “Ma ya atafa hutama tokiya vaiho.” hutama hisayana Anumaya Kotia ikapinaga ania huno “Ani yana atafa hiho.” hu-lokiya vaigahie. Tamakaya ma mopale mainetama nago yafema “Afaa ataleho.” hutama hisayana Anumaya Kotia ikapinaga ania hugahie.

19 Etena nago kea tamaha-nepauve mopafi mainetama tole kanolaganima nago yafema nagoke anaku anakesalema mainenuana ani yafena Anumaya Kotitega havigesaageno ikapinaga mainea Neanafaa anamigahie. 20 E, tole (2) kanofi tagufa (3) vayapi nagai nagilema haviya melitalu hisayana nagaya nagainia amunoamifina maigahue huno hu-maine.

21 Pitaa Yisasite eno mage huno hie “Anumayamogae namagi kana nafunaganana kefo yana hu-na-tesigena ani kefo yamaahe aigeatena atale-tesue? Sevenia (7) yupa kefo yama hu-na-tesigena aigeatena atale-tesuo?” huno havige. 22 Havigegeno Yisasia mage huno hapaiye “Kagaifena sevenia (7) yupa ani kavala huo huna nohugi nagaya mage huna nehue kasagoya yupa ohavunamaa kanale havi yama hu-ga-tesigeka ania huka ohavunamaa kana aigeateka ataleto huna nehue.” 23 Anumaya Kotife “Kava yagai-nato.” huya hu-mainesaya veamoya ma kava nehae. Nago kumate sauve kanomoa agai aliya veafe mage huno hie “Yoka kaminoa monenia anonania fatago hutama namiho.” huno hie. 24 Huteno fatago hugahe nago kanoa avalegeno eno aminea yatefe anonaa ohavunamaa monegefa, nago kanomoma fifitinia (15) kafu aliya alino ne-mainea augafa mone eteno anonaa amisia yana hane. 25 Haneanagi monema amisia amukoa omalegeno kava kanomoa mage huno hie “Kagaikaene akamoene nafanekaene afenoyakaene alu kanomote atalegeno miya hisigena kagaiteti anonaa monea alino.” huno hie. 26 Higeno ani aliya kanomoa kava kanomo aiyafi aleya meyeno mage huno hie “Naa ohuka kahau hu-na-teka ako huka nagava mainegena nagaya haenagaa naminana yatela anonakaa mukia kamigahue.” huno hie. 27 Higeno ala kava kanomoa aliya kanoahena tusia hau hu-teteno anonaama oamia yafena aigeateno atale-tene.

28 Atale-teanagi ani aliya kanomoa hati-lavino viayamo tokaeana aliya nealia kanomona moge-maine. Ani kanomoa nago yupa agaifena mage huno hie “Nagoke Sotama aliyana aliya nenaya augafa mone yoka namio.” huno higeno amianagi anonaa oamine. Oaminea yafe ani kava kanomoma hau hu-tenea kanomoa ani afaluamona ageyafi atafa hu-lineno mage huno hie “Kagaila yoka kaminoa yana anonaa mukia yania aupaa namio.” huno hie. 29 Higeno aliya tokaeana nealia kanomoa aleya ayeno mage hie “Naa ohuka ataleka afaa kahau hu-na-teka ako huka nagava mainegenao. Haenaga anonakaa kamigahue.” huno hie. 30 Higeno ani kanomoa mage huno hie “Aao naa kehena nonahaiyafe nofi nopi hu-ga-tesugeka maineka haenaga anonaa namiteka nofi nopitila ataleka maigane.” huno hie. 31 Higeya nagoa tokaeyama aliya nealiya veamoya naama hia yafena haviteya amaipamoa haviya higeya kava kanomote mukia hu-mainea kavafena mo falote hae. 32 Mo falote hageno ala kava kanomoa atale-tenea aliya kanoahe ke higeno egeno mage huno ha-paiye “Kagaya tusiya huka havi aliya kano mainane. Hagoteka nagaifena avi metanagena anonakaa aigekatena atalega-tenoe. 33 Nagaya kagaifena nahau hu-ga-toanagi naa higeka ani avamete kavala ohuka kagaya tokaeka aliya nealina kanohena kahauna hu-oatane?” huno hie. 34 Huteno kava kanomoa tusia hai-vaiteno kina nopi avaleno viayamo kayo amisaya vayamogami amayapi ategeno mage hie “Tusi agata ya amitegeno haenagaa mukia yania anonaa namitesigetama atalegeno vino.” huno hu-maine. 35 Yisasia mage huno hu-maine “Tamakaya tamafu-tamakanaya kefo yama hu-lama-tesagetamahena amegatila hu kanale ohutama tamage hutama tamaipa kanale yapiti aigeamatetama atale-oama-tesayana ikapinaga mainea Nenafaa ania huno ani mukiamogatamina kinama hu-tenea avamete huno hu-lamategahie.” huno hu-maine.