1 Anumaya Kotia kava yagai-mainea yamoa maa hu-maine. Nofi alagamo hoyamona nefaa kege aluganale ani hoyafi aliya alisaya vayafe ke hugahe umaine. 2 Uno mage hie “Nagoke yupa kanoa aliyama alisagenahena nagoke vani (1) kina tamamite tamamite hugahue.” huno higeya nagoke amaipa hageno hoyafi hu-ma-tegeya umainae. 3 Umainageno yagemoa naeni (9) kilokile haigeno vaya atagu-nefaya kumapi viana nagoa vayala afaa hetiya mainageno momake-maine. 4 Momaketeno mage hie “Tamakaienena nofi alagamo hoyanifi aliya molisagena miyana fatago huna tamamigahue.” huno higeya umainae. 5 Umainageno yagemoa amunokano higeno ania hu-maine. Yagemoa alitulu huno lavigeno ania huno nagoa vayafe “Aliya moliho.” huno hie. 6 Higeno unena aupaa velo hugahe higeno nagoa vayala afaa heti-mainageno momaketeno mage huno hie “Naa higetama ayaaya kanagefa heti-taletama afaa mainae?” huno hamavi-ge. 7 Hamavi-gegeya mage hae “Nago kanomoa aliyana otamigeta afaa mainone.” huya hageno “Kanalelagi tamakaya nagai hoyafi aliyana moliho.” huno hama-paiye.

8 Hama-paigeya mo-nealigeno une velo hilega nofi alagamo hoyamona nefaa agaia aliya kava kanohe mage huno hapaiye “Aliya vayafe ke hugeya egeka miyana amamio. Haenagama amavaloa vayamogami miyana amamiteka hagotenama amavale-mainoa vayala haenaga amamio.” huno hie. 9 Higeya une avavema amavalea vayamoya ageno nagoke vani kina amamite amamite hu-maine. 10 Amamite amamite higeya hagotenoma amavalegeya aliyama meli-mainaya vayamoya mage huya amakesa haviye “Ala miya aligahune.” huya haviyanagi nagoke vani kinageya ali-mainae. 11-12 Aliteya hoyamona nefafena tusiya huya kea-makiya mage hae “Haenagama amavale-mainana vayala yagemoa osi kana kanoa nagoke kana nehigeya aliyana meli-mainagi tagaya afaa hetita omainonagi tusia amukonako hia aliya ali-mainonanagi nagoke avamete havi miya nelamine.” huya hae. 13 Hageno ani hoyamona nefaa amunoamifi mainea kanohe mage huno hie “Nenafuga havio nagaya havi kavala hu-notama-toe. Natema tamaha-vi-gogetama ‘E, nagoke vani kina aligahune.’ hutama hagetila naa higetama mani kea nehae? 14 Aliyama alitama aliya monea alitama notamilega viho. Nagaya nahaiya avamete huna haenagama amavaloa vayaene nago avamete miyana nelamamue. Nagaini yanagi haile. 15 Ani monea nagainia mone. ‘Nagayama hugahue.’ huna hisua yafena ‘Ohuo.’ hutama nehao? Nagaya vayama kauva yafe tamaipa haviya nehao?” huno hu-maine. 16 Yisasia mage hie “Nagaya ania hugahue. Haenagalafa mainesaya veala hagoteya maigahae. Hagoteya mainesaya veala haenagalafa taviya maigahae.” huno hu-maine.

17-18 Yelusalemu haigahe katega neuno Yisasia tuelufua (12) anagaamogamina amahaote amavaleno moma-teteno mage huno hie “Haviho tagaya Yelusalemu haisunageya ikapinagati emainoa kanoa vayamo natenea kanomonia nagaila nagesi hinageya mono note kava vayamoyaene kahegi kema havilinaya anagaene kame vayamogami amayapi navaleya na-teteya ‘Haegeno falino.’ huya hugahae. 19 Yuta vea omainaya vayate navaleya momamisageya nagaye hisifa kea hu-nateya hu-haviya hu-na-teteya hegi kayoteti nahaeteya yafaga yosale nili nahaeya asaisagena faligahue. Falisugeya he-vai-natesagena tole yupa komufi maitena tagufa (3) kanale fali-mainesufitila Anumaya Kotia ali he-ti-na-tegahie.” huno hu-maine.

20 Sepetina aamoa netalamaaene Yisasite eya ani amoa nago yafe havigegahe aiyafi aleya meye-maine. 21 Aye-mainegeno Yisasia mage huno havige “Naa hu-gatesue?” huno higeno mage huno hie “Kava yagaisana kumate umainesanageana mani tole nenimogania kavate maineana nagomoa tamaga kayatega maisigeno nagomoa hauga kayatega maisie.” huno havige. 22 Havigegeno Yisasia mage huno netalamaamogania hana-paiye “Nahavi-gea yana ohavinae. Falisua yana satuage hu-mainea timo avamete ti hanea keayopiti negahugi tanakaya kanale negao?” huno higeana “E, tokiyatia haneanagitaa negahue.” huana hae. 23 Haageno mage huno hie “Tamage satuage hu-mainea tina negaanagi ala vaya mainelega tamaga nayategaene hauga nayategaene siale maisaya yana nagaini yana omalenegi Nenafaa ani yana nagoa vayafe ago talo tala huno fatago hu-ma-tene.” huno hie.

24 Higeya tenia (10) anagaamoya ani kea haviteya ani kanolafe amaipa haviya haviya hu-na-tenae. 25 Yisasia “Nagaitega eho.” huno higeya ageno mage huno hie “Ma mopale ala kava vayamoya ‘Tusia ala vaya mainone.’ huya Yuta vea omainaya veafe ke amama-kiya aliya ke hu-ma-teya kava vayamogami avamete nehae. 26 Naa nehayanagi tamakaya ani kavala ohiho. Tamakaipina ‘Nagi hanea kanoma maigahue.’ huno hisia kanomoa aliya kanotami maino. 27 ‘Uhagotena maigahue.’ huno hisia kanomoa mone oali aliya kanotami maino. 28 Nagaya ikapinagati emainoa kanoa vayamo natenea kanomona vayamoya naya huya kanaleya hu-na-tesaya yafe omenogi nagaya amaya huna aliya kanoami maisua yafe emainoanagina mukia veamoya kefo yama hageno ai-gagi-ma-tenea yapiti kalu he-ma-tesua miya atalesua yafe faligahe emainoe.”

29 Yisasia agaiaenema tokaeya nemaiya anagamoya Yeliko kumala ataleya ugahe hageya kasagoya veamoya amakave umaine. 30 Nevageana tole anaulaga asu hu-mainea kanolamogania kate mopale mainanageya “Yisasia tanakaseno nevie.” haya kea haviteana ala kegefafiti mage huana hae “Anumayamogae, Tevitina aginagomogae, taagaila kahauna hu-laato.” huana hae. 31 Haageya umainaya veamoya kenama-kiya “Ke ohutana maio.” huya hayanagi nagoene ala kefiti keha keha hae “Anumayamogae, Tevitina aginagomogae, kahauna hulaato.” huana keha keha hae. 32 Haageno Yisasia haviteno aupaa anile heti-maineno “Naa hu-lana-tesue hugetana nehae?” huno hie. 33 Higeana “Museka nehuagi taagaya etetaa taaulaga agesue hutaa nehue.” huana hae. 34 Haageno Yisasia kalagi ai-na-teno anaulagale aya malegeana aupaa anaulaga neageana Yisasi akave vae.