1 Wamba* Mt 19:12* Ep 5:22-33 nyakamame pepa pyao peyamino dokonya indupa lelyo. Akali mende enda nyala nayatamo doko epe. 2 Dopaka doko, kepo kolenge mana silyamo dokonya akali pitaka mendai mendai lawanya enda wakale wakale pititamopa, enda pitaka mendai mendai lawanya akali wakale wakale katenaka. 3 Akalimi etanenge doko-kisa kalai pipenge doko pipenge. Dee etanengeme akalingi doko-kisa mendai dopaka pipenge. 4 Etanenge dokome baa tangenya yonge doko isala naena. Baanya akalingi dokome isina. Dopaka pyoo akalingi dokome baa tangenya yonge doko isala naena. Baanya etanenge dokome isina. 5 Dopana,* Eke 19:15 enda akalipa tole pyalanya mendenya kaita lyoka lyoka napyepape. Nyilyambo lapotame loma salanya mona mendai palyoo gii kuki mende kayamba latala kayatambino doko epe. Epeaka doko, nyilyambome nyilyambo tange auu pyoo isala nayatambinosa Sataneme nyilyambo makande pitana, maitakao nyilyambo dee tole pyalapape. 6 Nambame lelyo doko nyakamame kayala nayao dopaka pyepapena lao nalelyo. Daa, nyakamame dopa pyuani kayatamino doko pyepape lao lelyo. 7 Nambame* Mt 19:12; 1 Ko 9:5 nyakama pitaka namba yale joo katapimi laka lao masilyo. Dopaka doko, Goteme naima pitaka mendai mendai lao epe dupa wakale wakale dia. Endakali mende-kisa epe mendepale mende singi. Mende-kisa mendepale mendeaka singi.

8 Dee indupa nambame akali patangepi enda mapuakaepi enda walyakaepi dupa kandao lelyona, enda dupa akali napao akali dupa enda lanyala nayao mee namba kalyoli pyoo katao pituuwapi pitamino doko epe. 9 Dopaka* 1 Ti 5:14 doko, dupame nyakamanya nyowani kaenge doko ita minapenge nanjetamo kandao doko, akali enda lanyoo enda akali pao pipenge. Doko, endakalipa tole pyao petenge mana doko kuki epeaka doko, mee katao nyowanimi kumingi mana doko etete koo.

10 Dee* Mt 5:32; 19:9; Mk 10:11-12; Lu 16:18 endakalipa lao pyasetae dupanya nambame mana dake setelyo (nambame ialyo daa, Kamongome setelyamo): endame akalingi doko yakinatala napupenge. 11 Dopaka doko, endame akalingi doko yakinatala patamo kandao doko, baa akali waka napao mee pitipenge. Daa tamo kandao doko, baa pilyoo baanya akalingi tengesa pupala dee mona setao pitipenge. Dee akalimi baanya etanenge doko watao napyapengeaka.

12 Dee endakali yangi dupa kandao nambame ialyo dapa lelyo (Kamongome nalelyamo): akali masoo miningi mendenya etanenge masoo naminingi mendeme akali dokopaka pitimbana lao masetamo kandao doko, akali dokome baa watao napyapenge. 13 Dee masoo miningi enda mendenya akalingi masoo naminingi mendeme enda dokopaka pitimbana lao masetamo kandao doko, enda dokome baa yakinala nayapenge. 14 Doko, masoo miningi enda-pipa tole petenge dokome masoo minala naenge akalingi doko etete epe jingi. Dee masoo miningi akali-pipa tole petenge dokome masoo minala naenge etanenge doko etete epe jingi. Dopa napyali kandao doko, dolaponya wane dupa netesa endakali dupanya wane dopale joo kalyimili. Dopa pimiliaka doko, etete epe joo katengema. 15 Dopaka doko, enda tamopi akali tamopi masoo minala naenge mendeme masoo miningi mende yakinea kandeno doko, yakinena kayalapape. Mendeme dopa pitamo kandao doko, masoo miningi akali tamopi enda tamopi mende dokopaka pilyepape lao mana setapae mendeme nyoo yaki napingi. Doko, Goteme naima mona setao kalyepale lao ipupa lea. 16 Enda,* 1 Pi 3:1 embame embanya akalingi doko kapa pao pyoo nyete laape? Akali, embame embanya etanenge doko kapa pao pyoo nyete laape?

17 Dopaka* Lo 12:3; 1 Ko 7:20,24; 11:16; 14:33; 2 Ko 11:28 doko, Kamongo dokome naima pitaka mendai mendai lao kalyepa leamoli pyoo katapenge. Dee Goteme naima ipupa leamo dokopa naima pitaka mendai mendai lao kateamanoli pyoo katapengeaka. Nambame mana doko sosa yuu wakale wakale kalyamino dupa pitakanya setenge. 18 Emba* Ap 15:1-2 elya pingi kambu kepapaesa Goteme ipu lea tamo kandao doko, embame kombe doko mee jalanya pyaa nayape. Emba elya pingi kambu kepala naengesa Goteme ipu lea tamo kandao doko, elya pingi kambu kepala nayape. 19 Doko,* Lo 2:25; Ga 5:6; 6:15 akali elya pingi kambu kepengepi kepala naengepi doko angi mende daa. Gotenya mana setapae dupa watao miningi doko iki angi. 20 Goteme naima ipupa leamo dokopa naima pitaka mendai mendai lao kateamanoli pyoaka katapenge. 21 Emba kendemane joo katatenopa Goteme ipu lea tamo kandao doko, mona kenda nakayape. Dopaka doko, emba kendemane joo katenge doko kayapenge jia kandeno doko, kayape. 22 Doko,* Jo 8:32,36; Lo 6:18,22; Ep 6:6; Kl 3:22-24; Pm 16; 1 Pi 2:16 kendemane joo kateaminopa Kamongome epena lea dupa Kamongonya mokao nyepae joo kalyamino. Dopaka pyoo mokao nyepae kateaminopa baame epena lea dupa Kataisa baanya kendemane joo kalyamino. 23 Goteme* Lo 3:24; 1 Ko 6:20; 1 Pi 1:18 nyakama sambao nyia. Dopana nyakama endakalinya kendemane jala nayalapape. 24 Kaimia* 1 Ko 7:17 paluma, Goteme naima ipupa leamo dokopa naima pitaka mendai mendai lao kateamanoli pyoaka Gote-pipa awapa katamana.

25 Indupa* 1 Ti 1:12-13 nambame akali enda lanyala nayao enda akali napao pingima dokonya latoo. Dokonya nambame Kamongonya pii mende minao laa nayatoo. Dopaka doko, Kamongome namba kondo kayamo dokonya namba tungi pyapenge akali joo kalyona, nambame namba tangenya masingi doko latoo. 26 Indupa* Lo 13:11 kenda pipae silyamo dokonya enda akalipi dupa kalyaminoli pyoo mee katatamino doko epena lao masilyo. 27 Emba enda petenge tamo kandao doko, pyao watalanya pyaa nayape. Dee emba enda napetenge tamo kandao doko, lanyalanya pyaa nayape. 28 Dopaka* Lu 12:33 doko, emba enda lanyeteno kandao doko, koo piti daa. Dee enda akali patamo kandao doko, koo pita daaka. Enda lanyepala enda-pipa petengepi enda akali patala akali-pipa petengepi dupa-kisa kenda pipae koteaka lao epenge. Dopaka doko, kenda pipae doko nambame nyakama-kisa naipupya laka lao masilyo.

29 Kaimia* 1 Ko 7:31; 2 Ko 6:2; Ip 13:14 paluma, nambame lelyo doko dapa lao lelyo: indupa yuu gii kuki silyamo. Dopa pilyamo dokonya Kamongo lao masalanya indupa pituu akali enda petenge dupa enda napetengeli joo katapenge. 30 Ee* 1 Ko 6:8-10 lao katengema endakali dupa ee nalao katengemali joo katapenge. Mona yaepao katengema endakali dupa mona yaepala nayao katengemali joo katapenge. Oapi sambao setengema endakali dupa oapi nasingili joo katapenge. 31 Isa* 1 Jo 2:16-17 yuu dakenya oapi dupa minao kalai pingima endakali dupame dupa minao kalai napingili joo katapenge. Doko, isa yuu indupa silyamo dake etama etama pyoo etelyamona, silyamoli pyoo naseta.

32 Nyakamame* Mt 19:12; 1 Ti 5:5 opale mendaipi mendenya nea nakayapimi laka lao masilyo. Akali enda lanyala naenge dokome Kamongonya kalai masetae soo pingi. Baame Kamongome auu kaengeli pyoo pitoo lao masingi. 33 Dopaka doko, akali enda petenge dokome yuunya kalai dupa masetae soo pingi. Baame baanya etanengeme auu kaengeli pyoo pitoo lao masingi. 34 Dokonya baanya masingi doko lapo palenge. Dee enda akali napengepi wanaku mapuakaepi dokome Kamongonya kalai doko masetae soo pingi. Baame baanya yongepi monapi lapotanya etete epe joo pititoo lao masingi. Dopaka doko, enda akali katenge dokome yuunya kalai dupa masetae soo pingi. Baame baanya akalingimi auu kaengeli pyoo pitoo lao masingi.

35 Nambame* Lu 10:40-42 pii dutupame nyakama nisoo lelyo. Kame pyoo laa naelyo. Nyakama mana tolao minao mona tambalya tambana napyoo Kamongonya kalai pyakamaiyoo pituu katawapi pipimi laka lao masoo lelyo.

36 Enda mendepa akali mendepa nyilyambo nyetambana lao masetala andiki pitambiaka doko, tole pyala nayao gii kuki mende mee pitimbana lao masetambi. Dopa lao masetambinoaka doko, akali dokome enda doko-kisa mana epe naminilyona lao masetala baame etete nyowanimi kumapala enda doko lanyoto kapana lao masetamo kandao doko, baame masetali pyoo enda doko lanyepenge. Dopa pitamo doko koo pita daa. 37 Dopaka doko, akali mendeme kyoto joo masetamopa mendeme tuu lanya palyala nayatana baa tangenya moname masetali pyoo baanya enda andiki pingi doko lanyala naenya kayatoo lao masetamo doko auu pyoo pita. 38 Dopana, akali mendeme baanya enda andiki pingi doko lanyetamo dokome auu pyoo pita. Dopaka doko, akali mendeme lanyala nayatamo dokome etete auu pyoo pita.

39 Akali* Lo 7:2-3 kalyamo dokopa enda doko akalinya anjetae petenge. Dopaka doko, akali kumapatamo kandao dokopa, enda doko mendeme pii pyala nayatamopa mee pituu akali pawani kayata mendenya pupenge. Dopa pipengeaka doko, masoo miningi akali mendenya pupenge. 40 Dopaka* 1 Ko 2:16; 7:25; Ep 3:4 doko, nambanya masingimi baa mee pititamoli pyoo pititamo doko baa mona etete yaepao pititana lao masilyo. Dee Sipitisa Gote doko namba-kisa apata kalyamoaka lao masilyo.