25
Ráhá maná pésh bedár
Dáuday Zabur.
1 Oo Hodáwand! Man pa del o ján dém pa taw káyán.
2 Oo mani Hodá! Tai sará tawkala kanán,
mayl ke pashal o sharmendag bebán o
dozhmen mani sará báládast bebant.
3 Ji haw! Á ke tai sará óst o ométa kant
hechbar sarjahla nabit.
Á ke bé sawabá béwapáia kanant
sarjahl o sharmendaga bant.
4 Oo Hodáwand! Ráhá maná pésh dár o
wati keshká maná tálim day.
5 Dém pa wati rástiá maná rahshón bay o sabak beday,
chiá ke taw mani rakkénókén Hodá ay o
sajjahén róchá tai entezár o wadárá án.
6 Oo Hodáwand! Wati rahmat o mehrá yát kan,
chiá ke á cha azalá hastant.
7 Mani warnáiay náparmáni o gonáhán yát makan,
wati mehray kesásá maná yát kan
ke taw nék ay, oo Hodáwand!
8 Hodáwand nék o rást ent,
paméshká gonahkárán ráhá sója dant.
9 Békebr o darbéshén mardomán rástiay ráhá rahshónia dant,
wati keshká áyán pésha dárit.
10 Hamá ke Hodáwanday ahd o paymánay sará óshtant,
áiay sajjahén ráh pa áyán cha mehr o wapáyá sarréch ant.
11 Oo Hodáwand! Pa wati námaygi mani gonáh o mayárán bebaksh,
chiá ke mazan ant.
12 Kay ent hamá ke pa del Hodátors bebit?
Hodáwand áiá hamá rástén ráhá sója dant ke báyad ent gechéni bekant.
13 Á wati róchán pa séri o azgária gwázénit,
áiay chokk o óbádag zeminay mirás baróka bant.
14 Hodáwand wati delay ráz o ramzán gón Hodátorsán darshána kant,
wati ahd o paymáná pa áyán pajjárénit.
15 Mani chamm modám dém pa Hodáwandá ant,
chiá ke hamá ent ke mani pádán cha dámá ázáta kant.
16 Wati démá gón man bekan o maná rahmat bebaksh,
chiá ke man békas o setam distagéné án.
17 Mani delay sakki o sóri báz ant,
maná cha paréshániá berakkén.
18 Mani ranj o sakkián bechár o
sajjahén gonáhánon bebaksh.
19 Mani dozhmenán bechár ke chinchok báz ant o
cha man chón pa kahr naprata kanant.
20 Mani zendá bepahréz o berakkén,
mayl ke sharmendag bebán,
chiá ke tai báhóth o mayár án.
21 Tachki o rásti mani negahpán bát,
chiá ke mani omét taw ay.
22 Oo Hodá! Esráilá cha sajjahén sakki o sórián berakkén.