26
Oo Hodáwand! Wati dastán bégonáhiay tahá shódán
Dáuday Zabur.
1 Oo Hodáwand! Gonáhay bohtámá cha mani sará bethagalén,
chiá ke wati bémayáriay tahá gámon jatag o
bé larzagé Hodáwanday sará tawkalon kortag.
2 Hodáwandá! Maná bechakkás o ázmáesh kan,
mani del o hayálá cha chakkásá begwázén.
3 Chiá ke tai mehr modám mani chammáni démá ent o
tai wapádáriay sáhegá gáma janán.
4 Na gón prébkárán hamdiwána bán o
na dotal o dopóstén mardománi hamráh.
5 Cha badkáráni hamráhiá naprata kanán o
gón radkárán hamdiwána nabán.
6 Oo Hodáwand! Wati dastán bégonáhiay tahá shódán o
tai korbánjáhay sará chahra warán,
7 tán wati shogrgozáriay tawárá borz kanán o
tai sajjahén ajabén káráni kessahá byárán.
8 Oo Hodáwand! Maná tai lóg sakk dóst ent,
tai shán o shawkatay jágah.
9 Mani sáhá gonahkáráni hórigá mager o
zendá gón hónigán,
10 ke gandahén pandalesh dastá ent o
rástén dastesh cha reshwatá sarréch.
11 Bale man wati bémayáriay tahá gáma janán,
maná berakkén o mani sará rahm kan.
12 Pádon tachk o sápén jágahé ér ent,
mazanén diwánán Hodáwandá názénán.