1 Laḡannemo Samuwel i wai ewali ba Bada aubaina i noyanoya Eli gabulinemo. Mba saugidimo Bada, laḡan visa ota nopodimo lava lisidimo i giugiu yovo bi i wai laubonidi.

2 Eli matana ai gaḡugaḡu bi nuwedi paya bi dudubala ḡemota ena ani kenamo i kenakena. 3 Bi palai waiyawemo Maimaituwa ena kwadam i yanayana. Bi Samuwel ba waianina bogesina ena ani kena diyanemo i kenakena. 4 Kamaina bi Bada, Samuwel i binauwena gado, “Samuwel!” Ḡome Samuwel ena giu i wai munena gado, “Tagu niga.”

5 Kamaina bi i kena moito bi i velau i nawa Eli lisinemo bi i waitalayena gado, “Tam kuna binauwegu ee?”

Bi Eli i giuwena gado, “Geḡa, tagu mote yà binauwem, ku munaḡa kwa kena bi Samuwel i munaḡa i kena.”

6 Bi Bada i binau munaḡana gado, “Samuwel!” Bi ḡome tana i kena moito te i munaḡa Eli lisinemo bi i waitalayena gado, “Tam kuna binauwegu aubaina e nato.” Bi tana i giuwena gado, “Tagu mote yà binauwem, ku munaḡa kwa kena.”

7 Wala mote bamo mainana Bada, Samuwel lisinemo i giu yovo. Taunana aubaina mote kalinana i vaiye ḡone.

8 Kamaina bi Bada binau i wai faioni ba Samuwel i kena moito te i nawa Eli lisinemo bi i waitalayena gado, “Tam kuna binauwegu aubaina te e nato.” Bi ḡome kaka Eli noḡota i vai te Bada, niga gomenina ya binabinauwe.

9 Kamaina bi Eli gomenina i giuwena gado, “Ku munaḡa kwa kena bi ya binau munaḡana ba niga mainana kwa giuwe, ‘Bada ku gagali em taupaula ya wai beyavaiya.” Kamaina bi gomana i munaḡa ena ani kenamo bi i kena.

10 Bi ḡome te Bada i nato gomana diyanemo i moito, bi i binauna gado, “Samuwel, Samuwel mai dolinemo i giugiuna.” Bi Samuwel maḡemota Bada ena giu i waimunena gado, “Ku giu, tagu em taupaula yà waibeyavaiya.”

11  Bada i giuwena gado, “Tagu kaka kauwa wai nuwalovolovodi Islael lisidimo yà voiyedi. Laḡannemo yà voiye bi giuna sa vaiyena ba sa tagugu. 12 Tagu Eli bi ena vanuwa lavedi yà kovoḡidi, bai dolinemo e giugiuwena mainana yà vioye. 13 Tagu kaikana e giu te Eli ena vanuwa lavedi yài talapiliyedi. Banina tana natunatuna kauwa gebogebo otidi a voivoiyedi bi mote i lailai didimanidi. 14 Taunana aubaina e giuwapa te Eli ena vanuwa lavedi, edi lau sewasewa bi edi laupuyo gebo aubaina ba edi gebo mote yàma noḡotikamaḡedi.”

15 Kamaina bi Samuwel i kena te laḡan i sako bi Maimaituwa ena vanuwa mataetidi i kaikamaḡedi. Bi tana, Bada bai i giugiuvitena ba Eli giuwena i naile. 16 Kamaina bi Eli gomana i yoge bi i giuwena gado, “Natugu Samuwel.”

Bi Samuwel i giuna gado, “Tamagu bai, tagu niga.”

17 Bi Eli i waitalayena gado, “Bada bainewa i giuwem? Mote kuma nuwevi. Bamoda mwali matabuna i giugiuwemna mote kuma giuwegu ba Maimaituwa ya kovoḡi kauwem.” 18 Taunana aubaina Samuwel giu matabuna Bada i giugiuwena Eli i giuvite, mote bai ḡesauna i sako waidavo. Kamaina bi Eli i giuna gado, “Tana taunana Bada, tana lisinemo bai i visuna ba ya voiye.”

19 Samuwel i dididiga ba Bada tana vaitena bi mwali matabudi i giugiuwedina ba banidi a tubutubuḡa. 20 Taunana aubaina Islael lavedi, Den malagainemo bi i nawa te Biyasiba malagaina palatina ba a sibe te Samuwel ba Maimaituwa taugiuwatana. 21 Sailo dobunemo laḡan wapawapa Bada i laumaḡata Samuwel lisinemo bi i giugiuwe.