2
Ana ena kasaḡesaḡe palina
1 Ana i laupali bi i giuna gado,
“Tagu, Bada lisinemo yà wai nuwavisu.
Tana ḡailisi i vitegu.
Bi i waiyawasanigu aubaina yà wai nuwavisu.
Taunana aubaina egu ḡaviya e gwaiyedi.
2 Mote aiyai Waiyawa, mai tam Bada.
Bamo mote aiyai mai tam.
Mote aiyai ema muli tauavalina mai tam, ema Maimaituwa.
3 Tagu e giu te nuwasaḡasaḡa giudi kwa kaisivudi.
Em nuwasaḡasaḡa giudi sa kovi.
Banina Bada, Maimaituwa mwali matabudi i sibedi
bi tana kaka em kauwa matabuna yai talapiliyedi.
4 Bada, tam tauwaiḡaviya ena alaḡiya kunai doukotokotodi.
Bi tam lava kaikaigwaḡedi ḡailisi kuna vitedi.
5 Tedi mabai a noḡotidi te waikani guletidi ba niganana sa bayau gulata.
Bi tedi mabai a noḡotidi te kanikanipekidi ba niganana mote kani sima peki.
Bi waivini aiaipoina ba libilibi 7 sa bewedi,
bi tana libilibi wapawapa i bewebewedina ba niganana taunaḡa ya miya.
6 Bada, tam peki bi yawasana tauvitena.
Tam lava dommo kwa sivusivu yovoḡe bi kwa solusolu waimoito munaḡe.
7 Bada, tam lava ḡesaudi kwa wai gomelidi
bi ḡesaudi kwa wai maulidi.
Bi ḡesaudi kwa voiyedi te sa yovoyovo gulata
bi ḡesaudi kwa voiyedi te sa saḡasaḡa gulata.
8 Tam wai yamoyamonidi gobusemo, miyemiyedi kwa kaikailagetidi.
Tam lava malumaluwabidi venimo miyemiyedi kwa kailagetidi.
Te ḡalibona vaitedi ḡemoḡemotidi,
tedi edi ani miya ba gabu pounemo sa miya.
Dobu matabuna ba tam mabimmo.
Bi mwali matabudi edi gabu kauwemo kuna sivudi.
9 Tam em lava wai patutudi ba kwa moimoito galamedi.
Bi gebo tauvoiyedi ba pekimo sa launeḡaneḡa.
Lava taudiḡa edi ḡailisimo mote bai simai tubu.
10 Tam em ḡaviya ba kwa kovoḡidi.
Tam em medi galewaḡa ya yovona mai palele.
Tam dobu matabuna kwai talapiliye,
bi em ḡalibona ḡailisi kwa vite,
bi em buyobuyona kwa voiye
te ya ḡailisi gulata.”
11 Kamaina bi Elikana ena vanuwa lavedi vaitedi gomana a gose bi a munaḡa Lama. Ḡome Samuwel Sailomo i miya bi Maimaituwa aubaina i noyanoya, pilisi Eli ena waibada gabulinemo.
Samuwel i dididiga bi Maimaituwa ena noyamo i waiwaisagu, Maimaituwa ena palai noponemo. Maimaituwa bi lava edi waikitamo ba Samuwel, lava visuvisu kaukauwina. Bi Eli natunatuna labu ba Pilisi bi gebogebo a voivoiye, taunana aubaina Bada taugiuwatana i giukamaḡe, Eli lisinemo te Eli ya giuwe te sauga ḡesaunemo Bada kaka libilibidi yai peki labuiyedi. Banina tana natunatuna gebo a voivoiyedi bi mote i kaka didimanidi. Eli ena tubulelesa mulimulidi ba valivaliudimo a peki kovi.