1 Sauginemo Samuwel i wai magula ba natunatuna labu i vinedi te Islael edi taulauetala. 2 Tautuwaḡa isana Diyouwelo bi tautasi isana ba Abisa bi tedi Biyasiba dobunemo a noyanoya. 3 Samuwel ena yawasana mote natunatuna a vai. Tedi giukauwa etana a pale bi mane vaina a ḡoe aubaina, te gebo taukauwedi mulidimo a moimoito.

4 Taunana aubaina Islael babadidi matabudi ai ḡemotidi Samuwel lisinemo Lama malagainemo. 5  ✡ Wai 17:14Bi tana a giuwena gado, “Tam kunai magula bi natunatum mote kivimḡa sima nawanawa. Taunana aubaina ḡalibona ḡesauna kwa vine te ya lau etadoliyemaina, maibena dobu ḡesaudi.”

6 Bi edi waibaḡa Samuwel mote i wai nuwavisuye, taunana aubaina i laupali Bada lisinemo. 7 Bi Bada i giuwena gado, “Bai sa waibaḡayena ba matabuna kwa voiye. Tedi mote tam sima laulau kasaḡaiḡaiyem bi tagu. Tedi mote a ḡoegu te tagu edi ḡalibona. 8 Laḡannemo Idipmo e kapotiyovodi ba tedi laḡan matabuna a laulau kasaḡaiḡaiyegu bi maimaituwa ḡesaudi a kaikaiwatedi. Taunana aubaina te niganana tam lisimmo mainana sa voivoiye. 9 Edi waibaḡa aubaina kamaina te edi ḡowana kwa voiye bi kwa tainuwataudi te laḡannemo ḡalibona yai badayemina ba lisimimo yai badateyala.”

10 Kamaina bi Samuwel, Maimaituwa ena giu lava i giuvitedi, mabai ḡalibona a waibaḡaena. 11 Niga mainana i giuwedina gado, “Ḡalibona yai badayemina ba niga mainana ya voiyemi: Tana natunatumi oloolotodi ya legaudi te ena tauwaiḡaviya. Bi ḡesaudi ya voiyedi te seliot tauvelauyedi, ḡesaudi osimo tauwaiḡaviya bi ḡesaudi seliot matedimo tauvelaudoli. 12 Tana ḡesaudi ya voiyedi te tauwaiḡaviya 1,000 sai badayedi bi ḡesaudi 50 sai badayedi. Bi kota ḡesaudi yà voiyedi te ena daibimo sa noya bi ena kani tauaulina. Bi ḡesaudi mada bi seliot taulauvevewanayedi. 13 Tana kota natunatumi waiwaivinidi ya voiyedi te enaya taulaubuka bi falawa taugabudi bi ḡesaudi bunama panepanedi tauvoiyedi. 14 Tana emi daibimo kani visuvisudi, waen bi olip daibidi ya vaḡaḡalidi bi ena tauwaibabada ya vitedi. 15 Laḡannemo peḡapeḡa bi waen votedi ko auli tavaitedina ba dubu 10 ko voiyedi, te tana dubu ḡemota ya vai bi ena tauwaibabada bi ena taupaula lisidimo ya soiye. 16 Tana emi olooloto bi emi waiwaivini ya legaudi te aubaina sai taupaula bi kota emi bulumakau bi emi donki ya legaudi te ena noya sa voiye. 17 Bi laḡannemo emi sipu bi emi gouti dubudi 10 ko voiyedina ba tana dubu ḡemota ya vai bi ya voiyemi te aubaina ko noya. 18 Mba laḡannemo kaka ḡalibonana, niga kauwidi matabudi yà voiyedi. Bi Bada lisinemo sagu koi baḡaena ba mote ima sagumi.”

19 Ḡome lava Samuwel ena giuvavasaḡa vaiyena a daboka bi a giuna gado, “Geḡa! Tama ka ḡoeḡoena ḡalibona yai badaemai. 20 Te ya lau etadoliyemai bi aubaimai ya waiḡaviya maibena dobu ḡesaudi.”

21 Kamaina bi Samuwel lava edi giu matabudi Maimaituwa i giuvite. 22 Bi Maimaituwa i giuwena gado, “Kamaina edi ḡowana aubaina ḡalibona ku vitedi.”