67
Vania na tinoni gehe linge: na linge ke tona kolua na lei totobo ni gougonu tara logo ghalo.
1 God ke arovighita me ke va tabu ghita,
Me ke tatea na marara ni matana nia na kulakulagha i vuvungada.
2 Ma ge na lei nilabumu kara ghilalai talighutia na maramana
mana nimua na maana ni vavola tana lei baebasena na maramana.
3 Na lei kema kara holoutogho ghe God.
Eo, na lei kema soko kara holoutogho.
4 Ivei vaho tua te vaghaa na rivurivu kara loghoa na lei kema soko,
kara nia lingelinge na togotogo,
na pukuna to hulira nia na lutu maemane
ma taghaoa na lei gehegehe ni maramana talighu.
5 Na lei kema kara holoutogho ghe God.
Eo, na lei kema kara holoutogho.
6 Ge na maramana ke nia hevei nina na halilaghi,
Ma God, dida na God, ke vaheghita nina na vauto ni sosodo.
7 Eo, God ke vautoghita,
mana lei vure soko talighutia na maramana
kara nia kikinima gaia God.