1 Ko tughuru dato, Ghe God,

mo ko havukaghinira na lei ghamua na kana.

Lubatira gaira tara mua liona God hava sama ni vola.

2 Ko riu kehara vagha na ahu te ghurihi kolilia na ghuri.

ko nira ge kara obo vaghara na soi ni midua tana lake.

Lubatira rana tangohahi kara taghara tana matana God.

3 Lubatira rana tinoni taluutuni maemane

kara rivurivu,

lubatira ge kara rivurivu tana matana God.

Lubatira ge kara nia rivu na togotogo.

4 Lingea na linge ni holoutoana God vania na ahana!

Kau nia linge ghaeghahe dato na holouto vania agaia te sopou i vuvungani na lei ghobaghuli.

Na ahana gaia, Lord,

togotogo ma kau rivurivu tana matana!

5 A tamadira tara mua tamagha,

mana pilupungisi vanira rana lei vinekama mate sasani.

Aeni gaia God, na valena te tabu.

6 God te talugonira te aroha na tobadira mara kabu sagau tana lei binaboli;

gaia te va hera na tatavahale rana kabu pipiti me va hera na togotogo.

Ma vanira rana diu vetena,

na ngengere mana vahaghitaili vamua te gonidila vanira.

7 Tana bona te huli rughu horura nimua na vure tana komu Egypt,

Ghe God, Tana bona tau tona potaa na tautalu asi.

8 Na maramana te anuanu,

mana uha ni kokou te kovala horu mai tana matamu,

Na God ni Sinai.

tana matamu, Ighoe God ni Israel.

9 Ighoe to nia hevei ma na uha te mua soko butu,

Ghe God,

ge ke va vuli malobui na lei raurau tana komu ni baubahu.

10 Tana komu keri nimua na vure kara kabu,

mai kolua ghua nimua na lei uto, Ghe God,

Gonidila vanira nimua na vure tara liogu na hahanga.

11 Na Lord te bosa tatea na laga vule,

mana lei ovuovu ni vinekama

tara nia ghughu na rongorongo te togotogogha.

12 Na lei vunaghi haba rana kana kolura didira na ovu ni kisumate

kara sama havukaghi keha, marana lei vinekama ni Israel

tara tuvalighi na lei totobo tara lotighi.

13 Sakai mana tana ghanara tana lei vatei ghoro kolu ni sheep,

itaeni agaia tara sarora nia na Silver mana Gold.

Vaghaa na kavuku te kuvihia nia na ghatana.

14 Na puku ni maana te havukaghinira na lei vunaghi haba

tara kanahaghinia vaghara na pughupughuna na bihi

tana bona ni maraghata vuvungana na ghotu Zalmon.

15 Na lei ghotu ni Bashan tara haba vagha na vunaghi,

tara tughuru bebete dato i lokana na parako.

16 E ghua ge au reirei vaghaghau tau mua tangomana,

Ighau na lei ghotu tau mua maheboa va tana ghotu Zion

na ghotu God te vilia ge ke ghaha iga,

A Lord heghena ke ghaha iga ke va ma va?

17 Te talighutia na togha mana togha ni taitakiro,

tara mua tangomana na idumiani;

A Lord te butu mai tana ghotu Sinai

me va haghe tana bonana te tabu.

18 Tana bona dato tana malei haba i kokou,

ighoe to hulira na ovuovu ni tinoni tara kabu pipiti.

Na lei vure tara va hegho na dolo,

haba va agaira tara nigho ghighirou.

A Lord God ke kabu ighobuda iani taeni.

19 Holoutoa a Lord, holoutoa na vavolada God!

Agaia te bolo ghalagha ghita tana luhuna tana lei bona soko.

20 Ghada na God, na God te vavola.

A God, puku ni haba, te vavolaghita tana mate.

21 Hauva ka, A God ke paruhai na uludira tara kanahaghinia,

me ke gholahighi na lova ni uludira

ara hei tara dolovia na lei gehegehedira tana dika tara mate tua.

22 A Lord te ghaghua,

“Inau ku lavi rughu horua mai na lei ghaghua na kana sania Bashan,

Ku lavi datora sania na boro ni horara.

23 Ighau, nigua na lei tinoni,

kau sani na tuamiu nia na ghabudira,

hughua nimiu na lei kau kara lavighi na tunuvadira!

24 Na lei tinoni tara ghilala na tonatonamu, Ghe God,

Na tonatonana nigua na God, mana vunaghi haba.

Tana bona te tona va tana bonana te tabu.

25 Ara hei tara lingelinge tara pala inagho,

Mara hei tara gougonu taonighi na lei linge tara pala i muri;

kolura na lei tahula tara pupu mara taberuru.

26 Holoutoa God, Ighau udolu rana Israel;

holoutoa a Lord te hevei na lei totobo ni vola soko vanira rana Israel.

27 Kau righia, na kemana Benjamin na kema pile kikia te ghidevia na halautu.

Mara mai na ovuovu sule ni tinoni huhuli tana kemana Judah

maia na lei tinoni huhuli tana kemadira Zebulun na Naphtali.

28 Vetenaa vania nimua na puku ni maana, Ghe God.

Talutatea nimua na maana, Ghe God.

Te vagha to ghaghua iga tana bona te padi.

29 Ara nia mai didira na lei dikalio

na lei vunaghi haba ni maramana

vania nimua na vale tabu ni Jerusalem.

30 Ko va betora na lei kema raeni

tara kanahaghinigho na lei maumanu asi raeni

tara hogho vuri tana lei hughuru ni ale;

na lei buluka sule raeni ighobudira na lei daledira tara lugulugu.

ko talumuria agaira tara nongia dida na dikalio,

ko havukaghinira na lei kema tara talunagho tana bona ni kisumate.

31 Lubatia Egypt ke nia mai kolu nina hevei na lei totobo ghaugharugha;

lubatia Cush ge ke tualaghi tuturu nia nina hevei vaniana God.

32 Ighau na lei kinakabu ni maramana, kau linge vania God.

Nia linge na holouto vania a Lord.

33 Linge vania a gaia te sama halavu i paleva levu tana na lei kinakabu haulaghi ni kokou,

Na talama ni ngangatana te tagumu mai tana parako.

34 Bosa tatea vanira na lei vure soko Ivei te vagha nimua na maana God.

A nina malei haba ke hinarira horura rana dalei Israel.

I kokou na lagana te au vule.

35 Talu mavaa God ta nina na malei tabu.

A God ni Israel te nia hevei na maana mana laga vanira nina na vure.

Holoutoa gaia God.