1 Na lei maramana talighu, ko nia ghaghua dato na holouto togotogo vania God.

2 Lingea na ladana mana rongoraghana na ahana!

Talutatea vania na maramana udolu na rongoraghana.

3 Bosa mo ko vania God, Ivei vaho tua te vagha a mavani nimua na lei gehegehe!

Ghamua na lei kana tara mataghu vaghara na kau polo ighuna ta nimua na mana te laga au vule.

4 Na lei totobo soko iani pari kara holohabagho

kara linge na vatei holoutoamu,

kara nia ghaeghahe na ahamu tana lei linge ni holohabamu.

5 Kau mai, ma kau vaevanea na hava a dida na God te gonia,

Ivei vaho tua te vagha na butuli sule ngangata,

te gonighi vanira nina na vure!

6 Agaia te nia na horara sisi ge samavoka,

mana halautu ighobuna te mamaha:

ma nina na vure tara sakusaku tua halavu levu ni pari mamaha.

Mai ma ka togotogo itatana ahei agaira na tinoni ia eni.

7 Nia nina na maana te laga au vule,

agaia ke huhuli ke va me vaa.

Agaia te mata reireighi didira na lei gharasu na lei kema!

Bei lubatira na diu bosa ke sule ghalagha tara mua taotaoni.

8 Lubatia na maramana talighu ke vautoa dida na God,

ma kara nia linge ghaeghahe dato na holoutoana.

9 Tana limana te kaputia na volada,

me righitaonighi na lei tiola tana saisarikiba.

10 Ghe God, Ighoe to tabotaboghai;

Ighoe to va marabughai vagha na marabuna na silver

tara apo marabua tana vatei marabuana.

11 Ighoe to lotighai ilokana nimua na vugho

mo pitia tana vuvungamami na kaukauli ni tinoni lutu.

12 Ighoe to goni dilai na lei ovu ni kisumate

ge kara turi bitai na lei hulimami tara tautaruha.

Ighai tai tona potai na lake mana lualua.

Hauva, mo lavighai va tana bona te subo au vule iga

nimua na hevei ghe a God.

13 Ge ku vakalei na lei baubahu tu nighi vanigho tua,

Inau tu nia mai vanigho na sukaghi kekere

ta nimua na vale te tabu.

14 Eo, na lei baubahu hola tu gonighi

to rongoviu tana bona tu ghahau ilokana na vahola sule.

15 A keri vaho tua na pukuna ge u nia sukaghi vanigho na sukaghi kekere.

Na bolo te marabu me korukoru vulei nigua na lei bolo soko

te vagha na kokolo uruurua to lavipangotia.

Mu ku nia sukaghi na lei buluka mana goat.

16 Ighau udolu tau nia kikinima God,

kau mai ma kau vaovarongo

mu ku tughunia vanighai na hava te gonia vaniu,

17 Inau tu nia ngangaraha dato vania na hahanga,

mu holoutoa tana bona tu kokoe.

18 Ge ku mua toghia na palu tana tobagu,

a nigua na Lord, ke mua ghoi rongoviu.

19 Hauva ka, ma God te varongohiu!

Agaia te kabu varongohiu ta nigua na kokoeliulivuti.

20 Holoutoa God, te mua nia hughu nigua na kokoeliulivuti,

me mua lavi keha a nina dolo te mua soko buto itagua.