11
Maaron irau ighur muuri pa yes Israela mako
1 Ighe tauvene, pale tasaav mindai? Maaron ighur muuri pa tamtamon tooni? Mako kat! Aghita. Yau tamtamon to Israel. Yau paaghu to Abaram, ve puughu tsiau ivot ila to Benyamin. * Mbo 94:14; 2Kor 11:22; Pil 3:5
2 Maaron irau ighur muuri pa yes Israela mako. Pasaa, i tauu isiigh zi timin le wa. Matamim iŋgal imuul ila pa sinaiŋ to propet Ilia. Maaron aliiŋa tau tiboode na isaav tauvene: Ilia ivotia sosor to yes Israela ila to Maaron, ve itaŋ raraini ighe:
3 “O Tiina, yes tiravuur propet tsio tisov timatmaat wa.
Ve artaal tau tigharaat zi payo na, tauvene paam. Tirewaar zi tisov timbiriis.
Tauvene aazne, yau zigau kat ta naleep. Ve tizuari zi pa ravuuŋ ghau paam.” * 1King 19:10+
4 Ve Maaron iyol Ilia aliiŋa ighe:
“Mako. Aazne, yau leg tamtamon irau 7,000 tau nakis zi gha tiyozyooz ariaaŋ. Tauta tiput aghezi pa maaron karom Baal mako.” * 1King 19:18
5 Aazne, ŋgar raraate ivot muul. Maaron isiigh yes Israela siriv timin le itaghon i tauu loolo ve poia tooni. Tauta tighur ila to Krisi. * Ro 9:27
6 Zeran tawe, Maaron igham zi timin le itaghon uraat ve ŋgar popoia tau tighamgham zi ne mako. I itaghon tauu loolo ve poia tooni, ve igham zi. Ve imin ta i igham zi timin le itaghon uraat ve ŋgar toozi popoia, kanaŋ poia tooni tawe, imin poia tauu mako. * Ro 4:4, 9:15+; Ep 2:8
7 Ighe tauvene, pale tasaav mindai? Gabua tau yes Israela tizuari zi pani na, eval tiina tighamu mako. Tamtamon toozi eŋaeŋa ta Maaron tauu isiigh zi timin le na, yes mon ta tighamu. Ve yes siriv, i ipul zi titaghon tauzi ŋgar toozi. Tauta ŋgar toozi iyaryaaŋ kat tighe tizoor saveeŋ tooni. * Ro 9:31; 2Kor 3:14
8 Saveeŋa tiboode pataghaaŋ tauvene:
“Maaron igham zi lolozi iveghai tauzi imin tamtamon tau igheen le loolo iveegh kat.
Tauta matazi tighita gabua, eemon tighilaal puughu mako. Ve taliŋazi tiloŋlooŋ saveeŋ, eemon titaghoni mako.
Ve ŋgar toozi tawe isov soone. Iseeŋga iseeŋga gha ilam aazne.” * Lo 29:4; Is 29:10; Yo 12:40; Mbaŋ 28:26+
9 David paam isavia saveeŋ iŋarui zi ighe:
“Boor tau aniiŋ toozi igheen izala na, aat imin liis pazi, ve imin maet tau titut aghezi ila ve titap. Leso iyat sosor toozi. * Zeran ŋgara siriv tighe saveeŋ to boor, ene izaa to tutuuŋ tau Maaron igham pa yes Israela. Tutuuŋ tawe, ene gabua poia. Eemon yes Israela tigham ŋgar tiina kat pani. Tauta ikau ŋgar toozi gha tighilaal Yesu mako. * Mbo 69:22+
10 Matazi aat ikumkuum, ve tighilaal mako.
Ve yes pale tibaad pataŋani tiina le ndumezi ikook, ve tileep tauvene le alok.”
Yes Israela tizor Krisi, tauta ighur sooso pa vaaru poia ila irau nugh nugh
11 Yes Israela tau tighur ila to Krisi mako na, timin tamtamon tau itut aaghe ila maet, ve itap. Ve mindai, pale tileep tauvene taghon taghon gha ila? Mako. Pale tiburig muul. Onoon, aazne tisosor pa eez to Maaron. Eemon ŋgar tau tighamu na, ene imin eez pa Maaron to igham mulin nugh nugh tau Yuda mako na. Leso yes Israela tighita ŋgar poia tau i igham pazi na, ve lolozi ighaar pani kat, ve timuul tila pani. * Mbaŋ 13:46; Ro 10:19
12 Saawe tau yes Israela tisosor pa eez to Maaron ve tighur murizi pani, ene imin eez to poia tiina to Maaron izaa to eval tiina to taan. Pasaa, saawe tana, poia tooni iŋarui eval tiina tau Yuda mako na. Ve ighe tauvene, iit tawatagh: Isaav ighe yes Israela tisov titoor ŋgar toozi imuul ila pa Maaron, ene pale poia tooni tiina kat izaa to tamtamon tisov le iliiv poia tooni tau muuŋ izaa toozi na. † Saawe tau yes Yuda tizoornugh tighe tirav Yesu izala ai pambarooŋ na, tisosor pa eez to Maaron. Eemon iit tawatagh: Mateegh tooni, ta imin eez pait to Maaron ireu sosor toit ve igham mulin ghiit. Ve saawe tau Yuda tighur pataŋani pa mbaŋooŋa to Krisi, yes tipul Yerusalem, ve tighau tila pa nugh siriv. Gabua tana imin eez pa yes tau Yuda mako na gha tilooŋ vaaru poia. * Ro 11:25
13 Aiyo, yau naghe nasavia saveeŋ siriv iŋarui yam tau Yuda mako na. Pasaa, Maaron imbaaŋ ghau to nagham uratoi gham. Ve yau naghita naghe uraat tsiau tane, ene uraat tiina, ve uraat tauu. Tauvene naghe naghamu kat, leso ighur anooŋa popoia ivot. * Mbaŋ 9:15
14 Pa ighe uraat tsiau ighur anooŋa popoia siriv tivot ila sosomim, ene pale zetagŋa Israela tighita ve lolozi pani, ve tamtamon toozi siriv pale titoor ŋgar toozi ila pa Maaron, ve igham mulin zi. * Ro 10:19
15 Aghita. Saawe tau yes Israela tizoor Maaron ŋgar tooni, ve i ighur muuri pazi, ene imin eez to eval tiina to taan yesŋa Maaron tivalupu zi timin eemon. Tauvene murei, isaav ighe Maaron igham mulin yes Israela paam ve yesŋa tivalupu zi muul timin eemon, ene imin burigiiŋ to yes mateegha. ‡ Eez ite to tatoor saveeŋ ziiri tane, ene vene: “ene iit tawatagh: Saawe to Maaron ipaburigin yes mateegha, ene ilam igharau wa.”
16 Saawe tau tigharaat mberet, ighe tipamuuŋ Maaron pa sirivu imin maata, ene aat mberet isov tana imin Maaron le. Ve ai oliv tauvene paam. Isaav ighe waria imin Maaron le, ene aat booga paam tisov timin Maaron le. § Mberet sirivu tau tipamuuŋ Maaron pani, ene izaa to yes Israela eŋaeŋa tau tighur ila to Yesu imin maata. Ve ai oliv waria, ene izaa to yes Israela timbuzŋa Abaram, Isak, ve Yakop tau Maaron imbu saveeŋ tomani zi na. Gabua ru tawe tigham Maaron loolo isaghav yes Israela. Tauta i irau ighur muuri pazi kat mako. * Nam 15:17+
Mataan veleghin yes Israela sov. Pa iit paam, Maaron irau ighurghur ghiit mako
17 Yes Israela timin ai oliv pazoogh. Ve yam tau Yuda mako na, amin oliv sagsag bogazi. Aazne, ene imin Maaron isoop oliv pazoogh tana booga siriv tizi, ve ighur gham ala apaak ila niazi. Tauta aazne, atum tomania oliv pazoogh tana booga siriv, ve yamŋa aghamgham taan ŋgoreeŋa ila waria. * Yer 11:16; Yo 15:2+; Ep 2:11+
18 Eemon apakur taumim sorok aghe: “Yei popoiamai ve niliiv oliv booga siriv tau Maaron isoop zi tizi na.” Agham ŋgar tauvene sov. Matamim iŋgal. Yam ai booga mon. Ai waria ighamgham tapiri ilat tsiam mako. Yam aghamgham tapirimim ila ai waria.
19 Ve yam siriv pale aburig ve asaav aghe: “Oliv booga tawe, Maaron isoop zi tizi, leso yei nila nigham niazi.” 20 Saveeŋ tsiam tana, ene iduduuŋ. Eemon Maaron isoop zi sorok mako. I isoop zi tizi pasaa, yes tighur ila tooni mako. Ve aazne, yam agham niazi pasaa, ayooz ariaaŋ ve akis ghuruuŋ ila tsiam. Eemon apakur taumim sov. Yam aat aroi. * Is 66:2, 5; 1Kor 10:12; Pil 2:12; 1Pe 1:17
21 Pa ighe Maaron ighurghur oliv tauu booga mako, ene aat yam paam, i irau ighurghur gham mako.
22 Tauvene matamim iŋgal poi. Onoon, Maaron i poia puughu. Eemon i irau ileel ghiit mako. Yes Israela tau tighur murizi pani ve titap na, i ileleel zi mako. Ve yam, i igham poghani gham. Eemon yam aat akis poia tooni ariaaŋ, ve aleep iloŋ ila. Ighe mako, i aat isoop gham azi paam. * 1Kor 15:2; Hib 3:14
23 Ve murei, isaav ighe yes Israela titoor ŋgar toozi, ve tighur ila to Krisi, ene aat Maaron ipaak zi tila niazi muul. Pasaa, i tapiri irau to igham tauvene. 24 Aghita. Yam tau Yuda mako na, amin oliv sagsag. Yam avot ila oliv pazoogh mako. Eemon Maaron igham uratoi gham, tauta aazne apaak ila oliv pazoogh tana gha amin booga. Isaav ighe Maaron igham tauvene payam, onoon kat, oliv pazoogh bogazi tau i isoop zi tizi na, i aat ipaak mulin zi tila niazi.
Murei, yes Israela pale tighur ila to Krisi
25 Yam toŋvetaz, yau naghe navotia gabua yoŋgaaŋa ee payam. Leso apakur gham sorok sov. Onoon, aazne Maaron ipul yes Israela siriv titaghon tauzi ŋgar toozi. Tauta ŋgar toozi iyaryaaŋ kat tighe tizoor saveeŋ tooni. Eemon i irau ipul zi tileep tauvene le alok ne mako. Pale tilepleep tauvene le i iyau nugh nugh tamtamonazi tau i isiigh zi pataghaaŋ na tisov timin le, * Lu 21:24; Yo 10:16; Syg 7:9
26 mako igham mulin yes Israela tisov paam. Saveeŋa tiboode pataghaaŋ wa:
“Uleeŋa pale ileep loloz Zion ve ilam.
Ve i pale igham Yakop paaghu tooni tipul ŋgar toozi saghati ileple, ve matazi iŋgal Maaron muul. * Mbo 14:7; Is 59:20
27 Ve yau aat naghur lezi eez paaghu to nareu sosor toozi, leso yeŋa nivalupu ghei muul nimin eemon.” * Is 27:9; Yer 31:33+; Hib 8:8+
28 Aazne, yes Israela tau tighur ila vaaru poia mako na, koi isap yesŋa Maaron sosozi. Ve ene imin eez to poia to Maaron izaa to nugh nugh tau Yuda mako na. Eemon Maaron loolo ighengheen to yes Israela soone. Pasaa, timbuzŋa Abaram, Isak, ve Yakop, ta ndamozi pazi. Ve gabua ite paam, i tauu isiigh zi timin i le wa. * Lo 7:8, 10:15; Ro 9:5
29 Isaav ighe Maaron ipoi tamtamon eta imin le, ve igham gabua poia eta pani, ene i irau itoor ŋgar tooni muul mako. Tauvene irau ighur muuri pa tamtamon tana, ve igham mulin gabua tawe ne mako. * Nam 23:19
30 Aghita. Muuŋ, yam tau Yuda mako na, azorzoor Maaron ŋgar tooni. Ve aazne, yes Yuda anazi tighamgham tauvene. Eemon ŋgar tau tighamu na, tauta imin eez payam, gha Maaron loolo isaghatin gham, ve ireu sosor tsiam.
31 Tauvene aazne, yes Israela tizorzoor Maaron ŋgar tooni. Eemon murei, poia tooni tau i loolo isaghatin yam tau Yuda mako na, ve ireu sosor tsiam, ene pale ipaburigin ŋgar toozi. Leso yes paam titoor ŋgar toozi, ve Maaron loolo isaghatin zi, ve ireu sosor toozi. 32 Pasaa, Maaron ipul ŋgar to zoraaŋ saveeŋ ikau iit tasov. Leso iit tasov leen eez eemon to tala tooni. Ene poia tooni tau i loolo isaghatin ghiit ve ireu sosor toit. Eez ite paam mako. * Ro 3:9; Ga 3:22
Tapait Maaron pa ŋgar tooni
33 Onoon kat, Maaron, i ŋgar puughu. Ŋgar tooni, ene ila le ila kat, imin mazavan belbeluuŋa. Pasaa, i iwataghiir gabua naol isov. Sei irau iwatagh katin ŋgar tooni ve eez tau i itaghoni ne? Ighe tatoova to tagham ŋgar pani, ene pale ŋgar toit imbool. * Yop 11:7+; Mbo 92:5
34 “Pasaa, sei iwatagh Ŋeer Tiina ŋgar tooni?
Ve sei irau iuule pa ŋgar? * Is 40:13; 1Kor 2:16
35 Ve sei igham Maaron le gabua, leso murei iyol mulini? Mako.” * Yop 35:7, 41:11
36 Pasaa, i tauu ta imin gabua naol isov puughu. Ve gabua naol isov tiyaryaaŋ ila tooni, ve tileep leso tipaghazoŋai i eeza. Tauvene iit aat tapaiti irau saawe. Onoon. * 1Kor 8:6; Kol 1:16; Hib 2:10; Syg 4:11
*11:1: Mbo 94:14; 2Kor 11:22; Pil 3:5
*11:3: 1King 19:10+
*11:4: 1King 19:18
*11:8: Lo 29:4; Is 29:10; Yo 12:40; Mbaŋ 28:26+
*11:9: Zeran ŋgara siriv tighe saveeŋ to boor, ene izaa to tutuuŋ tau Maaron igham pa yes Israela. Tutuuŋ tawe, ene gabua poia. Eemon yes Israela tigham ŋgar tiina kat pani. Tauta ikau ŋgar toozi gha tighilaal Yesu mako.
†11:12: Saawe tau yes Yuda tizoornugh tighe tirav Yesu izala ai pambarooŋ na, tisosor pa eez to Maaron. Eemon iit tawatagh: Mateegh tooni, ta imin eez pait to Maaron ireu sosor toit ve igham mulin ghiit. Ve saawe tau Yuda tighur pataŋani pa mbaŋooŋa to Krisi, yes tipul Yerusalem, ve tighau tila pa nugh siriv. Gabua tana imin eez pa yes tau Yuda mako na gha tilooŋ vaaru poia.
‡11:15: Eez ite to tatoor saveeŋ ziiri tane, ene vene: “ene iit tawatagh: Saawe to Maaron ipaburigin yes mateegha, ene ilam igharau wa.”
§11:16: Mberet sirivu tau tipamuuŋ Maaron pani, ene izaa to yes Israela eŋaeŋa tau tighur ila to Yesu imin maata. Ve ai oliv waria, ene izaa to yes Israela timbuzŋa Abaram, Isak, ve Yakop tau Maaron imbu saveeŋ tomani zi na. Gabua ru tawe tigham Maaron loolo isaghav yes Israela. Tauta i irau ighur muuri pazi kat mako.
*11:16: Nam 15:17+
*11:17: Yer 11:16; Yo 15:2+; Ep 2:11+
*11:20: Is 66:2, 5; 1Kor 10:12; Pil 2:12; 1Pe 1:17
*11:25: Lu 21:24; Yo 10:16; Syg 7:9
*11:27: Is 27:9; Yer 31:33+; Hib 8:8+
*11:29: Nam 23:19
*11:35: Yop 35:7, 41:11
*11:36: 1Kor 8:6; Kol 1:16; Hib 2:10; Syg 4:11