4
Maaron ileep ila niia to ghamuuŋ pooz izi nugh sambam
1 Yau naghita gabua tana le isov, ve matag ila le naghita ataman ee ikakaak izi nugh sambam. Ra ŋeer tau muuŋ nalooŋa isaav payau imin tavuur itaŋ na, aliiŋa ilam payau muul ighe: “Uzalam sene, leso natotoi ghom pa gabua tau murei pale tivot itaghon Maaron ŋgar tooni.”
2 Rekia mon Maaron Avuvu tapiri izaa tsiau, ve naghita Maaron niia to ghamuuŋ pooz iyooz izi nugh sambam, ve Ŋeer ee ilepleep ila. * Mbo 47:8; Is 6:1
3 I naagho milmilia imin maet yaspa ve karnelian tau ŋgeretazi popoia na. Ve taliŋbuuz tau mbonari airaumbitai imin maet emeral na, ilivutin ŋeer tawe niia to ghamuuŋ pooz. * Ezek 1:22-28
4 Ve naghita ŋginiiŋa tamoot ee ve paaŋ (24) tileep ila niazi to ghamuuŋ pooz ve tilivut Maaron niia to ghamuuŋ pooz. * Zeran ŋgara tighe ŋginiiŋa 24 tawe, ene yes aŋela tau tiŋgin Maaron tamtamon tooni, o Yakop natŋa saŋavul ve ru ve yes mbaŋooŋa saŋavul ve ru to Krisi. Saveeŋ ziiri naol to rau tane isavia gabua saŋavul ve ru (12), ma tamoot ee ve paaŋ (24)[=12+12], ma ndiŋndiŋ ee, tamoot ru ve geege paaŋ (144) [=12 taims 12]. Saveeŋ tauvene, ene izaa to Maaron tamtamon tooni, ma Krisi lupuuŋ tooni.
Yes tinonogh zi pa nonoghiiŋa pisosooŋa, ve moghar ndamoonda to kinik tigheen izala dabazi. Moghar toozi tawe, tigharaat zi pa gol. 5 Ve naghita nugh ighani milmilia ta Maaron niia to ghamuuŋ pooz we, ve ivotvot, ve nalooŋ lalaav lutluutu. Ve sul liim ve ru tighanghan ila Maaron niia to ghamuuŋ pooz naagho. Sul tawe, ene Maaron avuvu liim ve ru. * Igham 19:16
6 Ve gabua ite igheen ta sewe paam. Ghitooŋa imin te. Tigharaata pa galas tau ŋgalaaŋa kat.
Ve gabua matazi yaryaare paaŋ tiyooz livutin Maaron niia to ghamuuŋ pooz. † Zeran ŋgara tighe gabua paaŋ tane, ene aŋela ariaŋazi kat tau tibesbees pa Maaron ve tiŋgin niia to ghamuuŋ pooz. Yes paaŋ pasaa, tighamgham uraat irau sambam ve taan ziige ta naol. Ighe buk tane isavia gabua paaŋ, ene puughu tauvene: Gabua tana igheen o ivot irau nugh tisov.
Gabua paaŋ tawe, matazi katini, irau anoŋazi dodoli. Matazi igheen pa naghozi ve murizi paam. * Ezek 1:5+; Is 6:1-3
7 Gabua paaŋ tawe, ee naagho imin laion. Ve ite naagho imin makau tamoot. Ve ite naagho imin tamtamon. Ve imin paaŋ pani, naagho imin manbog tau iraraav baage pa rovaaŋ. 8 Gabua paaŋ tawe lezi bagezi liim ve ee le irau zi. Ve matazi katini kat. Irau anoŋazi ve bagezi paam. Ve yes timariau mako. Mboŋ ve mataaz, tipapait Maaron eeza tighe:
“Tiina toit Maaron, i saksaki ve iŋgin gabua naol isov.
I patabuyaaŋ, le patabuyaaŋ, le patabuyaaŋ kat!
I ileep muuŋ geeg, ileep aazne, ve murei i pale ilam.” * Is 6:2+; Syg 1:4
Tipait Maaron eeza izi nugh sambam
9 Ŋeer tau ileep ila niia to ghamuuŋ pooz irau saawe na, gabua matazi yaryaare paaŋ tawe monmon tipapakuru ve tipapait eeza pa tapiri ve poia tooni. 10 Ve saawe tau tigham tauvene, yes ŋginiiŋa tamoot ee ve paaŋ tila titap tizi ila i naagho, ve tipakuru paam. Ve tizugh moghar toozi tau igheen izala dabazi na tizi, ve tighur zi ila ŋeer tawe niia to ghamuuŋ pooz naagho, ve tipait eeza tighe:
11 “O Maaron, Tiina tsiei, yo poiam kat. Isaav ighe nipakur ghom ve nipait ezam pa tapirim ve poia tsio, ene iduduuŋ. Pasaa, yo mon ta ughur gabua naol isov itaghon taum ŋgar tsio. Tauta gabua naol isov tivot gha tigheen tauvene.” * Gnp 1:1; Mbaŋ 14:15, 17:24
*4:3: Ezek 1:22-28
*4:4: Zeran ŋgara tighe ŋginiiŋa 24 tawe, ene yes aŋela tau tiŋgin Maaron tamtamon tooni, o Yakop natŋa saŋavul ve ru ve yes mbaŋooŋa saŋavul ve ru to Krisi. Saveeŋ ziiri naol to rau tane isavia gabua saŋavul ve ru (12), ma tamoot ee ve paaŋ (24)[=12+12], ma ndiŋndiŋ ee, tamoot ru ve geege paaŋ (144) [=12 taims 12]. Saveeŋ tauvene, ene izaa to Maaron tamtamon tooni, ma Krisi lupuuŋ tooni.
†4:6: Zeran ŋgara tighe gabua paaŋ tane, ene aŋela ariaŋazi kat tau tibesbees pa Maaron ve tiŋgin niia to ghamuuŋ pooz. Yes paaŋ pasaa, tighamgham uraat irau sambam ve taan ziige ta naol. Ighe buk tane isavia gabua paaŋ, ene puughu tauvene: Gabua tana igheen o ivot irau nugh tisov.
*4:6: Ezek 1:5+; Is 6:1-3
*4:11: Gnp 1:1; Mbaŋ 14:15, 17:24