1 Yisasia agesaga huno ageana veamoya moneamimoma haimainea veamoya “Monetia Anumaya Kotina amigahune.” huya pokisifi atalenae. 2 Atalageno ageana nagola monea omale keto amoa tole osi haesa monea anifi me vaimaine. 3 Me vaigeno Yisasia ageteno mage huno hie “Tamagelafa huna tamahanepauve ma ma monea omale keto amoa mukia hagoteyama metalaya veamogamina amakaseno ala mone metale. 4 Metaleanagi moneami-moma haimainea veamoya aliyamaa omalenea monegiya, afaa malenaya mone metalageno ani amoa mukia kavema alino nesia monea mukia metale.” huno humaine.

5 Nagoa vayamoya ala mono nofena mage huya hae “Anumaya Koti agi alisaga hugahe vayamoya kanale yafana aliya ma nona ali hilato huya kimalenae.” huya hae. 6 Hageno Yisasia mage huno hie “Ma ma neagaya nona nago kanama falote hinagenoa ani yafayaga mukia alino lagape aitalesigeno aposi-lavino tole yafamoa nago yafamo agupile aikalo huno omaigahie.” huno humaine.

7 “Hulave nelina kanomogae na kanafi ani kavala hugahie? Hanaa tokiya avameya ani kanama falotema hisia kanafina taveligahie?” huya havigae. 8 Hageno Yisasia mage huno hie “Nagoa veamoya havigema tamahapaisagetama havisao? Ohavisaya yafe kaye ho. Kasagoya vayala nagai nagi ayeya ‘Tamaugafa aligatisuna yafe Anumaya Kotia hulategeta neone.’ huya hisaya vayala evayi huya ‘Yisasima eteno esia kanamoa ago falote nehie.’ huya hisagetama amakavela oviho. 9 ‘Nagoa kotega kame nehae. Nagoa kotegaenema tu hugahe nehae.’ huyama tamahapaisagetama kolia ohiho. Ani yayaga hagoteya hugahayanagi ma mopama hano hisia yayaga aupaa vayi ohugahie.

10 Nago nofi vayamoya nagoa nofi vayaene kamea hugahae. Ala kotega vayaene nago ala kotega vayaene kamea hugahae. 11 Tusia imila aligahie. Alu kotega alu kotega tusia kafu nehuya amakatesia kanaene tusia kali alisaya kanaene falote hugahie. Ikapinagatila tusia lamamayo aisia tokiya avame yayaga falote hugahie.

12 Ma ma tamahapauva kemoa falote ohunesigeya tamakaya nagai nakavema nehayafe vayamoya tamatafa huya ali haviya hulamateteya mono nopi kava vayateene Kamani kava vayateene kaiyekea hulamatesayafe tamavaleya kina nopi tamategahae. 13 Tamatesagetama ani kanafina nagai kea hamapaigahae. 14 Hamapaigahagi kaiyekema hulamatesaya yupa ‘Naane hugahune?’ hutama tamakesa ohaviho. 15 Nagi nagaya nagainia ani kanafina kanale ke hisaya kea tamahapaisugetama hisageya kame vayatamimoya ‘Havige hae.’ huya ketamia hefala okigahae. 16 Hefala okigahagi ani kanafina itatamimogamiene nelamafaene neputamimoyaene tamasatamimoyaene tamakaitami afamoene nelamafuyaene tamakaifena ‘Ma mainae.’ huya kaiyekema hulamatesaya yafena kame vayatamimogami amayapi tamavaleya tamatesageya nagoamogatamina tamahaesagetama faligahae. 17 Tamakaya nagai nakavema nehayafe mukia veamoya amaipa kafa helamategahae. 18-19 Ania hulama-tegahayanagi kanaleya hutama maigahae. Tamayolegefafina nagola haviya ohugahigi tokiyaage hutama hetitama maisayafe agola maige maige hisaya tamahaimula aligahae.”

20 “Kasagoya kame ati vayamoya Yelusalemu kumama kove kove hisagetama agesayana ani kumala ‘Ali hagagi-talegahae.’ hutama tamakesa havigahae. 21 Havisayana Yutia mainesaya veamogatama tamaiya-yetama agoyalega viho. Yelusalemu mainesaya veamogatama tamaiya-yetama ani kumala ataletama viho. Hoyafinaga mainesaya veamoya eteya kumaamilega omesae. 22 Ani kanafina mukia Anumaya Koti kema kae-malenaya kemoa falote huno tamage hisiafe Anumaya Kotia ani veala kefo yama humainaya anonaa ali haviya humategahie.

23 Ani kanafina amaipaene anene nute ani-linesia nafanemogami itaamimoyaenefe tusia nahau nehie. Ani kanafina Isaleli kumala tusiya huno haviya hugahie. Isaleli veamoya kefo yama humainaya anonatamia Anumaya Kotia havi kavala hulamatesigetama tusia tamaugafa lamakata yana aligahae. 24 Kame vayamoya nagoa veala ayaaya naepeleti hataga hamaesageya faligahae. Nagoa veala nofi humateteya amavaleya alu kotega Yuta veane omainaya veamogami kotega momategahae. Yuta vea omainaya veamoya eya Yelusalemu kumala mukia amaiyaleti ayelata-pesageno aposi-lavigahie. Aposi-lavisigeya ani Yuta vea omainaya veala anile emaige maige huya maisageno Yuta vea omainaya veamoya kava yagaisaya kanaamia hano hugahie.”

25 Yisasia nagoene mage huno hie “Yagene kanefiene ikamoene kugava kava huno alu kava humaveligahie. Nagi hage limoa ayepafa hulino ute ete hisia yafena mukia kotega ma mopafi veala tusia amamayo aigahie. 26 Ikatema hanea yamoya kanage kanage huya alu kate kate visaya yafena mukia ma mopafima mainaya veamoya ‘Na ya falote hugahe nehie?’ huya nehisageno amaipamoa kanaage nehinageno amaulagamoa kagi kagi hinageya asaga hulavigahae. 27 Mukia ani yamaa falotema hutesigena ikapinagati emainoa kanoa vayamo natenea kanomona siate elavisugeya nagegahae. Tusia himamu yaniaene tusia hale yaniaene esugetama nagegahae. 28 Ani kugava yayaga aepama heno esigetamahena ‘Taugafa aligatisia kanamoa ago aupaa falote hugahe nehie.’ hutama hetitama tamanuna alisaka hutama ageho.” huno humaine.

29 Yisasia nago avame kea mage huno hamapaiye “Fiki yosaleene afa yosaleene ageho. 30 Ani yosamoa haegafa haisama falote higetamahena ‘Anuna nevalea kana falote hugahie.’ hutama nehae. 31 Ania hugahianagi anima tamahapauva kugava yama agenutamahena ‘Anumaya Kotia kava yagaisia kanamoa ago falote hugahie.’ hutama havigahae.

32 Nagaya tamage huna tamahanepauve meni kanafima mainaya veanea ofalinesageno ani yayaga falote hugahie. 33 Ikaene ma mopaene ago fanane hugahianagi nagai kemoa fanane ohugahie.

34-35 Tamakaitamile yagaiho. Havigu havili nelitetama nehutama havigu kave nesaya yafeene tamaugafale yaenefe tamakesa havi havi hisageno ani yamoma aiso hulamatesiana ala kanomo kalifumoma aupaa hatea kava huno esigetamahena talo tala ohunesageno esigi kava yagaitama maiho. Yisasia mukia ma mopafi veamogami amaulagale evayi hinageya atali-talu hugahae. 36 Ani yafena tamakaitami nagoke nagokemogatama kava yagaiho. Mukia kanale tokiyama alisayafena nunamuna higeno ani tokiya tamamisigeno ani havi yama falote hisia kanafina Anumaya Kotia tamaugafa aligatisigetama ikapinagati emainoa kanoa vayamo natenea kanomoni naule hetigahae.” huno hamapai-maine.

37 Yisasia mukia kanafina ala mono nopi haino maineno humavenelino mukia kegela Olivi yosa hanea agoyafi haino nemaiyane. 38 Haino mainegeno koma neleana mukia veala “Agai kema havigahune.” huya mono nopina etele nehayane.