20
Yisasifena “Himamukaa ta kamine?” huya havigemainae.
1 Nago yupa Yisasia ala mono nopi maineno alitalu humainaya vayala humavelino Anumaya Koti kanale mono kea hamapaigeya ani kumate vayatamaene mono note kava vayaene kahegi kema havilinaya anagaene agaitega emainae. 2 Mage huya hae “Hana augafa ala kanomo hugategeka mani kavala me nehane? Tokiya yaka ta kamine?” huya havigae.
3-4 Havigageno Yisasia mage huno hie “Nagaya hagotena nago yafena tamahavigegahue nagaila nahapaiho. Yonima tima falematenea yana Anumaya Kotia hutegeno ani kavala me nehifi afa vayamoya hutageno lina fale neamate? Hufalote hutama nahapaiho.” huno hamavige.
5-7 Higeya “Naa maa hugahune.” huya mohu mehu huteya mage hae “Anumaya Koti hutegeno emaine.” hisunagenoa Yisasia “Naa higetama agai kea tamakupina nomalae?” huno hugahianagita tagaya “Afa vayamoya hutageno emaine.” huta hisunana mukia veamoya “Yonia Anumaya Koti aune kano maine.” huya ago humainayafe “Yafa kayoteti tahaesageta faliyafene.” huya mohu mehu huteya Yisasifena kenonaa mage huya hae “Tapiga hutene? Tagaya ohavinone.” huya humainae. 8 Hageno Yisasia mage huno hamapaiye “Nagaya ania huna hana kanomoa hunategena emainoe huna tamahaopaigahue.” huno hie.
Havi vayamoya vaini hoyalema yagai-mainaya avame ke.
9 Yisasia aepa heno veafe nago avame kea mage huno hamapaiye nago kanomoa vaini nofi alaga hoya kali-maleteno noagea vayafe mage hie “Etama hoyanilela yagaitama maineho. Ani nofimo alagafitila aye fako hutama aliho.” humateteno ayaaya kanagefa umaigahe alu kotega umaine. 10 Afu nelea kanafina ani hoyamona nefaa nago aliya kanoa hutegeno kava vayatega nagoa vaini nofi alaga aligahe umaine. Vigeya hoyale kava vayamoya atafa huya aikoliteya “Okamigahunagi ataleka vuo.” huya hageno ataleno umaine.
11 Utegeno nagola kayo kayo kanoa hutegeno viana ania huya aikoliteya agaye hisifa kava huteteya “Okamigahunagi ataleka vuo.” huya hageno ataleno umaine. 12 Utegeno eteno nagola kayo kayo kanoa hutegeno viana ania huya aikoligeno kolamoa higeya hoyafinagati avaleya malaga hagayu hutalenae.
13 Hagayu hutalageno hoyamona nefaa agesafinaga mage huno havie “Hanaa hisue? Nafanenimona nahau nayamopafi nenahaiya nafanenia hutesugeno visigeya agai kea havisao?” huno havimaine. 14 Agesa haviteno hutegeno nevigeya ageteya mage huya hae “Mamona mani hoyamona nefa nafane. Nefama falisigenofena mani nafanemoa hoyaa aligahianagita agaila ago haegetao. Haesunageno falisigeta mani hoya tagai ya hapaegahie.” huya hae. 15 Huteya hoyafinagati avaleya hagayu hutaleteya hayageno fali-maine. Yisasia mage hie “Naa hayanagi hoyamona nefaa naa humategahie? 16 Eteno hoyaafima kava yagai-mainaya vayala tavata me hamaesigeya faligahae. Fali hano hisageno alu vayafe ‘Hoyanilela kava me yagaiho.’ huno hugahie.” huno hie. Higeya anifima alitalu humainaya veamoya mage hae “Avonio ani kavala ohisie.” huya humainae.
17 Hageno Yisasia nago kea mage huno hie “Kae-malenaya kemoa mage huno humaineane
‘Vayamoya yafa noma kigahena nago yafafena ‘Haviya humaine.’ huya atalayanagi haenagaa ani yafamoa ‘Tusia kanale yafane.’ huya nomo ayetagenale malenae.’ huya kae-malenayane.” huno hie.
Huteno amakeno ute ete hiana higeno mage huno hie “Agoma kae-malenaya kemona aepaa havilinao? 18 Mukia veamoya ani yafatema asaga hulavisayana amaugafamoa atalaga huno haviya hugahianagi ani yafamoa vaya amaugafalema asaga hulavisiana ailatapeno aitalaga talago hutalegahie.” huno hie. 19 Higeya kahegi kema havilinaya anagaene mono note kava vayaene “Tagaife ani avame kea nehie.” huya ago haviteya “Menia avaleta kina nopi ategahune.” huya hayanagi vaya amauhe koli huya atalenae.
Sisana takisi monea amigahafi oamigahae?
20 Ataleya ala tokiyaama hanea kanomote kaiyeke hutesiafe Yisasifena kesi amata huya maineya agesaya vayala humatageya moyevataga hisayafe ani vayala “Kanale fatago vaya mainone.” huya fau nehuya Yisasima hisia keleti atafa hugahe humainae.
21 Anima kesi katema vaiyaya vayamoya mage huya hae “Humaveli kanomogae tagaya havunana nehana kea fatago katekeya hana kanoe. Nagi kava vayaene afa vayaene nagoke katekeya hamapaika veama amaipa aye kea nohanagi tamage hutafa huka Anumaya Kotia ‘Ma kate vuo.’ huno hia kegeya taveneline. 22 Nagi takisi he yatela kava kanoa Sisana kanale amisupi oamisune?” huya havigae. 23-24 Havigageno Yisasia agaima ayevataga haya kea ago haviteno mage huno hamapaiye “Nagola alaga monea alitama naveliho.” higeya aveligeno “Mani alaga monelela ta augosaene ta agiene hane?” huno higeya “Sisa augosaene agiene hane.” huya hae. 25 Hageno Yisasia mage huno hie “Sisana agaia yanagi agaila amiho. Nagi Anumaya Kotina agaia yana agaila amiho.” huno hie. 26 Higeya anima kesi katema vaiyaya vayamoya “Vaya amaulagafi hisia keleti atafa hugahe hunanagi tokiya ke hianagita atafa ohugahune.” huya nehuya hia kehe amakesa havi havi huya ke ohuya mainae.
Satiusi vayamoya faliteya hetisaya auavafe Yisasina ke huya havige-mainae.
27-28 Nagoa Satiusi vayamoya Yisasitega emainae. Ani vayala mage nehaya vayale “Falimainaya vayala eteya heotigahae.” huya nehaya vayalagiya Yisasite mage huya me havigae “Humavenelina kanomoga Mosesea tagaifena mage huno kae-maleneane ‘Nago kanoma nepuamoa nafanea oate kanomoma aama ataleno falisigenoa aganaamoa ani aala aliteno maineno fali-mainesia kanomofe anonaa nafane atesie.’ huno kae-maleneane.
29 Sevenia (7) konaga mainayanagino nepuamimoa aala aliteneanagino nafanea oate kano maineno falimaine. 30 Falitegeno anile aganaamoa aliteana nafanea oate kano falimaine. 31 Falitegeno anile aganaamoa eteno ania hute hute hayana mukia sevenia (7) konagamoya ani aala alitayana nafaneamia oateya afaa falimainae. 32 Haenagalafa ani aala falimaine. 33 Sevenia (7) konagamoya ani aala alitenayanagi fali-mainesafitima hetisaya kanafina hana kanomo ani aala aligahie?” huya havigae.
34-35 Havigageno Yisasia mage huno hamapaiye “Ma mopafi mainaya veamoya vea aligeya ane aligeya nehayanagi haenagaama falote hisia kanafina veamoya amatea kavama agoma huteya maineya fali-mainesafitima hetisaya kanafina vemoya anea oaligahae. Amoyaenena vea oaligahae. 36 Ikapinaga ensole vaya kana huya maisayafenagiya nagoene ofaligahae. Agoma fali-mainafitila heti-mainayafe Anumaya Koti nafaneyaga maigahae.
37-38 Fali-mainaya veamoya hetisaya kea Mosesea ago haviline. Nago osi yosale ala ata anefela leanagi ani osi yosa otene huno kae-malenea kefiti mage huno kae-maleneane
‘Anumaya Kotia Apalahamuagi Aisakiagi Yekopugami Anumaya Kotiami mainoe.’ huno humaineane.
Ani anagala fali-mainayanagi ‘Anumaya Kotiami mainoe.’ huno humaineafe amaku amamemoa ofaliya afaa mainae huno ani kea humaine. Anumaya Koti aulagafina ani anagala hamaimula afaa hane.” huno humaine. 39 Higeya nagoa kahegi kema havilinaya anagamoya agaifena mage hae “Humavenelina kanomoga kanale ke nehane.” huya hae. 40 Hageya Satiusi vayamoya koli huya nagoene haviokenae.
“Anumaya Kotima hapalitenea kanoa tae.” huno Yisasia veala hamavige.
41 Yisasia mage huno hamavige “Veamoya Kalaisifena, Anumaya Kotima hutenea kanomofena, ‘Tevitina aginagomoa ma mopale kano maine?’ huya haya kemona aepaa naane hae? 42-43 Anumaya Kotifena yagame kae-malenaya avona Tevitia mage huno humaineane
‘Anumaya Kotia Anumayanimofena mage huno humaine ‘Tamaga nayatega ala vaya mainalega siale mopale emainesanagena kame vayakaa kaiyafi amatesugeya kagaife ‘Ago tagasane.’ huya hugahae.’ huno kae-maleneane.’
44 Tevitia Kalaisife ‘Anumayania mainane.’ huno humainegi naa higeno Tevitia haenagama atesia aginagomofena ‘Anumayania mainane.’ huno humaineane?” huno hamavige.
Kahegi kema havilinaya anagamoya kefo kavala nehaya anagakeya mainae.
45-46 Mukia veanea maineya havigeno Yisasia agaiene tokaeya nemaiya anagafe mage huno hie “Kahegi kema havilinaya anagafena kayeho. Ani anagamoya ayaaya kena failiya yafena ‘Nelagafi notagafi?’ huya nehaya anagale. Vaya atagu nefaya kumapi mo vaiyatete nehuya ‘Naa vaya mainae huya ali falu fala hulatesae.’ huya nehuya mono nopiene imuleene ‘Ala vayaage alitalu huya nemaiya yatekeya maigahune.’ huya nehae. 47 Ani anagamoya keto aneyagahena ‘Mono nopima atalesaya monea tamiho.’ huya nehuya noamifima hanea yayaga musufaya huya moneamia ali hano nehaya anagalagiya vayala ayemavataga huya ‘Kanale anaga mainae.’ huya hisae huya ayaaya nunamuna humainae. Aniama nehaya anagamoya havi miyana tusiya huno amaugafa amagata aisia yaene aligahae.” huno hie.