22
Yutasia hulamage huno “Yisasina avalena kava vayala tamamigahue.” huno humaine.
1 Ala imu negiya kanamoa meupa higeya ani imule hale oki kaihamena nenayane. Ani imua kafuahe kafuahe Anumaya Kotima Yuta veamogami amakinago-mogamima amaugafa aligatimainea kanahe amakesa havi havi hisaya imu alitalu huya negiyane. 2 Ani kanafina mono note hagote kava vayaene kahegi kema havilinaya anagaene Yisasina haesaya kafe atiyayanagi vaya amaulagahe koli humainae.
3-5 Koli nehageno aupaa Satania Yutasi aipafi hai fale-maine. Yutasi Isakaliotia Yisasina tuelufua (12) anagaene nemaiya kanogino neamataleno viaamo mono note kava vayaene mono note ati kava vayaene kea kea huno mage hie “Nagaya hanaa kateti agesila huna tamahapaisugetama Yisasina atafa hugahae?” huno higeya muse huteya “Aniama hisanageta mone hageta kamigahune.” huya hapaimainae. 6 Hapaigeno Yutasia “E, kanalele” huno huteno vaya kulata oaiya yate kesi kateti Yisasina movalesigeya atafa hisaya kafe ati ayemaine.
Agaiafiti tole kanolatana kave mo talo tala humainae.
7 Hale oki kaihamema nenaya kanamoa hagote yupa falote hie. Ani yupa amaugafama aligatimainea yafe amakesa ali hao hisayafe nagola sipi sipi nafanea hemainae. 8 Yisasia Pitaene Yoniene hunateno mage hie “Utana Anumaya Kotima taginagomogami amaugafa aligatimainea yafe tagesa ali hao hisuna kavela utana talo tala hiageta monamano.” huno hie. 9 Higeana “Hana nopi mo lalo tala hisue huageka nehane?” huana havigae.
10-11 Haageno Yisasia mage huno hanapaiye “Havio ala kumate utana nago kanomoa ti kema hefilino visia kanoene mo fotu hutetana akave utana haisia nopi haitana ani nomona nefafe mage hutana havigeo ‘Hulavenelia kanomoa kagaife mage huno kahavige ‘Hana nopi nagaiene tokaeya nemaiya anagamoyaene Anumaya Kotima taginagomogami amaugafama aligatimainea yafe tagesa ali hao hisuna kavela nesune?’ huno hie.’ hutana havigeo. 12 Havigesaageno folamo huno anayapi kimalenea nona ago alino hilato humalenea nona, ala nokefa, tanavelisigetana ani nopi kavetia talo tala hio.” huno hanapaiye. 13 Hanapaigeana vaana hia kemoa mukia falote higeana Anumaya Kotia amaugafa aligatimainea kanahe amakesa havi havi hisaya kavela mo lalo tala humainae.
Yisasia vainiene mayaene anagaa amamine.
14 Kave ne kanamoa aupa higeya Yisasiene agaiaene tokaeya nemaiya anagamoyaene kave negahe folamole mainae. 15 Mainageno Yisasia mage huno hamapaiye “Anumaya Kotima taginagomogami amaugafama aligatimainea yafe tagesa ali hao hisuna kavela tamakaiene tokaeta nesuna yafe tusiya huno nenahaiye. Netena tusia nagata aisigena faligahue. 16 Tamahapauve ma kavela nagoene ma mopafi mainena onegahue. Anumaya Kotia agola tamaku tamamena aligatisigena ikapinaga etena negahue.” huno hamapaiye.
17 Nagola nofi alagamo timo agia vainie. Yisasia ani lima hanea keayola alino Anumayamotega muse huno havigeteno mage huno hamapaiye “Ma keayola alitama nete nete hiho. 18 Tamahanepauve menia ma vaini nofi alagamo tina nagoene onegahue. Anumaya Kotima kava yagaisia kanamoma falote hinagena etena negahue.” huno hamapaiye.
19 Naa huteno kaihamena alino nunamu huno muse huno havigeteno kolite kolite huno neamamino mage huno hie “Mamona nagaini naugafae. Tamakaife huna naugafa atalesugetama mukia kanafina ania hutama nete nete nehutama nagaifena tamakesa havi havi hutama maiho.” huno hamapaiye. 20 Higeya ani kavela netageno vaini nofi alagamo tima hanea keayola alino ania huno Anumayamotega muse huno havigeteno alino amamite amamite nehuno mage huno hamapaiye “Ma lina nagai kolaniae. Nahaesagena falisuana kolaniamoa tamakaifene huno take take hulavisiafe haegafa kea, Anumaya Kotiene hage-lafitama maisaya kea alino fatago hugahie.
21 Haviho vayamoya havisagi huno nagaila nagesi huno kame hunatesia kanomoa nagaiene tokaeno mainegetaa nagokepiti kavela alitaa nenoe. 22 Ikapinagati emainoa kanoa vayamo natenea kanomona Anumaya Kotima hunatenea kate ugahuanagi vayamoya havisagi huno nagesi hunatesia kanomofena ‘Avonio nahau hanagi kagaya maigayo huna nehue.’ huno humaine.” 23 Higeya amakaiami huge havige nehuya mage hae “Ani kavala tagaipitila ta hugahie?” huya mo havige me havige hae.
“Tagaipitila ta ala kanotia maine?” huya ke vaimainae.
24 Yisasienema tokaeya nemaiya anagamoya mage huya hae “Ta tagaipina tagaseno ala kanoa maine?” huya ani yateti ke vaimainae. 25 Ke nevaigeno Yisasia mage huno hie “Ma mopale ala kava vayamoya kemamakiya aliya ke huneamateya ‘Tagaifela kayone huka kanale kava kanoe huya hunatesae.’ huya nehae. 26 Nehayanagi tamakaya ania kavala ohiho. Tamakaipima agima hanesia kanomoa osi nafanemoma maiya avamete maisia kanomoa kava kanotami maineno kayo kayo kano maisie. 27 Ta ala kava kanoa maine? Mopale maineno kavela nenea kanofi? Kavela hatino neamamia kanofi? Afaa mopale maineno kavema nenea kanoa ala kano mainegi nagaya tamakaiene mainena kayo kayo hunelamatoe.
28 Nagaitema havi kanama falote higetamahena tamakaya onataletama nagaiene mainayane. 29 Ani yafena Nenafaa nagaife ‘Kava yagaigane.’ huno hunatenea kava huna tamakaila ‘Kava yagaigahae.’ huna nelamamue. 30 Naa hisugetama kavama yagaisua kumanilela umainetama nagaiene kavela nenetama kava vayamogami siale mainetama tenia (10) Isaleli nofi veamogamite kava yagaigahae.” huno humaine.
Yisasia Pitafe “Akaveno hunategahie.” huno humaine.
31-32 Saimonifena mage huno hie “Saimonigae, Saimonigae havio Satania tamakayama nagaila natalesaya yafe tamakaila tamatafa huno ayelamavataga hisia yafe ‘Ani vayala namio.’ huno Anumaya Kotifena havigeanagi nagaya kagaifena Saimoniga nagaifema ‘Tusia tokiyaa hane.’ huka kagupi maleka kametiti humainana kea oatalesanafe Anumaya Kotitega ago havigogi kagua aiyahae huka vayakamoya nagaifema amakupi maleya amametiti hisayafe amaya huo.” huno hie. 33 Higeno Saimonia kenonaa mage huno hie “Alaniamogae nagaya kagaiene kina hulaateteya taahaesagetaa faligahue huna nagu nagesa talo tala nehue.” huno hie. 34 Higeno Yisasia kenonaa mage huno hie “Pitaga kahanepauve meni kegela kokolemoa agea oainesigeka tagufa (3) kanale ‘Nagaya oagenoa kanoe.’ huka avane hunategane.” huno humaine.
Yisasia anagaahe “Monetamiene kutamiene naepetamiene aliho.” huno humaine.
35 Huteno nagoene mage huno hamapaiye “Monetamiene kutamiene tamaiya noene oalitama viho huna hulamatogetama vayana nagoa yafena aupa humainao?” huno higeya “Aao mukia yana kanaleya huta alimainone.” huya hae. 36 Hageno nagoene mage huno hie “Hagotena mani kea tamahapai-mainoanagi menia monetamima hanesimogatama alitama viho. Kutamima hanesi-mogatama alitama viho. Ayaaya naepetamima omalesi-mogatama kenatamia alu kanomona amisageno anonaa ayaaya naepea tamamisie.
37 Naafene nagaya tamahanepauve nayona Anumaya Koti kefima kae-malenaya kemoa mage huno kae-maleneane
‘Vayayagamoya agaifena mage hae ‘Havi kavakeya nehia kano maine.’ huya hae.’ huya kae-malenayanagi
nagaima hunatesaya kavama hisagenoa ani kemoa falote hisigeya ‘Tamage humaineane.’ huya hugahae.” huno nehie. 38 Higeya mage hae “Alatimogae ago tole ayaaya naepea ma hane.” huya hageno kenonaamia mage hie “Haile.” huno humaine.
Yisasia Olivi agoyafi umaineno nunamu humaine.
39 Yisasia kumala ataleno mukia kanafi nehia kava huno Olivi yosa hanea agoyafi haigeya agaienema tokaeya nemaiya anagaamoya akave haimainae. 40 Ago anilega uvayi huteya mage huno hamapaiye “Anumaya Kotitega nunamu hutama havigeho ‘Satanima ayelavataga hisia yapina tavaleka ovuo.’ hutama havigeho.” huno hie. 41-42 Ani kea huteno neamataleno viaamo vayamoya yafama hagayu hutalageno nevia avamete viaamo aleya moye maineno Anumayamotega mage huno havige “Nenafagae falisua kava nehugi kahaisigekahena ani havi kanamoa satuage hia ti kana ti hanea keayola nahafalo. Afaa nagai nagu nagesa akave ohuka kahaisia kavala huo.” huno havige-maine.
43 Nehigeno ikapinagati nago ensole kanomoa tokiya memine. 44 Memigeno Yisasia augafafinaga malageno ageana tusia kanaage haiya yafe Anumayamotega nagoene tusiya huno havinegegeno amunamoa kolamoma hia kava huno mopafina take take hulavimaine. 45 Take take nehigeno Anumayamotega havigeteno hetino mogeana agaiaenema tokaeya nemaiya anagamoya hamauma haya yafe ago fae-mainageno momake-maine. 46 Momaketeno mage huno hie “Ae faetamage mainao? Hetitama Satania ayelama-vataga hisigetama asaga hu otavisaya yafena Anumayamotega nunamuna hutama havigeho.” huno hie.
Yutasia Yisasina avaleno kame vaya amayapi atene.
47 Ani kea nehigeya kasagoya vaya evayi hageno Yutasia tuelufua (12) anagapi tokaeno nemaiya kanomoa amavaleno Yisasina me tako hugahe emaine. 48 Neegeno Yisasia mage huno hie “Yutasigae natako hisana yateti nagaila ikapinagati emainoa kanoa vayamo natenea kanomonia nagesi huka kame vaya amayapi nategahe nehano?” huno hie.
49 Nehigeya agaiaenema tokaeya nemaiya anagamoya haya kavala ageteya mage hae “Alamogae ayaaya naepeleti hamaesuno?” huya hae. 50 Nehageno amakaipiti nago kanoa ala mono nopima hagote kava kanomona aliya kanoamona ayaaya naepeleti tamaga kaiyaga agesa aifakali-talegeno asaga hulavimaine. 51 Aifakaligeno Yisasia mage hie “Tu hisaya kavala ohiho.” huno nehuno ayana ani agesamo aepale maleno agesa alino kanale hutene.
52 Alino kanale huteteno mono note kava vayafeene ala mono note ati kava vayafeene Yuta vayatamaene agaima atafa hugahe aya vayamogamifeene Yisasia mage huno hamapaiye “Tamakaya nagaifena ‘Vaya nehamaeno musufaya nehia kano maine.’ hutama ayaaya naepene muki kayoene alitama neao? 53 Nagaya mukia kanafina efi efi huna tamakaiene ala mono nopina nemauvanagi natafa ohunayane. Anumaya Kotia meni kana tamayapi malegetama Satania hani yamo nefaa aliya alisia kanamoa ago falote humaine.” huno hie.
Pitaa Yisasifena “Noagoa kanoe.” huno avane humaine.
54 Atafa huya mono note hagote kava kanomo kumate avaleya vageno Pitaa akave anatino vianagi avatela ounegi ago aluale umaine. 55 Umainegeya ani no kegiya kovefi ata kae-maleteya mopale mainageno Pitaa amakaiene mopale umaine. 56 Ata anefete mopale mainegeno nagola aliya munamoa Pitana ageke huno ageteno mage hie “Ma kanoa Yisasiene vaiyatete nehia kanoe.” huno hie. 57 Higeno Pitaa avane huno mage hie “Aao ma munamoga nagaya oagenoa kanohe nehane.” huno humaine.
58 Osia maigeya nago kanomoa Pitana ageteno mage huno hie “Kagaya Yisasiene tokaetana nemaia kano mainane.” huno higeno Pitaa mage hie “Aao ma nemoga nagaya oagenoa kanohe nehane.” huno humaine. 59 Osia maigeya nago kanomoa tokiyaage kefiti mage huno hie “Tamage huna tamahanepauve ma kanoa Kalili kanoe. Yisasiene vaiyatete nehia kano maine.” huno hie. 60 Higeno Pitaa mage huno hie “Ma nemoga nagaya ohavinoa kehe nehane.” huno nehigeno anile aupaa kokolemoa agea aimaine.
61-62 Age aigeno Anumayamoa maiyahae huno Pitana ageke huno agegeno Pitana agesamoa aikalo higeno Yisasima hapaigeno havimainea kea mage huno humaineane “Meni kegela kokolemoa agea oainesigeka kagaya tagufa (3) kanale avane huka nagaila ali falakigane.” huno humainea kehe Pitana agesamoa aikalo higeno haviteno hatilavino viayamo tusia avi motemaine.
Yisasina kigi huneateya aikoli-mainae.
63-64 Yisasima atafa humainaya vayamoya kigi huneateya akaya ateya kayo aikoneliya aulagafina kenaleti nofi kisalu kiteneya mage huya hae “Kaune laga nehana kanogi tahapaiyo taya negahayae?” huya havigae. 65 Nagoene alu ke alu ke huya kigi huneateya akaya atenae.
Yisasina kanisole vayamogami amaulagale kaiyeke hutenae.
66 Kotigeya Yuta vayamogami vayatamaene mono note kava vayaene kahegi kema havilinaya anagaene kanisolefi melitalu huteya Yisasina avaleya anile umaineya Yisasifena mage huya havigae. 67 “Tahapaiyo kagaya Anumaya Kotia taugafa aligatigahie huno hugatenea kano mainano?” huya hageno Yisasia kenonaamia mage hie “Nagayama tamahapaisugetamahena ‘Tamage nehane.’ hutama ani kea havitama tamakupina omalegahae. 68 Nagaya nago kema tamahavigesugetamahena kenonaania nahaopaigahae. 69 Meni aepa heno ikapinagati emainoa kanoa vayamo natenea kanomona tusia himamua hanea Anumaya Kotina aya tamaga kaiyaga hanea siale umainena agola maige maige huna maigahue.” huno humaine. 70 Higeya mukia anile melitalu huya mainaya vayamoya mage huya hae “Kagaya ani kea nehananagi Anumaya Kotina nafaneamoga mainano?” huya havigageno “Tamakaya nagaifena tamage nehae. ‘Ani kano mainane.’ hutama nehae.” huno humaine. 71 Higeya mage hae “Agaia avayafiti ago haesuna kea hufalote higeta havune. Havigu nagoa vayamoya nagoa kea agaifena tahapaiyafenagita alu vayamogamifena ke ohisune.” huya humainae