1 Poloene Panapasiene Atioku kumate Yisasi anagaene mainaageya nagoa vayamoya Yutiati elaviya mage huya hamapaiye “Mosesema ‘Tamakoya anoya taga hiho.’ huno humainea kea akave omalesayana Anumaya Kotia tamaku tamamena aliokatigahie.” huya humainae. 2 Hageana Poloene Panapasiene “Aao, tamakaya havige nehae.” huana amakaiene tusia ke vaiteya ani kema fatago hisaya yafe Poloene Panapasiene nagoa vayaene mo hamavigegahe Aposolo vayategaene mono note kava vayategaene humatageya Yelusalemu haimainae.

3 Yisasi anagamoya humatageya katega vayana Fonisia kotegaene Samelia kotegaene alu kumate kumate ute ete huya Isaleli veane omainaya veamoya amakua aiyahae huya Yisasina amakua aminaya kea amafuamakanagamina hamapaigeya haviteya tusia muse humainae. 4 Muse hageya Yelusalemu uvayi hageya alitaluma humainaya Yisasi anagamoyaene Aposolo vayaene soka vayayagaene falu fala humatageya mukia Anumaya Kotia anakaiene tokaeno humainea kavafena hamapai-mainae. 5 Hamapaiageya nagoa Falasia vayala Yisasina amakua aminaya vayamoya mage huya humainae “Isaleli veane omainaya veamoya Yisasina amakuama aminesayana ania hutama amakoya anoya taga hiho. Mosese kahegi kemo akave maleho huta kahegi malesune.” huya humainae.

6 Hageya ani kema humainaya ke fako hugahe Aposolo vayaene soka vayamoyaene melitalu humainae. 7 Melitalu humaleteya kasagoya ke-yeso maiya hutageno Pitaa hetino mage huno humaine nafunaganagatama tamakaya havimainae nayona Anumaya Kotia tamakaipiti nagaifena “Kagayae.” huno “Isaleli veane omainaya veamogamina Yisasi kanale mono kea hamapaisanageya haviteya aliya amakupi maleya amametiti hugahae.” huno humaineane. 8 Anumaya Kotia taguafina ago agelama huno agemainea kanogino ageana “Ani veamoya amakua ago namitafa hageno tagaima Alu Aotage Avamumoma taminea kava huno ani veala amamine. 9 Nagoke avamete huno Alu Aotage Avamula amamine. Yisasifenema huya haviya amakupi malenayafene huno amakupima hanea kefo yaamia ago aye hami-talene. 10 Ago aye hami-talenegi naa higetama Anumaya Kotima humainea kavafena ‘Afa ya kana yane.’ hutama tusia kanaage yana alitama Yisasina amakua aminaya veatela malegahe nehae. Nayona taginagomoya Mosesema taminea kea akavela omalenayane tagayaenena menia akave malesuna tagamula omalene. 11 Omaleneanagi ‘Anumayatimoa Yisasi ali kayone hulateno kefo yatihe huno faliteno tagu tamena aligatimaine.’ huta tametiti nehunanagi ani yateti Isaleli veane omainaya veamogami amaku amamena ago aligatimaine.” huno humaine.

12 Pitaa mani kea hianagi mukiama alitalu humainaya vayamoya nago ke kanoa ohunae. Ohageana Panapasiene Poloene Isaleli veane omainaya veamogami amunopi Anumaya Kotima anakai anayapima tokiyaage avame yama humainea yafena hamapaiaageya havimainae. 13 Nehavigeno Yemesia hetino mage huno humaine “Nafunaganagatama nagai kea haviho. 14-15 Anumaya Kotia ehe kanafima Isaleli veane omainaya veala amaya hugahe viayamo ani veapitila agaia veane maisaya yafene huno amavale-maine. Saimoni Pitaa ago tahapaigeta havimainonagi ani kea Anumaya Koti amaune vayamoya mage huya nayona kae-malenayane

19 Ani yafe nagayama havua nagesamoa mage nehie Isaleli veane omainaya vayapiti Yisasina amakua amitafa humainaya veamogamina kana yana oamamisune. 20 Avo kaeta ‘Mage hutama hiho.’ huta hamapaisune ‘Fali-mainaya veafe ‘Anumayati mainae.’ huya amakisana nevaiya malenesaya kavela onesae. Ane munane amavayu nehisaya kavala ataleho. Kolamoa agusafinaga hanesia afuene kolaenena oneho.’ huta hamapaisune. 21 Nayona aepa heya mukia kotega Yuta vayamogami mono nopina mukia Sapati yupa Mosese kea hapaliya nehaviyane. Nehaviyanagi haviteya akavema malenuyahena akave malegahae.” huno humaineane.

22 Aposolo vayaene soka vayaene Yisasi anagaaene mukia alitalu humaineya kea haviteya “Kanalele.” huya amakaipiti tole kanolatana hesaga huteya hunatageana Poloene Panapasiene Atioku kumate umainae. Anima hunataya kanolatana kava kanolataami mainae. Anakia Yutasi Pasapasiene Sailasiene hunatageana umainae. 23 Avona kaeteya ani kanolatamogani anayapina maleteya mage huya kae-malenae.

Tagaya Aposolo vayaene soka vayaene mani avona kaeta Isaleli veane omainaya vayapitima Yisasife havitama tamakupi maletama tamametiti nehaya tafu-taganagatama Atioku kotegaene Silia kotegaene Silisia kotegaene mainaya veamogatama “Felugae.” huta avona kaeta nelamamune. 24 Tagayama havunana nagoa vayamoya tagaipitila nagoa tamakesa kumo hutama tole lamakesa havisaya augafa kea mo lamahapaiyanagi tagaya “Ani kea hiho.” huta hu-oama-tenone. 25-26 Hu-oamatenonafene huta melitalu hageta kea huta haya kiteta tole kanolatana tagaipitila tahau tayamopafi nelahaiya kanolata hunatonageana Anumayatimoa, Yisasi Kalaisina agai ke hamanepaia yateti hanaesageana falisaa yafena anamayoa oai kanolatane, Panapasiene Poloene tamakaitega ugahe nehae. 27 Yutasiene Sailasiene hunatesunageana tamakaitega humainona kea anavayafiti mo lamahapaigae. 28-29 Alu Aotage Avamumoa tagaiene mainegeta kea kea huteta “Kanalele nagoa kana yana amayonalela omalegahunagi ma yamaage akave malesae. Fali-mainaya veafe amakisana vaiya atupa kave alisaga huya malesaya kavela oneho. Kolamoa agusafinaga hanesia afuene kolaenena onesae. Ane munane amavayu nehisaya kavala ohisae. Ani kavama ohisayana kanaleya huya maigahae. Ketia male me hano hie.” huya kae-malenae.

30-31 Kae-maleteya humatageya Atioku laviya Yisasi anagamogamina molitalu humateteya mani avona amamigeya hapaliya haviteya humainaya kehena tusia muse humainae. 32 Muse hageana Yutasiene Sailasiene Anumayamo aune kanolata maineana ayaaya kea amaku amamema alilokiya vaisaya kea hamapai-mainae. 33-34 Ani kea huteana ayaaya kanagefa amakaienena maiteana eteana vaageya ali falu fala hunatetageana hunatenaya vayatega eteana umainae.

35 Vageana Poloene Panapasiene Atioku maineana nagoa veanene ailokaeana Yisasi kea hamanepaiana mainae.

36 Nagoa kana maiteana Poloa Panapasifena mage huno humaine “Etetaa mukia kumate Yisasi mono ke hamapai-mainoa kumate ute ete hutaa tafu-taganaya kanaleya huya mainafi haviya huya mainafi utaa mogesue.” huno humaine. 37-38 Higeno Panapasia “Yoni Maki avale-linetaa ugahue.” huno hianagi Poloa mage hie “Aao, ani kanomoa hagoteno taagaienema viana Pamafilia kumate mo nelaataleno aliyana oalino umaineane.” huno humaine. 39 Higeana ani yateti tolefi aliana fako huana anahaote anahaote umainae. Panapasia Makina neavaleno tipi kalefi haisaga humaiageno Saipalusi anavaleno umaine. 40 Vaageno Poloa anonaa Sailasina avalegeya afuaganaya Anumayamotega havigeya mage hae “Kategama visaana Anumayamoa kayone hulanateteno tanaya hisie.” huya hageana umainae. 41 Silia kotegaene Silisia kotegaene ute ete huana Yisasi anagamogamina amaku amamena ali lokiya vaimateana amaya humainae.