1 Poloa Tepi kumate uno Lisitala kumate umaine. Ani kumatela nagola Yisasife havino agupi malenea kanoa maine. Agia Timotie. Ani kanomoa Yuta amo nafane mainegi nefaa Isaleli kanoa omainegi, Kaliki kano mainegeno, itaamoa Yisasina agua amitafa humainea alagino maine. 2 Ani Lisatalaene Aikoniamuenema maineya Yisasi anagamoya Timotifena “Kanale kano maine.” huya humainae. 3 Hageno Poloa Timotifena mage hie “Taagaiene tokaeta vaiyesune.” Visuna kotega mainaya Isaleli veamoya kagaila negafaa Isaleli kanoa omainegi, Kaliki kano maine, huya ago havimainagi havigu ani yafe amaipa haviya huyafene huno nehuno Timotina avaleno Mosese kemo akave maleno agoya anoya laga humaine. 4 Naa huteya alu kumate kumate neuya Yelusalemu mainaya Aposolo vayaene soka vayaene humalenaya kema akave malesaya yafe hamapai-mainae. 5 Hamapaigeya Yisasi anagamogamina amametiti humainaya yamona tokiyaage higeya mukia yupa nagoa veanea ete ete huya egasago hageya amakaienena tokaeya mainae.

6 Alu Aotage Avamumoa “Esia kotega nagai ke hamaopaigahae.” huno nagalu humateneanagiya Poloagi Sailasiagi Timotigamina Faligia kotegaene Kalesia kotegaene umainae. 7 Misia kotega uvayi huya Pitinia haigahe hayanagi Yisasi Avamumoa “Oviho.” huno nagalu humatene. 8 Nagalu humategeya Misia kola agaseya Taloasi kumate elavi-mainae. 9-10 Ani kegela Poloa nagola himona kana ya ageana nagola Masetonia kotega kanomoa hetino maineno ke huno mage huno humaine “Kagaya hagelina lakaeka Masetonia me lahamao.” huno higeno Poloa agetegeta Anumaya Kotia tagaife “Ani kotega utama veamogamina Yisasife kanale mono ke mo hamapaiho.” huno humaineanagita tagaya aupaa Masetonia visuna kafe atineayone.

11-12 Taloasiti tipi kalefi haisaga humaunageno tavaleteno aiyayeno fatago huno Samotalesia ti amunopi hanea kumate euvayi higeta mo faeteta natena ufatago huno haigeta Neapolisi hai vayi huteta mopafi euta Filipai kumate euvayi humainone. Filipai kumala Masetonia veamogamina ala kumaamie. Nayona Lomu veanea eya mainaya kumale. Tagaya ani kumate euvayi huta nagoa kana mainone. 13 Maineta Sapati yupa ani kumamona kegiyamo hiyenale uteta titega lavita anilega Anumayamotega havinegaya kumala hane huta lavunanagi nagoa aneyaga alitalu huya mainageta Yisasi kea mo hamapai-mainone. 14 Hamanepaunageno nagola ani kema maino havia amo agia Litiae. Tayataila kumateti alagino haesate oko kena talo huno mone aliya nealia alagi Isaleli veane omainaya veapiti a maineanagi aluya huno Anumaya Koti agia alisaga nehia alagino ani amoa Poloma hia ke maino nehavigeno Anumaya Kotia agua alino aiyahae huteno havisia agu agesa amine. 15 Amigeno haviteno haenagaa mukia agaia anagaaene tina fale-matenae. Tina fale-matetageno tagaila mage huno lahapaiye “Musetami nehue nagaifema ‘Yisasina agua amitafa hia a maine.’ hutama hinutamahena nagaila noniafi emaiho.” huno tokiyaage ke higeta agayama hia kea akave malenone.

16 Nago yupa Anumayamotega havinegona kumate ugahe katega neunageno nago nofipi maineno miya noalia aliya nealia munala katega fotu hunanagi Kefo Avamumoa aguafi mainegeno aune laga huno haenagama vayi hisia yafema havigagenoa hufalote huno hamanepaiya munalagiya kava vayaamoya humainea keletila tusia mone nealiyane. 17 Ani munamoa Poloene tagaiene takave neeno keha keha huno mage hie “Ma vayala anafinaga mainea Anumaya Kotina aliya vayaamoyae. Anumaya Kotima tamaku tamamema aligatisiafe kanale kate kea tamahanepaiye.” huno humaine. 18 Nehuno mukia yupa ani kegeya maino higeno Polona aipamoa haviya higeno maiyahae huno ani Kefo Avamumofe mage huno humaine “Yisasi Kalaisina agai agileti kahanepauve ani munamo agupitila hati-lavika vuo.” huno higeno aupaa ani Kefo Avamumoa ataleno umaine.

19 Vigeya ani munamo kava vayaamoya agayana higeya monema nealiya kamoa tilegeya aepaa ageteya Pologani Sailasiganina anatafa huteya anavayu huya vea atagu nefaya kumapi kaiyeke hunatesaya vayate anavaleya umainae. 20 Yasi vayate anavaleya mage huya mo hamapaiye “Ma kanolatana Yuta kanolatanagiana tagai kuma alihaviya nehae. 21 Veane amavaya huana ‘Maa hiho.’ huana hulaveli-neliageta tagaya Lomu veamogata ani kavama hisunana tusiya huno haviya hugahie.” huya humainae. 22 Hageya melitalu humainaya veamoya “Tamage nehae.” huya hageya Yasi vayamoya mage hae “Kenaania ali hatata hutalenetama hegi kayoteti hanaeho.” huya hageya hanae-mainae. 23 Hegi kayoteti tusiya huya anamulo-nalo huya hanaeteya kina nopi nofi hunateteya ani kina nopi kava kanomofe mage huya hapaiye “Ma kanolatatela tokiyaage huka yagaiyo.” huya humainae. 24 Na ke hageno haviteno kava neyagaiya kanomoa anavaleno tole ayenalagi-male nopinaga anateteno anaiya nago yosa amunopi vaiteno aitalako hunatene.

25 Hunatayanagi anakaya ani kege amunona yagame nehuana Anumayamotega nunamu huana havinegaageya kina nopi mainaya vayamoya haviya mainae. 26 Mainageno anile aupaa tusia imi nealino ani kina note ayevasaga huya kimalenaya yosa ali kanage kanagu higeno mukia fitayagamoa aiyaki-lavigeya mukia kina nopi mainaya vayamogami amayakopitila nofiyagamoa kaluhelavi-maine. 27 Aikalu-helavigeno kina vayate kava kanomoa faeno maineleti hetino mogeteno mukia fitayagamoa ago yaki-mainegeno mage huno agesa havimaine “Mukia kina vayamoya ago falae.” huno ayaaya naepe kayona alisagino agaia ageya fakaligahe humaine. 28 Nehigeno Poloa ala kefiti mage huno humaine “Kagaikaa kaugafa ali haviya ohuo. Tagaya mukiamogata afaa mainone.” huno humaine. 29 Higeno ani kava kanomoa vayafe “Kanila alitama eho.” huno hunemaleno aiyayeno ani nopinaga hai-faleno monaketeno kolia huno atali nehuno Pologani Sailasiganina anavate eno anaiyafi mesaga hulavi-maine. 30 Hu-laviteno ani nofipiti anavaleno kumatega viayamo anakaife mage huno hanavige “Musetani nehugi naa hisugeno Anumaya Kotia nagu namena aligatigahie?” huno hanavige-maine.

31 Higeana mage huana hapaie “Anumayati Yisasife havika kagupi maleka kametiti hisanageno Anumaya Kotia kagu kamena ali-negatino anagakamogamiene ali-gatisigetama agai anaga maigahae.” huana hapai-mainae. 32-33 Huteana ani kanoene mukia agaia anagaaene Yisasi mono kea huhaleana hamapai-mainae. Hamapaitaageno ani kegekeya anavaleno amuna sese hunateteya anile aupaa ani kanoene agaia anagaaene tina fale-matenae. 34 Tina falematetaageno anavaleno nomaafinaga umaineno kavela anamiteno tusiya huno agaiaene agaia anagaaene Anumaya Kotina amakua amiteya amametiti haya yafe tusia muse humainae.

35 Muse hayanagi kotigeno Yasi kanomoa ati vaya humategeya eya mage me hae “Ani kanolatana afaa anatalegeana vio.” huya humainae. 36 Hageno kina vayate kava kanomoa ani kea mage huno Polona hapaiye “Yasi vayamoya nagoa vaya humatageya eya tanakaife mage hae tanakaya kina nopitila neataletana tanaipamoa kanale nehinagetana afaa vio.” huya me hanapaiye.

37 Higeno Poloa ati vayafe mage huno hamapaiye. “Taagaya Lomu kanolata mainoagi haviya hulaateya taagai kaiyekea haviteya fatago huya kaiyekea huotaateya vea amaulagafina hegi kayoteti tusiya huya taamulonalo huteya nofila hulaatenagi menia naa higeya falakiya taatalegahe nehae? Tamagelafa hutaa kesila ougahuagi amakaya amakaiami male eya ‘Kina nopitila ataletana vio.’ huya hulaatesae.” huno humaine.

38 Hageya ati vayamoya ani kea aliya Yasi vayamogami mo hamapageya “Lomu kanolata mainoe.” huana haa ke haviteya tusia koli humainae. 39 Koli huteya kina nopi uya amahau ke mo hunateteya “Havi kava hunagetana hae.” huya kina nopitila anavale neanataleya mage hae “Musetani nehune mani no kumala neataletana vio.” huya humainae. 40 Hageana kina nopitila ataleana Litia nopi mogaana anafuanakanagamina amaketeana amaku amamena ali lokiya vaisaya kea hamapaiteana ani kumala ataletana umainae.