1 Pologani Panapasigania Aikoniamu elavi-vayi huana Yuta veamogami mono nopi haiana kanale mono ke hamapaiageya kasagoya Yuta veamoyaene Kaliki veamoyaene haviya amakupi maleya amametiti humainae. 2 Naa haanagi nagoa Yuta veamoya “Yisasi kelefena tametiti ohugahune.” huya nehaya Yuta veamoya havige huya Isaleli vea omainaya veamogamina Yisasi anagafe “Kefo kava nehae.” huya hu-atile-male huya amaipa kafa hematenae. 3 Naa hayanagi Pologani Panapasigania ayaaya kana anile maineana tokiyaage huana Anumayamo kea huhalaageno Anumayamoa anaya huno agaia kayone humatesia kea havisayafene huno tokiyaa anamigeana tokiyaage avame yayaga humainae. 4 Ani kava haageya ani kumate veamoya tolefi aliya fako huya nagoa veamoya mage hae “Yuta vayamoya tamage nehae.” huya hayanagi nagoa veamoya mage hae “Aao, Aposolo vayamoya tamagea nehae.” huya humainae.

5 Huteya Yuta vayaene Isaleli vea omainaya vayaene kava vayaamiene mage hae “Pologani Panapasiganina ali haviya hunateteta yafa kayoteti hanaesunageana faligae.” huya humainae. 6-7 Hageana mani kea haviteana faleana Likonia kotega hanea kumatalate Lisitala kumateene Tepe kumateene uana anilega hanea kumayagalega umaineana Yisasifena kanale mono kea hamapai-mainae.

8 Lisitala kumatela nago kanoa maine. Ani kanoa atenelegati aiya avayu humai kanoa vaiyatete nohia kanoa anile mopale maine. 9-10 Mopale maineno Poloma hia kea maino nehavigeno Poloa aulu heno ageana ani kanomoa Yisasifema havino agupi maleno ametiti hia tokiyaa hanegeno Poloa agupinaga havia kea ago haviteno ala kegefafiti mage huno hie “Kaiya ayepi huka hetika maiyo.” huno higeno aupaa halelako humaino hetino ute ete humaine.

11 Ute ete higeya alitalu humainaya veamoya Poloma hutea kavala ageteya ala kefiti ailalupeya Likonia veamogami kefiti mage huya hae “Tagai anumayatia vaya kana huya tagaitela elavi-mainae.” huya humainae. 12 Nehuya Panapasife “Nago anumayati maine. Agia Susi maine.” huya nehuya Poloa kasagoya kema hia yafe “Nago anumayati maine. Agia Hemesi emaine.” huya humainae. 13 Susi agima alisaga nehaya nona ani kumamo agegayalega hanegeno ani note kava kanomoa ve pulumakaene tamu vailinea auseaene ani kumamo hionale alino mukia veanene ani tole kanomofe pulamaka heya kae-salamana hunategahe humainae.

14-15 Hunategahe nehageana Aposolo kanolatamogania Pologani Panapasigania mani kea haviteana “Havi kava hugahe nehae.” huana kenaania ali hatata hutaleana anima alitalu humainaya veamogami amunopi anaiyayeana vaayamogani ala kefiti mage hae “Nelaafugatamae naa higetama mani kavala nehae? Taagaya vayatafa mainoagi tamakai kana hutaa mopale vaya mainoe. Kanale mono kea tamahapaigahe taagaya emainoe. Afa kava hutama haimula omale manimo agi alisaga nehagi ani kavala neataletama tamakua aiyahae hutama Anumaya Kotina tamakua amitafa hiho. Ani Anumaya Kotia ofalisia kano maine. Ikaene mopaene hageliene talo humalene. Mukia ani lipi mainaya kafayagaene ikatega mainaya namaene mopale mainaya afuene veanene talo humaleneane. 16 Nayo kanafina alu nofi alu nofi veanemoya amakaiami hamaiya kate vaiyatete maiya hageno Anumaya Kotia kahegi oamatene 17 Kahegi oamateneanagi ‘Nagaya ma mainoe.’ huno amaveligahe huno kanale kavala humateno ikapinagatila kola lamamino hoyafina kanale kavela lamamino tamaku tamamemoa muse hisia yana male hiya hulamatene.” huana nehae.

18 Mani kea haanagi ani veamoya anakaila afu heya kae-salamana henategahe nehageana “Aao.” huana tokiyaage ke haa yafe atalenae.

19 Nagoa Yuta vayamoya Atiokutiene Aikoniamutiene anile evayi huya alitalu humainaya vayamogami amaipamona huya ali hetimatageya yafa kayoteti Polona haeteya agayana higeya “Ago fali-maine.” huya amakesa haviteya kumamona malaga avayu huya mo talenae. 20 Mo talayanagi Yisasife haviya amakupi malenaya vayamoya ayaamoya me maigagitageno anileti hetino kumatega mo faeteno kotigeno Panapasiene Tepe kumala neataleana umainae.

21-22 Vaayamogani ani kumate vayamogamina Yisasi mono kea hamapaiageya kasagoya veamoya Yisasife haviya amakupi maleya amametiti hageana eteana Lisitala kumate haiteana Aikoniamu haiana Atioku kumate evaana anile maineya Yisasife haviya amakupi maleya amametiti humainaya veamogami amaku amamema ali lokiya vaisaya kea mage huana hamapaie “Tokiyaage hutama tamakua Yisasina amitafa haya yana mukia kanafina ani katekeya vaiyatete hiho. Anumaya Kotife ‘Kava yagailato.’ huya nehaya veamoya ma mopale mainageno kana yayagamoa amaugafale falote hisianagi haenagaa kanale kumatela ugahae.” huana hamapaie. 23 Alu mono note alu mono note ute ete huana kave mosiya Anumayamotega havigeya Yisasina amakuama aminaya vayapiti kava yagaisaya soka vayala hapaliana “Kagayae kagayae.” huana humateteana mage hae “Tamakuama amitafa haya Anumayamo ayapi tamaya hisia yafe nelamatoe.” humateteana amateteana umainae.

24 Elaviana Pisitia kola mogaseana nago Pamafilia hanea kumala Pega kumate evayi humainae. 25 Pega kumate veamogamina Yisasi mono kea hamapaiteana anileti neamataleana Atalia kumate tavi-mainae. 26 Anileti tipi kalefi haisaga humaiageno anavaleno vigeana Atioku kumate eteana hai-mainae. Nayona ani kumate maineya Yisasina amakua aminaya veamoya “Anumaya Kotia tanaya hisigetana agai kea mohamapaio.” huya hunatenaya kumatelagiana ani aliyana ali-vayayeteana eteana umainae.

27 Ago evayi huana Yisasi anagafe “Melitalu hiho.” haageya ageana Anumaya Kotia anakaiene tokaeno mainegeana mukiama humainaa kavafena hamapaiteana Isaleli omainaya veanene Yisasife haviya amakupi maleya amametiti haya yafe Anumaya Kotia fita ago yakimatene huana hamapaie. 28 Ani Atioku kumatela Yisasi kema nehaviya veanenena ayaaya kanagefa anilega mainae.